السلام عليكم ورحمه الله

طبعا بتستغربون العنوان بس هذا الأسبوع فيه أخبار ساره وجميله وبعضكم ماعنده علم فحبيت أهني وأبارك لي

شخصيا وللشبكه وللجميع وجود ثلاث مناسبات سعيده على قلبي وقلوبكم ويشهد الله من فرحتي طرحت هالموضوع


أولا : الغالي والأستاذ وأخوي الكبير أبن خضير
-----------------------------------------------------------------------

طبعا من أوائل الأشخاص اللي تعلمت منه والله الكثير وأتذكر اول ماصرت مشرف كان يوجهني ويدق علي

وما أدري وش السالفه ويقول إذا تبي كذا ساوي كذا وإذا سويت كذا لابد تحط كذا

المهم علمني شلون أصير مشرف وكان الله يعطيه العافيه يدق علي ويتابع معاي في المجلس ويبلغني

ويوجهني ويكفي عندي أنه في صيف العام وبالرغم من أكثر الشباب مافهم موجودين وكانت الاستراحه


نائمه شوي وهو معاي شعللها وشغلها بمواضيعه وتواجده وردوده ومشاركاته

بالفعل والله انه استاذ

طبعا اخوي ابن خضير طلب أعتذار عن المراقبه نظرا لظروفه الصحيه والكثير يعلم بذلك

ووالله اني زعلت وماتخيلت مجالسنا تخلو منه ومن وجوده وبالذات في الاستراحه

ووالله يابو سعد اني من يوم عرفت وانا أفكر في طريقه لعلي أثنيك عن عزمك في الرحيل

والحمدلله على رجوعك وبيض الله وجهك على موافقتنا وتقديرك لطلبتنا انا والشباب

فأقول لك أهلا وسهلا بك ومن هالعين لي هالعين ويامرحبا وسهلا فيك يابو سعد

------------------------------------------------------------------------------------------------------------------------------------------------

ثانيا: أو عساف المشرف الراقي الرائع ويكفي أن تكون مجالس قحطان متميزه عن باقي المنتديات بوجود


أبو عساف وهو بالنسبه لي رصيد داخل وخارج الشبكه والله على ما أقول شهيد


أبو عساف يحل ضيفا علينا في إستراحة المجالس وعلى كرسي التعارف وهذه مناسبه سعيده


لنا في الاستراحه وتميز فمرحبا بك يابو عساف بين محبينك وأخوانك وأبناء عمك

-------------------------------------------------------------------------------------------------------------------------------------------------

ثالثا: تركي السنحاني وما أدراك ماتركي السنحاني

إذا لمجالس قحطان دينمو يحركها فهو تركي بلا منازع

إذا كان لكل منتدى في عالم النت شخص مثل تركي فأضمن له النجاح والشعبيه

طيب طيبه غير طبيعيه هذا الشخص...ودود جدا وخفيف دم لدرجه انك ممكن تشرب الشاهي حار وهو قدامك


وياكثر ماتعبته وكلفت عليه وعارف نفسي أحيانا أغثه وماعمره غيره شيء أبد وحتى وهو في أسوأ ظروفه؟


وملاحظه هامه : تروه أمين يا شباب يعني اذا حط أحد عنده فلوس فلا يخاف ( عن تجربه )

وهو شخص له شعبيه جدا جدا بين الأعضاء والمشرفيين والمراقبين واتمنى القى واحد ما يعرفه ومالقيت؟


له قبول في النفس بالرغم إني أحلا منه ( صح ياتركي ) لكن سبحان الله ربي عطاه قبول من الناس ماعمري شفت


هالقبول عند أحد فسبحان الله وسبحان من أعطاه هذا الحب والقبول ويستاهل والله ابو فرحان


المهم نرحب بعودة تركي السنحاني بعد مدة من الإنقطاع عن مجالسنا نظرا لظروفه وأنا أول من سعد بخبر رجوعه


فهلا وغلا يابو فرحان ولو يسمحون بالرمي لجيب دبابه على بوابة المجالس وأرمي عليك بكم صاروخ ترحيبا بعودتك.


----------------------------------------------------------------------------------------------------------------------------------------------------------

في النهايه لقيت ثلاث مناسبات مع بعض جمعتها والله يديم علينا الرخى والنعمه ويديم هذا التواصل الجميل

تقبلوا تحيات أخوكم / منصور العبدالله من أمام بوابة إستراحه المجالس - بمجالس قحطان - وألقاكم في نشره جديده.

__________________



اللهم أرحم والدتي ..وأجعل قبرها روضه من رياض الجنه..واسكنها جناتك