سعد بن عدال


ياسلامي والتحيه صافيه من قلب صافـي
للرجال اللي لهم في القلب عـز ومقدريـه
أنت ياخولان شاعر ميزتك يالقرم وافـي
إسم خولان أشتهر من غير ذيك وغير ذيه

خولان بن عامر

مرحبا مليون يابن عدال لو ماهـو بكافـي
في مكان اهل الوفاء والطيب وارجال الحميه
ياسعد خل المعاني خافيـه والعلـم خافـي
انتبـه للعـود الازرق وانتبـه للشاذليـه

سعد بن عدال


البقا ياللـي ترحـب دام ستـر الله ضافـي
وأشهد إنك ماظلمت اللي تحدّوا كـل هيـه
تالي الوقت أستتر شخصٍ من أول كان حافي
والفضل لله ثم للي ما أحد في الكـون زيـه

خولان بن عامر

ياسعد مالك ومال القوم يقفى العلم قافـي
البس البشت الحساوي واحتزم بالحضرميه
انت داري ماوقع في حب شيمه غير وافي
والعرب قالـت لوافـي ياهنّيـه ياهنّيـه


سعد بن عدال


نعرف إن السعي ياخولان من عقب الطوافي
لكن الوضع أختلف صار الولد مثـل البنيـه
ماتقـول إلا الحقيقـه والحقيقـه ماتشافـي
عند بعض الناس توضح والبعض تبقى خفيه



خولان بن عامر


الله اكبر يازمان العولمـه والانحرافـي
مابقى به فرق بين العولمـه والجاهليـه
الهدوم انظاف وقلوب العرب ماهي نظافي
المعابر كذبت والمشكلـه فـي البندقيـه

__________________