السلام عليكم ورحمة الله وبركاته .... ذكرتونا بشيبانا الله يرحمهم ... المشكله ترى يا اخوانا تكمن في استيعابنا نحن وابنائنا والاجيال القادمة مفهوم القبيله (بفتح القاف و تسكين الباء ) .... لما نتكلم عن الشيبان ففي الحقيقه نتكلم عن اللي اعمارهم فوق السبعين سنه ....اللي بقي منهم كان يروي لنا قصص من عاصروهم ومن لحقوا عليهم في ذلك الزمان .... انا اتذكر قصة احد شيباننا لما كان يسني على البير وتخاصم هو وشيخ القبيله وتماسكو وكل منهم معه سلاحه وفرعوا بينهم الجماعه ... وكان يقولون انه حصل في هالخصمه من السباب والشتم الكثير ... وكان الكلام هذا في الضحى .... طبعا القبيله كلهم لها مسجد واحد ... وكان بيت هالرجال مقابل المسجد ... وبعد صلاة العشا الفوا عليه ضيوف من خواله من قرية ثانيه ... المهم الرجال ضيفهم ... وهو قاعد يسوي قهوتم الا ويسمع الداخل عليه ... الا وهو شيخ القبيله يناديه وهو يدخل بيته ياعبدالله ..... فز الرجال من على القهوه واستقبل الشيخ بترحيبه سمعها اللي في القريه كلها ارحب يا نــــــــــــــــــــــاصر ارحب ... ترحيبة يالربع طويله وهم كانوا قد تخاصموا صبح ذلك اليوم ... رحب به وقلطه ولا في الخاطر من علوم الشيطان شي .... شوفوا كيف كان التسامح بينهم .... الحين نسمع من قصص المهاشل والصلح اشياء لاترقى الى مستوى المهاشل والصلح اللي كانت تصير في ايام الاولين ... الحقيقه انه الجيل اللي خلف شيبانا الاولين ما أخذ الا كل شيء ردي (للاسف ) وتركوا علوم الرجال اللي ترفع الراس ..... احنا دورنا كبير في التأثير على ابنائنا .... حيث يجب ان نغرس فيهم اصول المحبه من خلال تعليمهم وتربيتهم التربية الصحيحه الستنده على تعاليم ديننا احنيف ... وتسلمون