[poem=font="simplified arabic,7,blue,bold,normal" bkcolor="transparent" bkimage="" border="none,4,gray" type=2 line=0 align=center use=ex num=",black""]
عزاه ياقلب(ن) من الناس مخدوع=يوفي يحسب الناس تعمل سواته
لا شك كل له تصانيف وطبوع=وميزت وقتي في رخاه وقساته
نهج الوفا ثابت بقلبي ومزروع=والصدق في الرجال يظهر حلاته
واليوم كل(ن) صار له سلم وشروع=وكل(ن) على كيفه بعلمه وذاته
بين العرب نادر بفعله وبالنوع=الطيب والناموس دايم صفاته
وكم واحد(ن) فرقاه لو كادك الجوع=يسوى رصيد البنك بمضارباته
وبعض البشر ذكره مع الناس مسموع=مثل المطر لاهل ينبت نباته
ومنافق بالنم والحسد مجموع=يخفى ورا صدره ويلبس عباته
هذاك يكره حيل ما منه منفوع=ما عاد تفرق عيشته من مماته
ياما عرفت وصرت في الوقت مفجوع=من ذا الزمان اللي قليل نجاته
تغيّروا الاخوان والوصل مقطوع=سبة وسخ دنيا وحكي الشماته
الله يعين اللي زمانه له يروع=شاف المصايب وابتلا في حياته
أعيش بين الناس والراس مرفوع=وكل(ن) يحدد رغبته وأمنياته
عزي لقلب(ن) عاش طيب ومخدوع=يوفي وغيره مايسوي سواته[/poem]