[poem=font="Simplified Arabic,5,white,bold,normal" bkcolor="darkred" bkimage="" border="double,thick,red" type=4 line=0 align=center use=ex num="0,black"]
الحمـد لله والمنـة علـى كــل حــال=ولا نرتجي في المسرّة والمضـرّة سـواه
لله ما أعطى وله ما أخذ رضـا وابتهـال=الرزق بيديه واللـي نمتلـك مـن عطـاه
ولا أقول غير الله يعوّض على أهل الحلال=اللي تسبب تسمـم ضرمتـه فـي فنـاه
الله يحسن عزا أهل البل ضحايـا النخـال=والله يسلط على الظالـم ويلعـن ثـواه
اللي نكب معظم العالـم جنـوب وشمـال=بعض العـرب راح ذوده كلبـوه بعصـاه
في ظرف ساعة غدت كحل ٍ مع الدمع سال=ما باقي ٍ غيـر وايتهـا ملحـف غطـاه
تصرعـت قـدم عينـه دقهـا والجـلال=غبينـةٍ تجـرح المسلـم وتبحـث خفـاه
كم واحدٍ حبّـه إبلـه مثـل حـب العيـال=خطر ٍ بعدها من الصدمـة تجيـه الوفـاه
البدو ما عندهم غيـر إبلهـم راس مـال=من دونها يشترون المـوت قبـل الحيـاه
الدم الأحمر ثمنهـا قبـل وقـت الريـال=والعمر يرخص لها يـوم الملاقـا غـلاه
والوقت ذا سعر طيّبهـا يفـوق الخيـال=فيها الملايين تدفـع مثـل دفـع الزكـاه
ما يشتريها سوى راع الرصيـد الجـلال=والبعض منها يعـوّد سايمـه مـا شـراه
كم فاطر ٍ ما يجـي للبيـع فيهـا مجـال=يروح من دونها وجـه الحيـاوي صفـاه
آيـة ورد ذكرهـا قـدام نصـب الجبـال=في محكم القول قبل أرض العزيز وسمـاه
يا شعب الإسلام هـذا مـا يبيلـه سـؤال=العلـم مبنـي علـى كيـدٍ بعيـدٍ مــداه
الكارثة مـن وراهـا فعـل مقـرود فـال=لكن لو سلم فـي الدنيـا تـرى الله وراه
لازم تبين الحقيقـة مثـل نـور الهـلال=لو طوّلت خافيه مـن تحـت كـم العبـاه
قتل البهائم خبر ثابت ما هـوب إحتمـال=بأن الخطر واصل ٍ زاد المواطـن ومـاه
لكن لحـوّ علـى الله بالطلـب والسـؤال=وادعوا ترى المبلي المظلوم يقبـل دعـاه
إيبيّن الحق ويجيـب النّصـف والعـدال=على يدين الحكومة حسب حكـم القضـاه
واخذوا حذركم ترى جاء في الزمان اختلال=ومن لدغ من جحر مره مات ما عاد جـاه
استمسكوا في عرى الوالي متين الحبـال=العز في طاعـة اللـي كلنـا فـي رجـاه
يا مستمـع كـل حـي ٍ مقتفيـه الـزوال=ومن أتقى الله يفوز ومن نسا الله نسـاه
دوام حال الخلائق فـي البسيطـة محـال=العبد ماله عن المكتـوب لـو مـا بغـاه
لازم يمـر أكثـر العالـم قبـل الارتحـال=أحزان وأفراح صحة سقـم فقـر وغنـاه
والمؤمن إن كان عمره قل وإن كان طـال=يبلا وربك ليـا مـن حـب عبـد ابتـلاه
والصبر مفتـاح بيبـان الفـرج للرجـال=والكذب حبل الدرك والصدق حبل النجـاه
ولا يشيـل الحمـول إلا ظهـور الجمـال=لا كشـر الوقـت بأنيابـه ودارت رحـاه
لا بان راع الخفـاف وبـان راع الثقـال=وجت ساعةٍ تظهر الواحد علـى مستـواه
أحدٍ سواة البليهي لازمـا الحمـل شـال=وأحدٍ سواة الرعاع اللـي طنـوبٍ رغـاه
يا قائد الشعب خـادم بيـت رب الجـلال=شعبك جراله من أنواع البلاء مـا كفـاه
العام من سوق الأسهم ذاق مـر الوبـال=وفي ذي السنة عاد دلو امقيط لحقت رشاه
يوم أنتها دور الأسهم جاك دور( الغلال=قيمة سموم المواشي من جيـوب الرعـاه
بين الجرائم وبيـن النصـب والاحتيـال=حلالنا راح ما نـدري مـن اللـي خـذاه
تسابقتنا المصائـب ورد مـن كـل جـال=وتلعب بنا الريح ما ندري على أي اتجـاه
والله يستـر بعـد مـن مقبـلات الليـال=لا نصبح إمـا غـداً للذيـب وألا عشـاه
مير الرجاء في كرم منشي صدوق الخيال=ثم في ملكنـا عسـا ربـي يطـول بقـاه
يا قف وقوفٍ يجي للناس مضـرب مثـال=تبث الإعـلام فـي العالـم مكـارم نبـاه[/poem]


الشاعر / فيصل بن فرج بن شعيفان السويدي السبيعي