[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
سجدنا لربٍ ساق برق السحـاب إعصيـر=علـى ديـرةٍ فـاح النفـل مـع هبايبهـا
من العارض المنقاد بشّـر بشيـر الخيـر=ونجـران هلـت بـه وفـلـت ذوايبـهـا
هلا والقلـوب اطهرمـن الغيـم والتعبيـر=وبيـض النوايـا فـي الحنايـا نرتبـهـا
هلا بك يا نبراس العـدل قايـد التطويـر=ياصقر العروبه يا اصدق النـاس واطيبهـا
هلا مرحبا والحـب مـا يحتمـل تفسيـر=وليالـي غيابـك يـا ملكـنـا نحسّبـهـا
كسيت الجبل بشت ووقـف هيبـه وتقديـر=يقـلّـد شمـوخـك والثـريّـا يراقبـهـا
وقمة طويق اللـي عليهـا يغنـي الطيـر=زهـت بالعقـال تميلـه فـوق حاجبـهـا
تسوي سواتك وانت طبعك وعزمـك غيـر=وعطفك يابو متعـب رفـع قـدر شايبهـا
بكيت وبكا شعبك من طريف لل " خرخير "=على ابن الشهيد ارهت عيونـك سحايبهـا
دمـوعٍ تهـزم الـذل وتحـارب التدميـر=دمـوعٍ تسولـف للوطـن مجـد غايبهـا
دموعٍ تـداوي الجـرح وتكافـح التزويـر=دموعٍ تصـب الشمـس والليـل يشربهـا
دموعٍ اشد مـن الجنابـي وسيـف الزيـر=علـى الشلـة اللـي ماجهلنـا مآربـهـا
تجي يابكـور الوسـم بالغيـث والتبشيـر=تـزف الحيـا وبـروق ليلـك تجاذبـهـا
تبـادر بفعـل الخيـر والجـود والتيسيـر=وتشهـد علـى طيـب الموانـي مراكبهـا
وعضيدك ولي العهـد ماحافـه التقصيـر=حزامـك يمينـك درع جنبـك مقطبـهـا
يقود الطلايع سرب وقّّـع وسـرب يغيـر=وكـفٍ تمـد الـشـر لـلـدار يعطبـهـا
خذ العهد منا يا ملـك يـا وطـن ياميـر=يارملٍ سكـن عـوج الضلـوع ومناكبهـا
نعاهد علـى طاعـة ملكنـا بـلا تأخيـر=نعاهـد نقـدم روحنـا لــه ونجلبـهـا
ودارٍ تشفـر حبهـا فـي الحشـا تشفيـر=نعاهد على صـدق الـولا فـي حرايبهـا
نعاهد نسوق العمر واللي يصيـر يصيـر=مـمـاتٍ يـعـز ولا حـيـاة تغضّبـهـا
نمـاري بتاريـخٍ يخلـي العقـول تحيـر=نجـوم السمـا عنّـه تسولـف مواكبـهـا
عسى الله يرحم من بنى المجـد بالتفكيـر=سرى والسيـوف إلهـا رجـالٍ تخضّبهـا
هجد نجد في ليل الشتـا واعلـن التغييـر=وشامـت لبـو تركـي ووحّـد جوانبهـا
رحل والمواقف خالـده مـا تبـي تذكيـر=رحل والبيارق في ثـرى العـز ناصبهـا
وخلّـف صناديـدٍ بنهـج الكتـاب تسيـر=على العـز والنومـاس رفـت شواربهـا
ليا صاح حدك ياوطن واعلنـو التحذيـر=تعزووا هـل العوجـا وداسـو صعايبهـا
يغني الخفوق ولـو سألتـه عـن التبريـر=يقول انت يـا صقـر العروبـة سبايبهـا
يرحب بك اللي ما عرف وجهـه التكشيـر=اميـرٍٍ يسـوق الخيـر والنـاس كاسبهـا
شلع في الوديعة واعتلى والشـرار يطيـر=وشهر مشعل بن سعود في الجو واعجبهـا
هلا بـك يرددهـا هـلا والديـار بخيـر=وجيّتـك ياغـيـث الربـيـع نترقبـهـا
الا ما حلا شوف العشايـر تحـث السيـر=شمال "ابرق الفنجـال" والعشـب جاذبهـا
فجوجٍ تفوق الوصف والشـرح والتصويـر=مـواكـر شياهـيـنٍٍ حــدادٍ مخالبـهـا
رجالٍ على حـد الوطـن تحتمـي وتغيـر=تحت بيـرق آل سعـود تسـري ركايبهـا
على البر والتقـوى يميحـون جـم البيـر=وتواضـع مقامـك يـا ملكنـا يقرّبـهـا
خشعت ورفعت ايديـك بالحمـد والتكبيـر=بركـن الحـرم ودمـوع عينيـك تسكبهـا
تهلل وسبّابتـك يـا اطهـر مليـك تشيـر=لربـك عسـى ربـك يحقـق مطالبـهـا
وتبقـى بلدنـا موطـن الديـن والتنويـر=ووجهـك يابـو متعـب ينـوّر ويطربهـا[/poem]