السلام عليكم ورحمة الله وبركاته

أثناء تصفحي للنت لفت نظري هذه الشروط للتسجيل في أحد المنتديات






شروط التسجيل


يجب الموافقة على شروط الاشتراك في المنتديات ، قبل إمكانية التسجيل :





انت وانتي وهي وهوكلكم تعالوا اقروا الشروط قبل لا توافقون وتسجلون ..

شروط منتدانا والتسجيل عندنا << واللي بيبزوط بها بيصفر عليه الحكم

اول شروطنا واهمها :

المنقول ممنوع .. يعني اي موضوع منقول بننقله للحواق الله لا يعوقه بشر .. والعضو اللي بينقل لنا مواضيع ترا مهوب احسن له .. واوووووه اوووه لو جانا واحد ناقلنا موضوع وناسبه لنفسه .. هذا امه داعية عليه .. لاننا حنا اصلا مانعين المنقول في منتدانا يعني ما نبيه لا وهو مكتوب منقول ولا وانت ناسبه لعمرك .. وبنفس الوقت ما نبي احد يستغفلنا ويجيب شين مهوب له ويحطه باسمه .. ترا كلنا نعرف نسجل بمنتديات ثانيه وقروبات ونعرف مواضيعهم ومصالتهم لا تجي تسوي علينا ذيب .. انتم كلكم فيكم الخير والبركة وابداعكم ما يقل عن ابداع اعضائنا المسجلين قبلكم .. فليش نخليكم تنقلون ونقتل هالمواهب المكبوته عندكم .. نبيكم تسجلون وتكتبون لنا من دميجتكم وتتحفونا باللي عندكم .. وهاللي كتبوا المواضيع اللي بعضكم يفكر ينقلها مهمب احسن منكم .. تقدرون تكتبون مثلها واحسن منها بعد ..

شرطنا الثاني :

المواضيع اللي تنزل باقسام منتدانا .. مشرفينا لهم كامل الصلاحية يتصرفون بها</> .. يخلونها زي ما هي .. يعدلون عليها .. ينقلونها للقسم اللي يشوفونه انسب لها .. يحذفونها .. يسوون اللي يبونه بها ومن دون ما يرجعون لصاحب الموضوع قبل لا يسون شيء .. واذا عندك اي اعتراض على اللي سواه المشرف تقدر تراسله عن طريق الرسايل الخاصه وتتفاهم معه وتبين له وجهة نظرك .. وهو يبين لك وجهة نظرة .. وان شاء الله انك منتب طالعن من عنده الا راضي ..

شرطنا الثالث :

اذا عندك مشكلة مع واحد من الاعضاء وما قدرتوا تحلونها بين بعض .. تقدرون ترجعون لمشرف القسم اللي صارت بقسمة المشكلة .. وهو بيحلها لكم .. اذا رجعت للمشرف وحسيت انه ما انصفك تقدر تراسل واحدن من الخضر ولا الحمر وهم ان شاء الله بيحلونها لك .. بس قبل لا تروح لهم لازم تكلم مشرف القسم</> وتشرح له مشكلتك وش هي مهوب تنقز على طول للكبار .. لان الكبار عندهم من مشاكل كثر شعر راسك مهمب ناقصين مشاكلن زود اذا كان المشرف يقدر يتصرف بها << ولا ليش حاطين لكم مشرفين

شرطنا الرابع :

اليوزرات وما ادراك ما اليوزرات .. اللي بيسجل عندنا بيوزرات بايخه ( واقصد ببايخه الاسماء المبزوطه ) او رموز ما تنفهم او ارقام مالها معنى .. بيلقانا لابسين كندرت اديداس ام دبابيس .. ومازعين يوزرة برا المنتدى .. ايه انتبهوا اختاروا اسمائن زينه وخلوا عنكم البزوطه

شرطنا الخامس :

الاعضاء اللي بيجون ينشبون للمشرفين ثبت موضوعي ارسل موضوعي للوفر .. حطوني مشرف .. المشرف الفلاني ما يستاهل الاشراف .. هذولي يا ويلهم ويا سواد ليلهم .. حنا اللي نقيم المواضيع وحنا اللي نقرر اذا يستاهل التثبيت ولا اللوفر وحنا اللي نقرر كل ابو شيء .. ولا ليش سمونا مشرفين .. وكل مشرفينا ثقتنا فيهم كبيرة ونعرف امكانياتهم .. يعني اللي بيجي يقول هالمشرف ما يستاهل الاشراف او ما يصلح للاشراف ومن هالخرابيط .. حنا بغنى عن حتسيه لاننا ادرا فيهم منكم .. وما مسكوا الاشراف الا لانهم كفوو له

شرطنا السادس :

الاسلام .. وكلنا مسلمين وعلى السنه والجماعه ..
لحد يجيني يطب محيفرة ويكفر ويفتي ويبزوط بالدين .. لان هالامور ما بها لعب .. واللي بيمزح او يستهبل او يجيب طاري الدين بنتوطى ببطنه لين نخليه يعض الارض .. وعقبها بنقشعه من منتدانا لاننا منحب بحاجت اللي من هالنمونه

شرطنا السابع :

مواضيع الترحيب .. مواضيع الترحيب ممنوعه عندنا بكل اقسام المنتدى .. انت بمجرد انك سجلت دخول على المنتدى فانت صرت واحدن منا .. ومن اهل البيت ومعد انتب غريب وما يحتاج نرحب بك .. ففل الحجاج وطيح الميانه ووسع صدرك معنا .. وكانك ملزم تبي ترحيب .. ترحيبنا فيك بيكون بمواضيعك المميزة .. تزل لنا موضوع مميز وكلن بيجي يرحب بك .. لا اشوف احد منزل لي موضوع يقول رحبوا فيني لاني وقتها بجي احش رجليه حش .. وبننقل موضوعه للحواق

الشرط الثامن :

مواضيع الاختراق والهكر والتجسس .. هالنمونه من المواضيع ممنوعه بشكل نهائي عندنا بالمنتدى .. واي واحد بينزل موضوع من هالنمونه بينحذف موضوعه وبنوكله خابور علشان معد يتعودها .. منحب ناقصين نكسب اثامكم ونستاثم بناسن مساكين لاننا علمناكم كيف توذون العالم !! ..اما مواضيع الحماية والوقايه من الهكر هذي مسموح بها ونرحب بها ..

شرطنا التاسع :

الدعايات .. ممنوع اي احد يجي يسوي دعاية لمنتدى ثاني .. او يبلش الاعضاء والمشرفين على الخاص ويشتغل بهم دعوات للمنتديات او مواقع ثانيه .. بيجيه باند يمشي تريليون .. يعني هدوا اللعب وخلوا لعبنا نظيف ومن دون لا كروت حمر ولا صفر

شرطنا العاشر والاخير :

قريت الشروط اللي فوق ؟؟ .. خلاص انتبه لها .. واشر تحت انك قريتها وموافق عليها وكمل تسجيلك معنا .. ويا هلا ومرحبا بك وعين فراش وعين لحاف





اقر وابصم بالعشرة اني قريت شروط ------ وموافق على كل اللي فيها.

لو فيه شرط 11 كان خذا الأعضاء بالمشعاب



الشره والله على اللي بيسجل عنده

مشكوور يا ابو فهد

وماودي يشوفون المدراء الكبار الموضوع ويطبقون بعض الشروط

حاول توزيه ايمين ولا يسار

__________________

اخوي خالد صبحك بالخير


(( مواضيع الترحيب ممنوعه عندنا بكل اقسام المنتدى .. انت بمجرد انك سجلت دخول على المنتدى فانت صرت واحدن

منا .. ومن اهل البيت ومعد انتب غريب وما يحتاج نرحب بك ))


اكيد صاحب المنتدى قصيمي

شروط بعضها منطقي جدن

والبعض الاخر مدري وش يبي

والباقيه بين البين




المهم الاخلاق

وعساك أشتركت في الموقع ياخالد

__________________



لأستشاراتك القانونية أضغط هنا
لوجه الله تعالى

ههههههههههههه

شروط غربيه

لاهنت على القل الي اكثر من الرائع


تقبل مرووووووووووووري

__________________


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــ

ههههههههههههههههههههه

هالوموقع مقلع


وش هالألوان كلها


ودك نطبقها عندنا في المجالس ( بعضها يصلح )


لاهنت مشرفنا الرائع خالد العاصمي

كل يوم وانت تزداد إبداعا

__________________



اللهم أرحم والدتي ..وأجعل قبرها روضه من رياض الجنه..واسكنها جناتك

بسيطة أشترك عندهم ونزل مواضيع فاضيه

وكمان رد على موضوعك الفاضي برد فاضي

وخلك كذا على طول الخط

ولاتنسى يكون اسمك فاضي

لاهنت قريت والله ما افكر اسجل بها خبل صاحب هذا المنتدى والا ايش الحكاية

__________________

رهيبه والله


رد رايق اخوي احمد

__________________



اللهم أرحم والدتي ..وأجعل قبرها روضه من رياض الجنه..واسكنها جناتك