يالله اني طالبك يالله يامذري الذواري *** انك اديم الوفا ضمن المعزه والمسره
يسري الرعاد والبراق في ليل(ن) غداري *** والهجوس يهيضها صوت الحبابي يوم جره
صدق ياراعي الوفا لا بارك الله في السفاري *** مايسوقه واحد الا بالمشاريه يتشره
مالك الا الربع يابو علي مادام انك شاري *** اشهد انه درة(ن) في البر لو للبر دره
جنبه خط اللكازس والكدالك والفراري *** جنبه قار الحكومه خل له في البر جره
مايبي خط(ن) وقف فوقه مهندس واستشاري *** مايبي غير الوعر واليا كفخ لله دره
ياحمد يامسندي لامن شريته خلك ساري *** لين تاصل دار ابن عايض نمر تعرف مقره

يانمر ياصاحبي شورك على عيني وراسي *** يارفيق(ن) في الرخا والضيق كساب السمينه
غير انا ذوقي عنيد وقاسي وعسر سياسي *** مايفره كل شكل وعزك ايش يسر عينه
جيب تايوتا بريمي شيخته شمل وحماسي *** انشد اللي بالدراهم من غناهم مشترينه
موتر(ن) ماله مثيل ولامشى في الخط راسي *** مثل مايرسي على سطح البحر جسم السفينه
اشهد انه غاية الاذواق جلاي العماسي *** ناوينه باذن ربي لو غدوا بيني وبينه
والحبابي لانوى المشورا من دون التباسي *** انت يانمر النماره مركبك على يمينه
لو شريت الجيب يابن الناس لا ماني بناسي *** خوت ابن زميع واهل الطيب شرواكم ثمينه
بين الاصحاب العزاز وبين خلاني وناسي *** اقضي اللي باقي من العمر في بر ومدينه