البارحـه ليلـي هواجيـس وافكـار واصبحت من حلو المنام محرومـي
مالي ومال العين لـو هلـت اعبـار ساعـة تقاومنـي وساعـه تنومـي
المشكلـه قلبـي عنيـد وجـضـار كنه يجاهـد لـه طوابيـر رومـي
يداعبني الهاجوس واصبحت محتـار مثل غريب الدار في وسـط قومـي
مع الاسـف محـد نوانـي بمسيـار ارتـاح وانسـى واردات الهمومـي
البـاب مفتـوح ولا شفـت ديــار الا هبوب الريـح بالفـرش تومـي
وافتر دولاب الضمايـر بالاشعـار الله يلـوم اللـي لقلـبـي يلـومـي
جالس وانا كني علـى كيـر بيطـار واللـي يشبـه بالانجـاز امهومـي
وحالـي كمـا عـود تـولاه نجـار ولابد له عقـب الوجـود معدومـي
يا رزن بوصيك فـي شبـة النـار خلك على درب المراجـل عزومـي
افرح ورحب لا لفـا البيـت خطـار والرزق عند اللـي ينشـي الغيومـي
يا رزن بوصيك بالضيـف والجـار تـرى لهـم حـق علينـا لزومـي
واخذ بخاطر جار بيتك ولـو جـار خلـه عزيـز دايـم وامحشـومـي
الجار لـه عنـد الاجاويـد مقـدار اهـل المـروه عارفيـن السلومـي
وخلك على ربعـك حليـم وصبـار ظلك الـى هبـت لهيـب السمومـي
يا رزن هم درعك الى صار ما صار وبار الصحيـب وكملـن العلومـي
وزلت رفيقك خلها مـا بهـا عـار اصفح وخله فـي بحـوره يعومـي
والى خذا في موجة الجهـل مشـوار ثم انثنـى لـك بـادي لـه لزومـي
عطه ولا تسمـع كثيريـن الاشـوار ما فات مات وراح مثـل الحلومـي
يا ما صفحنا من طويلات واقصـار والنفس عن بعض المعانـي تشومـي
ولابد مـا نرحـل ويبقـن الاذكـار والدايـم الله والبشـر مـا تـدومـي
ولا تامن الدنيا ترى الوقـت غـدار ترمـي مـع غراتهـا بالسهـومـي
الله يجيرك من صواديـف الاقـدار لعـل حظـك بالسعـاده يقـومـي
واحرص على دينك مع القوم الاخيار عينك تنـام وخالقـك مـا ينومـي
وهو الذي يعلـم خفيـات الاسـرار ما خسر من طاع الودود الرحومـي
وعلى النبي صلوا عدد وبل الامطار وعداد مـن طلـة عليـه النجومـي

ارررررررررحب يامحمد صح السان الشاعر

وتسلم ع النقل الجزل يالجزل والطيب مايجيب إلاً اطيب

لك تحياتي وتقبل مروري

يا مرحبا يا محمد ..

صح لسان الشاعر ..

ولاهنت على هذا النقل الاكثر من رائع ..

دمت في رعايه الله ..

__________________

محمد والله انك وافي ..

صح الله السان الخنفري مدد بلا عدد ..

وجعل يمنآك ماتعطب يا الذيب ..

وتستاهل سمعه نفداك على ذا الجزاله ..

أرحب يا العلياني ..

صح الله لسان ابن رزن ..

ولا هنت على النقل ..

__________________
:: سبحان الله وبحمده :: سبحان الله العظيم ::

شـبـكـة قـحـطـان * الموقع الرسمي لقبيلة قحطان *

../ اعتذر لقلّة تواجدي ومشاركاتي في المنتدى وذلك لظروف الاختبارات ، لا تنسوني من صالح دعائكم /..