[poem=font="Simplified Arabic,6,royalblue,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]
على ضو سناها واشتعاله من بعيد يشاف = تلاعبها نسانيس الهوا و يلوفها الغربي

سرت بي عن محيط المجتمع شرَد بنات القاف = بعد ما اعلنت بالهدنه غزتني واعلنت حربي

بها من سطوة القرم الشجاع و روغة الخواف = ادور بعدها من همها و تحاول القربي

توردني شفاشيف القراح بعالي المشراف = وتثَر في شفوفي في مذاق الزاد والشربي

الين اسند هجوسي على اللي يحتمي الميقاف = و يفهم حسبة المجموع في التقسيم والضربي

تنقيت السمان الطيبه والا العجاف عجاف = تميزها وصايفها ما بين الهيم والجربي

بعيدن عن طريق الشوشره والدس والارجاف = على وضح النقا ما خالفت في دربها دربي

سلام الله سلامن للنشاما معدنه شفاف = سلامن يمَن اهل البوسنه من سطوة الصربي

على رجلن شفوفه في الطروق النادره تنشاف = بها من فبركة سلطان والا حبكة الحربي

لبن عم عليه يحدني الطاروق والمحراف = تجيه اسراب فكري حايمه سربن ورا سربي

مجاهد واخذ مني ما تهيا والهجوس اسلاف = و هي طربه وانا خابر مزاجك للغنا طربي

اخايل في البروق اللي تلوح بعالي النفناف =بردها وان ضرب في الارض يقلب صفحة التربي

تناقل علمه عسوس العرب و يطوفه الطواف = و كلن ينقل اخباره مابين العجم والعربي

نحسبه عارض رايح وهو ليلن غشاه شعاف = و سيله ينقل خفاف الحيود و يدهك الزربي

عسى ربي يجنبنا هداده والثقال خفاف = على قول المثل يا ذرب خلك دايمن ذربي

تقدمنا صحيح ولا نبي نرجع ورا و خلاف = مصيبه كان جاري بابخس السلعه يتاجر بي

ختام السالفه ضوي سناها من بعيد يشاف = تلاعبها نسانيس الهوا و يلوفها الغربي[/poem]