[poem=font="Simplified Arabic,7,black,bold,normal" bkcolor="transparent" bkimage="" border="double,medium,gray" type=1 line=0 align=center use=ex num="0,black"]
يا حضرة اللي تتابعنا وتسمعنا=هذي بيوت القصيدة وأنت تسمعها
اسمع ولا هوب لازم تفهم المعنا=ما هوب لازم تجي معك وتجي معها
حنا مشينا مع التيار وأسرعنا=نسابق أحداث الأيام وتسارعها
وصلفات الأيام تشبرنا وتذرعنا=وأهل الشيم والقيم تلوي مذارعها
طرنا و وصلنا السما السابع و وقعنا=والناس لا بد ما ترضى بواقها
الواقع اللي انصدمنا به وروعنا=يا كثر ناس بعد مثلي مروعها
ما ينفع مجامل الخطّر ما ينفعنا=وأهل المنافع دوافعها منافعها
مبداهم ان كان ما طاع الزمن طعنا=وأنا ما دامت كذا مانيب طايعها
ما همنا من يواصلنا ويقطعنا=أهم شي حبال الشر نقطعها
وان خسرت البورصة نقفل مصانعنا=لو اقتصاد البلد على مصانعها
أمور دنيا تفرقنا وتجمعنا=وقلوب متفرقه يصعب تجمعها
وان اجتمعنا ما غيرنا طبايعنا=متناقضات الأوادم في طبايعها
بأسبابها ضاق شارهم وشارعنا=حتى المدينة تضيق بنا شوارعها
والأرض تاسع عباد الله وتاسعنا=ما دام ربي على خلقه موسعها
يا كم جمعنا من الدنيا وضيعنا=الا الأمانة نموت ولا نضيعها
الدين والخلق والآداب تمنعنا=والنفس عن ما يسئ الخلق نمنعها[/poem]