السلام عليكم ورحمة الله وبركاته

مساكم الله بالخير جميع

نهاية الاسبوع اللي طاف رحت للطائف وقلنا نغير جو في المنتزهات

رحت للشفا وقبل طلعت الشفا جاني مفرق على يمين قبل الدفاع المدني بـ500 متر لفيت معه فأذا بلوحة فوق مكتوب عليه قبيلة الهذيل يرحبون بكم فذهبت الى هذه القرية طبعا طريقه ضيق بالحيل يعني اذا صادفتك سيارة الله يعينك تطمر في جرف

المهم استأجرت بيت على الشرفة اصبحت يوم الخميس انا وعمي وكان معنا جيب Gx-r 2003 قال نبي ننزل تحت

ونزلنا في تهامة الشفا على حسب تسميتهم وفيه طريق يعملون فيه الان تفجير وزفلته نزلنا الا ان وصلنا له واذا الطريق مسدود ورجعنا واذا فيه مفرق على يميني ممهد نزلنا معه وصادفن شخص معه جيب شاص موديل 82 ومحمل حطب

وسألناه وش علمك وش علم الديرة اللي تحت

قال الله يحيكم الديرة تحت انزلو وترى الخط وعر جدا جدا والحطب اللي مركبه في الصندوق على شان يثقل على الموتر ما يقحص
قلنا شي طيب نزلنا مع ذيك النزلة اللي الله لا يوريكم الموتر وانت رابط فرامل يزحف وخط ضيق مرة جدا ولا يمديك تلف يمين ولا يسار
ويسرا الله النزله ونزلنا ويقابلنا واحد معه شاص موديل 79 وحلف علينا بالقهوة ورحنا معه مسافة 10 كيلو ونطب في هذا الشعب اللي يمشي فيه الغيل طبعا جاي من جبل فيه عين وهذي الطبيعة اللي ماودك الا بها وهذا الصيد من قهاب وحجل وسفع وارانب ووبران ( جهزو البنادق في شهر عشرة اللي بيطلع معي الله يحيه )

ونقلط على الرجال في هذي المزرعة الطيبة ونتقهو معهم شوي الا ابو الولد جاي ويرحب وقال غداكم يطبخ والله يحيكم طبعا الساعة 10 صباح ونتغدى معهم وقال العصر بروح نقنص قلنا العلم الطيب ورحنا وقنصنا من هذي الطيور والوبران حتى الارانب تضهر في النهار المهم قبل المغرب بشوي استأذن من الرجال قال فيه خط يطلعكم على مكة مسافة 70 كيلو وما ننصحكم بهذا الخط اللي جيتو معه قلنا خير ان شاءالله ونطلع قال عمي مالنا الا خطنا ونروح عليه وكان قدام كبسولة من اهل الديرة وهو يذب الجبل يوم وصل الى المكان الوعر وهو يقحص وستر الله علية من الانقلاب قال خلنا نمشي ونطلع قدامه طبع راعي الكبسولة اشر لنا وهم حاطين موقف صغير للطلعة الصعبة

ونشدها وربنا اللي جملنا وطلعنا الطلعة الاولى وشوي الا والطلعة الثانية اللي اعضم من الاولى ونلبق في الموقف ونسمنا الكفرات مرة وخذينا نصف ساعة الا ان طلعن طبعا راعي الكبسولة نشب ونروح ونجيب دركتر من المعدات ويسحبون راعي الكبسولة
والحمد لله وصلنا بالسلامة

الاستنتاج :
الديرة طيبة بالحيل والقنص متوفر فيها ولا تفوتكم يالقناصه وحتى اهله ماشاء الله عليهم كرماء بالحيل وعساهم يخلصون طريقهم المزفلت بأسرع وقت

مع اني عارفن ان الصيد بينقرض عندهم بعد فترة لان من قرا هذا الموضوع بيروح ويجهز العزبة

انا اسف على التطوييل في الكلام لكن نبي نحمسكم للروحة

تقبلو فائق التحية

يالله حيه و حي علمك


الحمدلله على السلامه


و اسعد الله اني معكم يا ابومحمد و المشكه اني شاري قبل شهر ساكتون ناريه تصلح للقنص و انا اخوك


على العموم استمتعنا بالقصه الرائعه يالغالي


و لا تحرمنا من طلاتك و ابداعك يالغالي


اخوك المخلص


تركي الجعادنه

والله اتمنى ذلك والله يا خوتك يا بو فرحان انها تنشرى

ومشكور على المرور

الطائف جميل --ولو تعرفه قبل --اربعين عام --كان شفت الجمال الطبيعي --عندما كانت احيائه الخارجيه الان

بساتين ---وفواكه الطائف لا يعلى عليها ---والورد والفل الطائفي --ماركه عالميه

لقد رعيت الغنم --في تلك المواقع التي ذهبت لها ---وفي الجهه الشرقيه منه --الردف --وغدير البنات --وغيرها

وكان الملوك والامراء --والاعيان --لهم مواقع مخصصه هناك ---ليست عليها شبك --وانما عاديه ---وتستطيع

الجلوس فيها --في غيابهم

ومن هنا --سمي (( بالطائف المأنوس )) يحس الانسان فيه --بروعة وجمال الطبيعه

-------
يعطيك العافيه

تحياتي

اشكرك جزيل الشكر يا صادق الوعد على هذه المداخلة الجميلة

الله يعطيك العافية ابن خريم

ما شاء الله مكان جذاب بس كملت الموضوع ببعض المناظر من هناك

تقبل تحياتي

الرحلة في الطائف الجميل توسع الخاطر 0 فهنئيا لأهله

ماجد الخليفي الله يعافيك انا سوف اضع بعض الصور ان شاء الله بس المشكلة الجوال طفت بطاريته ولم اتمكن من التصوير في موقع الحدث
ولكن هناك بعض الصور ومشكور لمرورك

سرني تواجدك معنا يالراوي الجديد

الحمدلله على السلامه هذا اولا

ولاهنت على موضوعك الشيق اللي ماينقصه الا الصور

وخوتك تنشرى يالقرم

__________________