ماكرهت من الطبوع الا التغلي

ولا عشقت من الوجيه الا السماحة


اسألك بالله وش مغزاك ياللي؟؟

لك ثلاث سنين في قلبي سياحة


لا أنت مسرف في جفاك ولا انت خلي

لا انت طاغي بالعذاب ولا انت راحه


لا انت محزون ولا انت بمسفهلي

لا تونسني ولا حولك نياحه


لاتناديني ولا جيت لمحلي

لا تجاملني ولا قلت الصراحه


ولا انت فيمن هام في حسنك مهلي

لا ترحب به ولا تطلق سراحه


ما تركت من الحلا لو ربع ملي

مالكٍ تاجه وبيدينك وشاحه


من يلد بعينك الخرسا يولي

مثل ما وليت بالرمش وسلاحه


ليتني من جمرتك فشيت غلي

لين اعلم جمرتك معنى الشفاحه


تلّ قلبي يوم لك ليل يهّلي

عانق الجيد وتخالط مع صباحه


جيت لك كلي ولا عوّدت كلي

من كيان العقل طيرتي مساحه


أضعف الايمان لا سافرت قلي

او تحسبه سرّ ما تبغى بواحه


يوم قلت اهواك ما قصدي تسلي

جيت ابيك تداوي القلب وجراحه


لين ما شبّعتني هجر وتغلي

وافتقد منك الرحابه والسماحه
منقول