الحمدلله ربّي إللي أغناني
السلام عليكم
كيف أنتوا طيبين ماجورين
مساكم الله بالخير جميعا
هذي قصيده لي أتمنى من شعراء المنتدى أن يتحفونا بنقدهم وأن يشرفونا بأرائهم حول القصيده
تقبلوا تحياتي
الحمدلله ربّي إللي أغناني..
عن الردى يوم كلّن تمشّى به,,
عزّيت نفسي عن إللي تناساني..
وكم من ردي مرخصن حقّي ماأوفى به,,
رغم الهموم القاسيه وأحزاني..
لازلت سالي وقلبي يشكي أتعابه,,
على دروب السعد مشّيت أخواني..
وقلبي على طيبته جمّعت أحبابه,,
هذا خوي(ن) على الردى تحدّاني..
وهذا خوي(ن) في طيبه أفتخرنا به,,
وهذا عدو(ن) في ضحكته أغراني..
وهذا رفيق(ن)لقيت الودّ بعتابه,,
لاوالذي خلقني ثم أحياني..
من نطفة تافهه مذكور بكتابه,,
الدمّ دمّي وهو دمّ جدّاني..
ماأرضى بلون(ن) تبرّوا منه أصحابه,,
ماني مخصّر في ثوبي كنّه فستاني..
ولاقبلت الذي بالطول سحّابه,,
عشقت طبعي وطبعي طبع جدّاني..
عاداتنا الجود والناموس طرنا به,,
ماني مثل من مشى بالطيب خوّاني..
الطيب طيبي ولاني أتغطى به,,
ولاني بفتن من بين فلان وفلاني..
ولا أساير أعوان إبليس وأذنابه,,
إللي لهم عندنا سمعه ولهم شآني..
ولا أجامل من كذب وأهابه,,
ولاني بخشى الغريم إللي تحدّاني..
ومايخاف الاسد من عاش في غابه,,
أبكي وأبكي قهر من شيء عنّاني..
دام العلا راح يمّ ناس نصّابه,,
شيّبت من هول ماشافت أعياني..
وشفت الكفو يشتكي من جور ماصابه,,
أنهدّ طموحي بردى والله ينعاني..
في دبلوم حاسب والله مافرحنا به,,
قالوا طبوعك خطأ والقول أضناني..
وش الصحيح ياعرب هاتوه ونبدأ به,,
دام الوزير فاجر(ن) ولا علماني..
مانقلطه مجلس(ن) ولا أعترفنا به,,
سمّ الكلام الذي جرّحني وأشقاني..
هذا البلا ياعرب وهذي أسبابه,,
عبّر لهم ياقلم دام العمر فاني..
مايبقى غير الشعر لاكثروا طلابه,,
بأحلى بيوت الشعر عزفت الحاني..
على عودي القديم إللي طربنا به,,
خذيت من الشعر ريش(ن) وجنحاني..
وطرت وهذا الهوى قمت أتسلى به,,
سلّم على من قضى دنياه وحداني..
سهم الهوى زلّ عن قلبه وماصابه,,
سلّم وسلّم على مكحول الأعياني..
ناعم العود إللي الحلا تحلى به,,
عشقت واحد ولاني عاشق(ن) ثاني..
القلب واحد وخلّي حارس(ن) بابه,,,
وسلامتكم جميع....
20-07-2006, 08:21 PM
تعليمات المشاركة
العرض الشجري