رد: وداعية للشاعر صالح الزرقان
القصيده كاملــــــــــــــــــــه
ودعتك الله يادار جفيتيني
دار سموم العقارب في هبايبها
يادار وين الذرى بك مايدفيني
حتى الشجر مايظلل من لهايبها
عز الله أني كرهتك لو تحبيني
والحر ما يخدعه زينة حواجبها
أعز نفسي عن اللي مايدانيني
وارفع مقامي عن الهفوات واشذبها
على دروب الهدى ياالله تهديني
وأهل الشيم ياالله انك ماتخيبها
ياهاجسي الكايدة ماهي تعنيني
نفسي تبي العز والعليا مطالبها
مرة تصيب الهدف وأمرار تخطيني
مايعلم الغيب كون اللي يراقبها
منك العوض ياآلهي وانت محييني
لاخاب ظن الفتى باقرب قرايبها
ترى الجمايل لها ناس محبيني
وماكل رجل تعلى في مراقبها
والله ماأداني الردى والفسل والشيني
والنفس ماتقبل اللي مايليق بها
دار بها الحقد والله ماتسليني
ولاني بندمان لافارقت صاحبها
اندم على فقد غالي كان يشفيني
اللي يشيل الحمول ولا يذيع بها
دنيا ردية تقلب بالموازيني
ولابد ماتكشف الدنيا غرايبها
امشي مع اللي على العليا يقديني
وقدر الرجاجيل عند اللي مجربها
ويادار ودعتك الله لو هجرتيني
يامسقط الرأس ياأغلى حبايبها
ويادار ما جفاك لو أنك جفيتيني
غصب عليّ حب ربعي في نوايبها
التعديل الأخير تم بواسطة وليد سعد ; 23-10-2012 الساعة 12:06 PM