[poem=font="simplified arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="1,black""]
البارحه ما امسيت والعالم رقود=وجفنٍ جفاه النوم وعزتاله

قمت اجتلد كني على شوك وحيود=وافكر بوقتٍ علينا مياله

وعبار عيني يا ملا قامت تزود=واشكي على اللي كل حيٍ شكاله

لا شاكيٍ نقص ولا شاكي زود=اشكي من مفارق رجال الشكاله

ماهي بفرقا شهر واسبوع ويعود=فرقا الدهر كله وغيبة هلاله

اشين خبر جاني خبر موتة حمود=شيخ الشيوخ إللي كسب كل طاله

والحزن خيَّم فالصدر ماله حدود=واضفى على نجد بطوارف ظلاله

خسارةِ كبرى على الورع والعود=يارب تغفر له وتلطف بحاله

جونا القبايل فالعزا افراد وحشود=من حد حايل لي الجنوب وتباله

ركنٍ من اركان اقحطانٍ هل الجود=واليوم طاح وراح واقفت رحاله

وبيني وبينه رفقه وبلسم كبود=ولا ابطيت ما جيته يجيني اتصاله

وإليا حضر معروف وان غاب مفقود=وكلٍ يقول ونعم لا جا مجاله

كم دق للضيفان من زور مفرود=وكم ساق من دون قحطانٍ حلاله

كريم سبلا باذلٍ كل مجهود=ومنحراتٍ للطراقي دلاله

والسور نطلان الخشب فيه مرجود=سمرٍ يجيبه من عوالي جباله

عوق الخصيم وللربع ريف وسعود=ويضحك حجاجه والثقيل ارتكاله

بيته بعطران الاشانيب مريود=قصرٍ كبير ما تسكر قفاله

يالله يا لمعبود يا مذري النود=تجعل عوضنا فالجهيمي عياله

أشوف عقبه باقيٍ جملة فهود=وأن غاب نجم بان نجمٍ بداله

والظن في راشد وحنا له عضود=عسا يحفظ شداد رعى الجماله

نسعى وراء الدنيا محادير وسنود=ومن وصله الدَّيان عجلٍ زواله

يا ابن آدمٍ لا تحسب الحبل ممدود=ترى الجمل لا بد يثنى عقاله

ولا بد من قبر من الطين ملحود=والرابح اللي طيَّب الله فاله [/poem]