معروفك ابمن لا يصونه ويزهاه
همي ليا فارق محله وخلاه
خذاله ايام"وعود محله
ماهو لحاله ..معه غيره..ومسواه
جروح"اتزود على الطين بله
حطت علي امن العنا والمعاناه
مايفرح اصحاب القلوب المغله
اداري اظروف الليالي مداراه
ولااحد"نشدني قلت خلها على الله
ماودي ابكشف الامور المغطاه
لجل خصوصياتي المستقله
الين يقصاني الشعر واتقصاه
كن العنا في خاطري فرصة" له
وانا ليا صغت البيوت المقفاه
اطرق لحنها من شعور وجبله
العاقل اللي يحفظ ادروس دنياه
ولا مره الدرس الجديد استغله
يهوم للعليا ولا يقصر اخطاه
واذا جهل دور دليل"يدله
يخاوي اللي يستحق المخاواه
ماهو يعاين كثر ماله وقله
والجاهل اللي مايحايد عن ارياه
ويشوفها فوق النجوم المطله
ماكنه الا مثل من داه فرداه
عليل"ومايدري ان فيه عله
ومن قال معروفك مع الوقت تلقاه
لعله ايراجع كلامه لعله
على حسب ماقد سمعنا وشفناه
كم واحد"مالقيه العمر كله
فمعروفك ابمن لا يصونه ويزهاه
والله ماتلحق منه فنجال دله