انا عليك أشفق من أمك معَ ابوك
وانا لك اقرب من تلامس لاصابع


اطرح كفوفي لاجل مايلمسك شوك
يلّي فؤادي لك هجوس ومرابع


اشريك لامن اقرب الناس باعوك
واذوق حبك بس ماني بشابع


لاسمعت اذني طاري اسمك ونادوك
يبيني في وجهي خيالك واتابع


أستلهمك فكره من الشعر محبوك
عليك جزلات القصايد ترابع


ايدي بجيبي دايمٍ تظهر البوك
لك صورةٍ في داخله صف رابع


وليا سمعت انهم على شيء بكوك
ارضيك واجيبه ودمعي تتابع


يومك صغيّر سن ماكان ينهوك
براءة الاطفال والود طابع


واليوم طال البعد وان جيت خبّوك
ماعاد اشوفك صار ذا الحول سابع


في حضرتك مالك ولي غبت مملوك
زلزال حبك صايرٍ له توابع


اينع خضار القلب والقلب متروك
ثارت عليه العاصفه والزوابع


كثير بعدي مايلامون حبوك
يلّي غلاك من المعاليق نابع


باب الوصل من بينّا صار مصكوك
ياليتنا نرجع صفوف الروابع

الشاعر : مـحـمــود ال مخلص