من جديدي يالغلاه
صلو على محمد
من هاجس يتعب على نظم الابيات
يصخر بيوت الشعر بيت ورى بيت
اخذ معى الهاجوس والشعر سجات
خوي روحي كلما اقبلت واقفيت
حزات ياتيني وانا اجيه حزات
بيني وبينه عهد يوفي وانا اوفيت
يقوله اللي يسهر الليل مابات
مابات ليله بين هم وتناهيت
ماعاد له في الارض روحه وجيات
ياليت يرجع ماضي الوقت ياليت
وقت مضى يوم الفرح والوناسات
لادق جوالي من النوم فزيت
على النقا واسوقها كيف ماجات
مع النشاما كل ماصبحت وامسيت
سويت لي معى النشاما علاقات
وفي راس مرقاب الرجاجيل عديت
وان جاء لزومي لي معاني ووقفات
ماني ليا جاء واجبي عنه صديت
يصد عني كل حاسد وشمات
ويفرح بي المطلق لي جيته ومريت
واليوم زارتني المقادير عجلات
وانا ماعندي للمقادير توقيت
مرت ثلاثه شهور ساعه وساعات
وانا مريض لا بحي ولا ميت
خذيت لي منها دروس وعلامات
وحسبتها لي فايده لو تاذيت
خلتني اعرف صادق الناس بالذات
اللي زياراته تكرر ليا ابطيت
اللي عوايده الوفا والجمالات
اللي تعنالي وانا له تعنيت
وخلتني اعرف ناس كذب ودعايات
ياكثر مافيها من الطيب سويت
هديت في عيني قصور وعمارات
ونسيت عن ذيك المباني وقفيت
هاذا رصيدي بعد كشف الحسابات
بالمختصر ابديت لي شي واخفيت