ــــــــــ لولا الحيا ــــــــــــــ

جريّت انا ويلاه من غربتي آه
ولولا الحيا والله لا اشق جيبي

والله لولا قولة الناس وش جاه
ومن قبل ذا خوف العليم الرقيبي

وعهدٍ لواني به على كيف مشهاه
لاصيح باعلى الصوت هاتو طبيبي

هاتو ضما قلبي و طبّه و بلواه
لولاه ماني ياعرب .. مستصيبي

ولولاه ماذقت البلا من سواياه
وابلا بلاي انه بعيدٍ .. قريبي

ياكيف ماوده واحبه وأهواه
ولااحدٍ سواه من الخلايق حبيبي

في كل شيٍ .. . أذكره واتمناه
في طلعة القمرا .. وشمس المغيبي

واذكره واحنّ لغناويه وحكاه
لاواعذابي صار شوفه صعيبي

خلي شّذَبْ قلبي ببعده وهذّاه
هذّاه.. وخلاني جريح عطيبي

وآجذّ.آهاتي من الروح جذّاه
جذّت عروق السدر بيد القطيبي

واذكره لاهبّ الهوى من نحاياه
واذكره لامن مال غصنٍ رطيبي

ولاسال سد العلّبْ ثم اعتلا ماه
اذكر وليفٍ..لي..لطيفٍ..لبيبي

فلبيه ياحبٍ قديمٍ هويناه
ولبيه ياغروٍ..صغيرٍ..أديبي

مهما يطول الوقت واقف وبتناه
وماظن فيه إن الهقاوي تخيبي

جرحٍ نحته الحب ياويش يمحاه
شيٍ يطيب وشي لاما يطيبي

ولاقلت اناويلاه من غربتي آه
خلي وطن.. والحب وسطه غريبي

ــــــــــــ عبدالله آل شداد ـــــــــ

__________________
عَبْدِالْلَّه بْن مُحَمَّد بْن فَلَاح بْن شَدَّاد