في مجلس حفيظ شيخ(ن) شاعت أخباره
زار الشاعرعزبة الشيخ حفيظ بن عجب آل حفيظ ولم يجده ولا وجد أحدا من أخوانه فلما اراد الذهاب منعه المقهوي راضي وأصر عليه بالبقاء وقام بكامل واجبه ووجبات الضيافه فأعجبه فعل مقهوي الشيخ في غيابه
فأنشد هذه القصيده
يا راضي الكيف من يمناك نختاره**** لا طاب شرواك طيبه من معازيبه
في مجلس(ن) فيه غالي البن وابهاره**** الضيف والجار يا راضي تهلي به
في مجلس حفيظ شيخ(ن) شاعت أخباره**** لا قالوا الناس ولد افلان يا طيبه
الطيب ساسه وميراده ومصداره**** حر(ن) تبين عطيبات(ن) مضاريبه
شبره ورى كل شبر(ن) طالت اشباره**** مناهج الطيب دايم من مكاسيبه
كسب الجميله وعز النفس له شاره**** شي(ن) حقيقي وكل الناس تدري به
على طويل المعالي مشعل(ن) ناره**** مشراف رووس المعالي من مطاليبه
بابه مشرع لضيفانه مع جاره**** واللي صواديف بقعا جات تومي به
من دون ربعه اجبال اطويق واحجاره**** عد(ن) غزير(ن) وصافية(ن) مشاريبه
يشيل عنهم حمل زومان واقشاره**** لو زود الحمل لبليهان يقفي به
تنفق يمينه وهي ما تدري ايساره**** على الفضيله مدرهمة(ن) مناديبه
لا يا سلايل عجب يوم أشهب الغاره**** فعل(ن) ينومس وكل الناس تدري به
يوم اكثر الناس والاجواد محتاره**** في فرعة العرق يوم(ن) عاوي(ن) ذيبه
ناطح جموع(ن) على العدوان صباره**** من بينها بيرق الفتنه تماري به
طق المزين وطوع كل جباره**** في موقف(ن) يخلف الرجال ويريبه
يالله عسى جنة الفردوس هي داره**** عساه في الجنه ايحصل مطاليبه
شعر شايع بن مسلم الدوسري

__________________
غنيت ما قصدي طرب في حياتي لاشك من دورات الايام غنيت
يالله ياللي تعلم الخافيـــــــــاتي انك تمشـيها على ما تمنيت