ماني على جرح الزمان اتحداك ....( جديده للشاعر ابو خالد رحيل الشمري
صبحكم / مسساكم الله بالخير
قصيده جديده للشاعر الغالي ابو خالد / الشاعر رحيل الوهبي الشمري
ماني على جرح الزمان اتحداك
القصيده :
ماني على جرح الزمان اتحداك
حتى ولو تخطي تراك انت معذور
وش فيه اكبر من خفوقي اذا جاك
ويقول لاهانت يمينك ومشكور
الجرح موطن ضيق بستانه اشواك
ثلثين شعبه مابهم حس وشعور
من دون تبرير المشاعر بالادراك
موطن يعيشه ناس من دون جمهور
قلوب ناس تعيش بك بس من ماك
وان قلت ابي حاجه يضجون بالدور
عنوانهم " عطني فقط " مابهم هاك
واحساسهم ناقص ولو مابه قصور
يا أغلى عتب ماأكرهك لكن ماابغاك
ولو كنت أعزك موت ماكنت مجبور
جيتك وفى مديت لي كف يسراك
جيتك عطى حسيتك انسان مغرور
قلت أحترم شخصيتك قبل مبداك
واثري لقيتك بالمتاهات محصور
واجهتك بطيبي عشان أقدر القاك
شفتك تصد احيان وتلف وتدور
هنا تحملتك قبل لقدر انساك
مابي تضيع ايام وسنين وشهور
مع ان ماأذكر يوم عشته بلولاك
لكن بسيطه ياخفوقي وماجور
ادري واعرفك زين وافهمك وادراك
واجاملك واغليك واعرفك ماتجور
لكن تعبت وطحت من كف يمناك
واليوم لازم تاخذ الموقفك شور
يا امّا تحد أخطاك من جملة أخطاك
وتقصّر الخطوه ولا تصير مطيور
والّا تموت بلذة مواجه اعداك
وبوجيههم تضحك وداخلك مكسور
وتشوف وش سوى حبيبك وخلاك
بالضيقه اللي حارت بفجة النور
منها تحداني يا لو ماتحداك
ومنها على كيفك ترى الجرح مستور
اهم شيء أتـّعرف لاجيت ابنساك
حطـ(ن) مكانك يوم وتقول معذور
للشاعر القرم / رحيل الوهبي الشمري
اسم القصيده (الجرح موطن ضيق )