اللي عنده شغل ياليت ما يدخل ..
السلام عليكم
قبل ان نبدأ بموضوعنا سأهمس لكم بهمسه
( اللي عنده شغل ياليت يطلع برا الموضوع لاني والله ماعندي ماعند جدتي )
واللي فاضي ولا عنده شغل نقوله وشوله فاضي ليه ماعندك شي تستفيد منه
انتم ماتعرفون ان الفضاوة تولد الجرائم
يعني تخيل ان اهلك سافروا للجنوب هم وخوالك وانسباك كلهم
وخلوك في البيت لحالك ومابقى في الرياض الا انت
شي طبيعي بتعيش في ملل لايطاق
يعني اول يوم بيمر على خير ...
ثاني يوم يمكن بعد يمر على خير ....
لكن صدقني ثالث يوم بترتكب جريمه
يعني تخيل انك جالس في البيت لحالك لاشغل ولامشغله والساعه وحده بالليل
صدقني من زود الطفش بتروح تشوف تفحيط حتى لو كنت مانت براعي تفحيط
واذا رحت تشوف تفحيط بتجلس تحط يدك على خدك وتشوف ويمكن تجلس فوق تندة السياره متربع وتشوف ويمكن تكون
متركي على كبوت السياره وتشوف ... يعني اهم شي انك تشوف
واذا جلست تشوف بتطب عليكم الدورية واذا طبت عليكم الدوريه
يمكن تمسك واذا مسكتك راح تصفقك وتمحطك على ظهرك بالقايش ( حزام رجل الامن )
ويودونك للقسم واذا ودوك للقسم بيحطونك بالتوقيف لمدة أربع وعشرين ساعه
واذا دخلت التوقيف راح تتعرف هناك على أصدقاء سوء ويمكن يخربونك
واذا خربوك بتتواعد انت وياهم في استراحتهم وانت ماراح تقول لا .. لانك فاضي وماعندك شغل
وبعدين بتروح انت وياهم للاستراحه
واذا رحت للاستراحه يمكن يكون فيه شراب عندهم واذا شربت يمكن تسكر
واذا سكرت يمكن يعطونك حشيش واذا حششت يمكن تسطل
واذا سطلت يمكن يعطونك ابرة هروين واذا اخذت ابرة الهروين بتصير مدمن مخدرات
ونصيحه مني بعد ماسمعتوا هالقصه
( لاتخلون اهلكم يسافرون ويخلونكم في البيت لحالكم لانه بصراحه يمكن تصير مدمن مخدرات والعياذ بالله )
!
!
!
!
ماقلت لكم اللي عنده شغل يتوكل على الله
المهم خلونا ندحدر لموضوعنا ونبدأ
الهياط
كثير مننا قد سمع عن مصطلح بأسم ( هياط .... مهايطي .... مهايط .... مهايطيات .... يهايط .... يهايطون )
لكن ياترا ماهو الهياط فبعض الناس قالوا انه مرض والبعض قال انه فن والبعض قال انه علم
والبعض جمع بينهم وقال انه في بداية الامر يكون مرضاً ثم بعد مدة يصبح فناً لدى الشخص وبعد ذلك يكون علماً
في لغة العرب : انها بالاصل مأخذوه من كلمة ..تهور
وتعريفها اصطلاحاً : هو فعل شيء مخالفاً للامور الطبيعية بقصد التميلح وجذب الانتباه
اما عالم النحو ابن عقيل فلقد قال في شرحه لالفية ابن مالك ان الهياط ينقسم لنوعين هما :
1- هياط قولي
2- هياط فعلي
فلقد شرح ابن عقيل في كتابه هذا النوعان ونبدأ بأولها
الهياط القولي
فعرفها لنا بأنها : هو مدح النفس بشيء لم يحدث او ادعاء ملكية شي ليست له او التكلف بامر ليس هو بقده
كأن يقول انا لدي لكزس 460 وهو شخص منتف ليس معه الا كامري لموزين
ويكثر هذا النوع عند النساء والبرزان من سن الثامنه حتى بلوغ سن الثامنة عشر
كان يقول بزر صغير أبوي اقوى من أبوك
أو قول فتاة في سن السابعة عشر لاخويتها اننا سافرنا لفرنسا وهم بالحقيقه لم يتعدوا طريق خريص
فهذا والله انه لهياط قولي
النوع الثاني من الهياط وهو الهياط الفعلي او العملي
وتعريف الهياط العملي او الفعلي هو : هو المجازفة والمخاطرة بشيء لايتقبله العقل بقصد التميلح امام الاخرين
فالهياط الفعلي او العملي هو أشد خطورة من الهياط القولي لما له نتائج قد يتظرر منها الجسم
كأن يقول شخص لصديقه أتتحداني ان اتسلق هذه النخلة الطويلة ....
فيرد عليه زميله : نعم نعم ... إنني اتحداك ان تتسلقها
فيقوم هذا الشخص المهايطي بتسلق النخله وهو في منتصف هذه النخله الطويلة يسقط على ظهره مما يضطر زميل هذا
المهايطي ان يحمله للمستشفى
فيتسبب لنفسه اما بكسر بالقدم او بكسر بالظهر مما يصيبه بالشلل والعياذ بالله
فإن لهذا النوع لهو خطير
ملطوش من البريد