لاهنت
يامعيض على هذا الجهد
لأخراج هذه المناسبة
ولكنك ما طلعت صورنا في الطيارة
قام اميرنا يتحكم بنا وربطنا على الكراسي
وقال ما احد يقوم الا بإذني
وحتى الاكل والشرب منعنا منه
يقول عشان ما احد يروح للحمام
ويضيع وانا المسؤل عنه
حتى ان ابورعد بغى يموت من الظما
لأنه مفطر بورستد مالح
المهم
اني اختلعت من شيفت ابوعصام
ياولد عليه شنبات ربطنا فيها ابوسعد
عشان ما نضيع في اليابان
وحشرونا في ذا السيارة المتقرفصه
حتى ان منصور وابوريان
ما لقينا لهم مكان الا في الشنطة
لكنا اللي وسع صدورنا
بيت ابوعصام
في جنة خضراء من جنات الارض
لكن منعنا ابوسعد
لانمشي فوقه
يقول تعدمون الزرع
عاقبنا ذالامير
المهم اني اكتشفت ان ابوريان
هرب بعد وصولنا يتمشى في الخضار
ويحش لغنمه في السعودية
وكنا متوقعين ان ابوسعد
يمنعنا من ابوعصام ويحلف منه
واثره يبي يخسره
وطلع ابوعصام مصيبة
جاب لنا من الماعز الجبلي ( ولكنها بدون رجلين روس بصدر )
المهم
رحنا نتعشا على الشلال
واختلس ابورعد الفرصة
وخذا له جغمه من الماء
والا حنا ما شربنا الا في السعودية
بأمر الامير ابوسعد
وقررنا نتشمى شوي
في الغابه
واركبت في راس تركي يركب فيل
وتعونا كلنا وركبنا
ويوم ركب
قام يجاغر يقول نزلوني
المهم نزلناه
وطاح الى ابوريان
وافغصه
وبعدين مشينا ولقينا بيض قرد
وطبعاً اول مره اشوف بيض قرد
اثر قرود اليابان تبيض
ويلقطها ابورعد
ويفكشها على الكريك
ويأكلها هو والامير
وبعد ذلك نزلنا نتمشى للمدينة
الا وذاك الورع الياباني
منزل دبابة عند محل
ويقوم منصور ويلقطه
ويسوقه ويلعب فيه
وشوي وعينك ما تشوف الا النور
طلع ذالورع وقام يحوس به الارض حوس
ينقز من قدام وراه ومن وراه قدامه
ومنين تنس
تلكيم بقوس
فقرر ابورعد يتدخل وليته ما تدخل
جاه ما جاء رفيقه
اما انا سويت عمري منصرع
خفت يجني
وقلت اكيد بيرحمني
وبيقول الضرب في الميت حرام
طلع هو ابن حرام
ضربني وضرب باقي الشباب
اللي طبعاً قلدوني
حتى اميرنا امحق امير
هذا الموقف بس اللي كان فيه ساكت
المهم والله ذالورع قامت يتعفس فينا
ما فكنا الا ولد ابوعصام
طلع ابوه منحاش للبيت
ودرى عصام وجانا
ولاقصر قام بالواجب
وسحب البطاريه
اثر الولد
طفل ريموت ياباني
وحنا مهبل ما ندري بشي
المهم انا رحنا ملعب الكرة اللي بالعصى تضربها
وحطوني حارس ورى اللي يضرب
ولكنهم لبسوني لبس ضيق مره
ولا امداني اكوكي زيهم
الا واسمع
طططططططططرررررررررررررر
وقعدت اضحك احسبه على اللي قدامي ابورعد
وتفاجئك الجمهور قام يضحك بقوة
قلت معقول سمعو ذالصوت من رفيقي
ابورعد
اثره انشق سروالي !!!!
والله الاحراج
ومن الطفش والزعل فسخته وطلعت من الملعب
ورجعنا
وكالعادة فشلنا ابورعد
يسوي تمارينه المعتادة
ولكنه لون نفسه بالاخضر عشان يتهرب من الامير النشبه
اللي حاكمنا حكم هتلر
لدرجة انه من شدت تسلطه
هرب تركي وداج في المدينه
وكلى كنتاكي مع جح وببسي
وانصرع ولا لقيناه الا اليوم الثاني
وترى يوم قام
حلف ما يمشي معنا الا يكمل على الجحه
وطبعاً امحق يوم علينا يوم رحنا نسبح
هجمت علينا تماسيح نحسبها في بدايةالامر
كمرة خفيه
ولكنها بلعت ابوريان
وكنه عصفور
واما واحد من التماسيح
حلف ما عاد يأكل بشرب
حيت اصيب بالتطريش
وطبعاً اول مره اشوف تمساح يطرش
اثره زرط منصور
وجاه تسمم وطرشه على طول
والتمساح الثاني اكل تركي
ونشب في حلقه
ولا انقذ التمساح الا من تركي الا حماية التماسيح
طلعوه من حلقه واخذو التمساح للعلاج
حيث اعدم سنونه وكسر لحيه
واما ابورعد قام يطرد له تمساح يبي يأكله هو
والتمساح منحاش منه
ولا فكه لين كلاه مشوي على الفحم
يعني ما خسرنا الا ابوريان
وفي النهاية ما قصر ابوعصام
اعتذر عن التيوس الاول اللي بدون رجلين
وجاب بدلها ذالخروفه المدلعه
وركبوها في محل ابوريان
وعلى تذكرته
وطبعاً من جنب منصور
اللي طول الرحلة وهو ويها
ما نيب قايل ..................
وعند الوصول لقينا ابوريان في كرتون
مع العفش سالم وطيب
وسألنا كيف ذا صار
قال التمساح اللي بلعني كان اثرم
كبو علي ديزل واسحبوني منه
وجيت الحق عليكم عشان اركب مكاني قالوا
انت راكب معهم فوق
قلت كيف قالو هذا اللي صار
قالو اذا بتلحق الطيارة ركبناك في ذالكرتون
على انك ثلاجة
فوافق بسرعه وبدون تردد
هذه خفايا الرحلة

__________________
خيلا الشدقاء ابن عياف

كم هي جميلة شبكتنا .. وكم هي كبيره بكم
فشبكة قحطان بكم ولكم
فلننهض بها
بصدق وأمانه
وبلا تذمر


قحطان في شبكة قحطان

((يداً بيد ))

(( قلباً بقلب ))

(( لترتقي شبكتنا وتتطور ))