ياسوق الاسهم ليش حـرب الابـاده
ساويت خلق آلَله صاحـي ومجنـون
وخليت عرضـك للمخاليـق عـاده
نـاس يزكونـك ونـاس يـذمـون
ماذكـر مـن خيـرك رفابـه وزاده
جميع مـن طبـوا بسوقـك يعانـون
وكل ن صرفته عن هـواه ومـراده
حتى الضعيف اللي مسيره على شوون
ميت وعينـه مثـل عيـن الجـراده
يرقب هواميـر الربـا وش يسـوون
ياللـي تعبـدون الدراهـم اعـبـاده
الله علم فـي الآخـره وش تلاقـون
لاصار ربـي ماكتـب لـي سعـاده
وش عاد لو مالي مثل مـال قـارون
بالعكـس يمكنـه يـزيـد النـكـاده
ويهدني واصير مـن دون فـي دون
وياللـي ورا الدنيـا تريـد الزيـاده
ماسرت النمـرود قبلـك و فرعـون
اللـي لهـم فيهـا نفـود وريــاده
راحوا وكنهـم فوقهـا لـم يكونـون
واحد من الباعـوض وصلـه نفـاده
وواحد هلك مع درب موسى وهارون
وان كان تبغى العلـم هـاك الافـاده
لاصـرت متريـح ولانـي امفتـون
وفيني القناعـه والـوَرَعَ والزهـاده
ومتعافي وساترنـي امكـون الكـون
فوالله لو اسكن تحـت عـود الكـداده
في خاطري تسوى ثمانيـن مليـون