السلام عليكم ورحمة الله وبركاته


أخي الكريم :


بالفعل هذا صحيح...


وأكثر من يقومون بهذا هم أهل النظيم من الذين لا يحملون أي أوراق إقامة نظامية

وهم من البدون الذين ليس لديهم جنسية .. بس الحل وأنا خوك ..


فيه مسدسات أقلام .. أكيد معروفة .. يعني مسدس على شكل قلم .. وكشخة بعد

وإذا مايمديها .. فيه .. الربع العدني .. خفيف وحبيب .. الرجل يجب أن يكون معه سلاحه


وأنا ما أقول كذا من باب المهايطة .. أعوذ بالله أن أكون من الجاهلين..


ولكن لأن أحد الأصدقاء تعرض أخوه الأصغر لموقف مؤسف .. في حي النهضة


الرجال طالع يجيب عشاء .. الساعة 12 وبمجرد أخذ اللفة .. طلع له سيارة


ووقف الرجال غصب .. لأن مافيه مجال .. سدّوا الطريق عليه ونزل ثلاثة من السيارة


وحاولوا إنزاله من السيارة فقاومهم .. فما كان من أحدهم إلا أن طلع السكين وذكّا الرجال


يعني تقول يذبح خروف .. وطاح الرجال وخذوا الموتر وهربوا .. ومن حسن الحظ أن أحد


الأجواد كان يمر بالصدفة .. وشاف الرجال طايح وسط بركة من الدماء .. وشاله إلى المستشفى


وستر رب العزة والجلال .. له الحمد والشكر .. وتم علاجه .. بس الرجال تقطعت عنده الأوتار الصوتية


وصار مايتكلم .. وبعد علاج طويل .. عاد له النطق .. ولكن بصوت مختلف نوعا ً ما ..


كل السالفة صارت في أقل من دقيقتين .. يعني فجأة .. والمجرمين ناوين القتل


لأنهم وكما عرفنا بعدين مطلوبين للدولة .. وفي نفس الليلة قبل سالفة خوينا ..


طبّوا على مصري في صيدلية .. وقاموا بطعنه بعدة طعنات حتى فارق الحياة ..


وخذوا الدراهم .. وبعدها .. قاموا بالإعتداء على صاحب سيارة وطعنوه وخذوا

موتره .. وبعد ماإنشبه الموتر .. طبوا في خوينا ..


عشان كذا أنا أخذت صورة من ملف القضية .. وشريت لي طال عمرك ذاك القلم اللي


يحبه قلبك .. ومشخص به ووالله إنه عندي أحسن من خمسة بودي قاردز..


وإذا وقفتني الحكومة طال عمرك عطيتهم نسخة من ملف القضية .. والله يبطي بيوم الشر


صحيح إن الإحتياطات اللي ذكرتها في موضوعك طيبة .. لكن ماهوب دايم .. وما دون الحلق


إلا الإيدين .. والأوتار الصوتية مهمة ولا نستغني عنها .. خصوصا الشعار ومثلك عارف.


عذرا على الإطالة .. ولكن لمزيد من التأكيد على أهمية هذا الموضوع لأجل التنبيه للإخوة.


ودمت والجميع بستر وعافية وخير.