ولا الضالين

موقف ما راح انساه كنت داخل مسجد وقت المغرب ومتأخر والامام يقرا في سورة بعد ما خلص من الفاتحة وكان الميكرفون متعطل المهم دخلت متحمس وبالحق على الصلاة معهم الا وعلى دخلتي اسمع الامام يقول (ضالين) وانا على دخلتي كبرت وقلت آمين .. الا واللي في الصف الاخير ماتوا من الضحك وقطعوا صلاتهم .. وانا احسب الامام في الفاتحه وهو يقرا سورة ثانية .. وسكت الامام شوي وكأن وده يضحك .. واناما علي قاصر ضحكت معهم المضحك اني كنت متحمس

معرس بألف شوكة وشوكة

واحد تزوج على زوجته ( ومن الحرة اللي فيها )... جت في ليلة عرسه خذت ثيابه اللي بيلبسها ومسحت عليها قشر" برشوم " والبرشوم فاكهة لها اشواك رهيبة وماتنشاف

الشغالـة

اتصلوا علينا المطار قالوا ترى شغالتكم وصلت .. وعلى شان نفتك من تفويض استلام رحت بنفسي أخذ الشغالة ... المهم وصلت المطار وخذت الشغالة بطبيعة الحال معها شنطه فيها ملابسها .. استلمت الشغاله وطلعنا للسيارة فتحت شنطة السيارة على شان تحط شنطتها .. تفاجأت ... أن الشغاله مدت رجلها بتركب في الشنطه قدام العالم .. وانا ما مسكت نفسي ما قلت لها لا قعدت اضحك وما مسكت نفسي وقمت أشر لها على شان تنزل والعالم تضحك .. المهم في الاخير نزلت من الشنطه .. بس بعد ما كل الموجودين جاهم مسيل الدمووع من الضحك ..

وش اللي صار

فيه وحده من القديم تستحي مرة مرة .. ولما تزوجت كانت تستحي حتى تتكلم مع زوجها .. وكانوا الحريم يلومونها على هالحياء الزايد ويقولون لها لازم تحكين مع زوجك و تمزحين معه تدفينه بيدك مثلاً .. وصممت هالمرأة على كسر هالحاجز من الحياء الزايد ... ومرة من المرات هي وزوجها بالسطح يوم جاء الزوج بينزل مع الدرج ألا وهي تسرع وتدفه (تدفعه) وهي تبسم .. تدحرج المسكين وترن ترن مع هالدرج الى ان وصل آخر درجة وهو بعد ما استوعب وش اللي صــــــار …

الدش

واحد من الاطفال سمع كثير عن الدش ومخاطرة .. وانه فاسد وحرام .. وكان عند احد معارفهم (دش) وهالطفل ما يعرف وش هو بالضبط .. فقال : ال فلان عندهم دش اللي يغسل منه يصير كافر ..

خطـوبة

خطب احد الأشخاص أخت صديقــه وأراد من صديقه أن يمكنه من رؤيتها - دون أن تشعر الفتاة - وقام الأخ وضبط الموقف حيث اشترى بعض الأغراض وأدخل السيارة في الفناء الداخلي للمنزل ونادى أخــته لحمل الأغراض من السيارة - والخاطب يبصبص من شباك المجلس - وجاءت البنت وحملت كرتون البيبسي وقامت تركض و تدوربالكرتون و( تفحط ) كأنها تقود سيارة !!!!!! ولم تعلم البنت الأ في ليلة الزواج حين اخبرها الزوج فما كان منها الا ان بكت من شدة الخجل ...
باص البنات

هذا واحد ما ودي اقول اسم الشهرة حقه طبعا عندنا ... هذا مسوي مغزلجي كتب له رقم في ورقه كبيره على شان يكون رقمه واضح عند البنات مر من جنبه باص زجاجه مظلل شوي ومليان .. قال بس هو اللي انا ابغى طلع الرقم من الدرج وصار يشر للي في الباص وهم يطالعون وش عنده ومره يجي من يمين الباص ومره شمال وقف عند الاشارة قال فرصتي ويفتح الشباك حق السيارة على شان يكون رقمه اوضح فجأه انفتح شباك الباص اللي من جهته ... انبسط صاحبنا .. واكتمل فتح الشباك الا وصاحبنا يفتح عيونه زين الا صار باص عمال .. ويلملم قطع الغيار اللي طاحت من وجهه وياخذ يمين ..... وبس

من شب على شيء

فتاة قد تعودت هي وأخوتها إذا مـر أحدهم بجانب الثاني مـد رجله ليسقطه على الأرض .. فلما تزوجت وفي -الأسبوع الأول - من الزواج وحين نهض الزوج من وجبة الغداء لغسل يديه مــدت الفتاة رجلها - كالعادة - فسقط الزوج وكسرت ذراعــه واما الفتاة من شدة خجلـها من الموقف ذهبت لأهلهـا !!!!!

الإيرباص

إحدى النساء ركبت الطائرة لأول مرة ، وكان مقعدها بجانب النافذة ، وبعد فترة طويلة من الركوب ، سألت زوجها : متى ستقلع الطائرة ؟ فأجاب متعجباً : لقد أقلعنا منذ نصف ساعة !! فأشارت إلى النافذة وقالت : كيف اقلعنا ؟! أنظر إلى الرصيف الذي بجانبي ! لقد كانت تشير إلى الجناح !!

وحده جاب زوجها تمر وجلس يأكلها واستحت من رجلها تطلع
النواة قدامه .. قامت تبلع فيها وهو يعطيها تمر وهي تبلع (خبله)
وبعدين ودوها المستشفى

وحده جا خطيبها يشوفها وطبعا هي بتموت من الحيا . المهم دخلت
عليه وأبوها كان موجود إلا شويه ودخل خالها وبعدين عمها وبعد
شوي يدخلون إخوانها كلهم وصار المجلس مليان ناس( وطبعا كلهم
عيونهم عليها) ومن يوم شافتهم كان بيغمى عليها . فكرت تطلع.
راحت للباب ولقته مقفل ( مقفلته أمها علشان ما تطلع)
طبعا البنت طاح وجهها خصوصا لما شافت الموجودين في
المجلس وهم يحاولون يكتمون الضحك ( والله فشيله) المهم
ظلت واقفه شوي لما استوعبت انه في باب ثاني راحت تركض
له تبي تطلع وبعد كم خطوه إلا هيلا هوب وتطيح طبعا هذي
اللحظة البنت كان بيغمى عليها من الحيا وبس وصلت للباب
وأخيرا طلعت وهي تسمع ضحكات الشباب في المجلس عليها .

وحده جات بتخطب صديقتها لأخوها . عزمتها في بيتهم وقال
لاخوها طل عليها من النافذة وشفها إذا عجبتك نخطبها لك . وافق
الولد ولما جات البنت قدمت الأخت لصديقتها شكولاته . والبنت معيا
تاخذ وذيك تلزم عليها. والبنت مصره ماتاخذ . ولما طلعت علشان
تسأل أخوها عن رايها في البنت . الأخ شاف البنت وهي تاخذ من
الشكولاته وتخش في شنطتها ولما سألته ،أخته عن رايه قال
موافق على طول . وتم الزواج ،وفي ليلة العرس يسأل
الزوج البنت : وين الشكولاته اللي خذيتيها من بيتنا؟؟ ( ما يرضى
أحد ياخذ من بيتهم شي بدون ما يستأذن .. حمش)

واحد في ليلة عرسه جالس في زاوية وزوجته في زاوية , يكلمها
مستحية وتطالع الأرض .. يذب نكته يستهبل عليها ماش البنت تطالع
في الأرض ومشكلته ولا كأن فيه أحد جالس جنبها .. الرجال من كثر
ما يكلم نفسه وبنت الناس ساكتة قال خلني بسكت وأشوف وش تاليتها معها
.. يعني ثنيناتهم سكتوا .. شوي يوم جو أخويا الزوج وقالوا بنستهبل عليه ..
المهم ويقوم واحد منهم ويآخذ حصاة ويرجمها في النافذة .. عاد تخيلوا
سكوووون وصوت صقعه فجأه .. البنت يوم سمعت الصوت طمرت وضمت
زوجها من الخوف .. الرجال اعجبته الحركه .. ترك حرمته على جنب وطلع
من النافذة وصاح لأخوياه " ثانيه شباب ثانيه " !!


هذا واحد أخوياه ماينلعب معهم .. يوم عرسه مروه ربعه وقالوا يالله
مشينا الحلاق نسمكر وجهك .. يوم ودوه للحلاق ( وكانوا متفقين
مع الحلاق من قبل ) وينقز واحد منهم ويتل راسه ويقول للحلاق يالله
أدهر وأبو الشباب ما عاقت معه وجز راس المعرس .. مووووووووووس ..
المهم أنهم حلقوه موس والمعرس
قفلت معه ولا قدر يسوي شي .. يوم جا العرس طق الطاقية والغترة ومشى
كل شي سليم .. عاد يوم جا في البيت لازم يشيل الغترة موب على طول بتبتل
كذا .. يوم فصخ الغتره وطلعت الصلعة البنت قالت ذا مهبول ولا فيه بلا .. ولا أحد
يحلق مووس يوم زواجه .. اللي زاد الطين بله أن المعرس شاف البنت خايفه
وفاهمه غلط قال خلني بطينها وقعد يخوفها ويقرب راسه يمها كنه بينطحها
ويسوي حركات كنه مهبول .. يوم طلعت الشمس قالت البنت : ودني لأهلي .. ( قالت
في نفسها أبوي ذابني على واحدن مامنه رجا !!) عاد المعرس دق على أبوها وقال
له تعال يوم جا فهمه أن أخوياه سوو كذا وكذا وأنه شافها خايفه قال خلني
أستهبل عليها .. والأبو فهم البنت وعدى هاك اليوم على
خير ..





منقول ماجاني منها شي

__________________