شاعر الأندلس يمتدح قبيلة شمّر في قصيده


قصيده جديده للشاعر ناصر القحطاني-بعنوان شمر- نشرت في احد المجلات - المختلف- وصلتني من احد الاصدقاء عبر الايميل رايت انها تستحق النقل


الشمـس غابـت وكـل دور سراجـه ** والشوق جمر ما احر الشوق لا جمّـر

دام اتجاهـك شمـال مودعـك حاجـه ** سلـّم على حايـل وسلـّم علـى شمّـر

قدامك الخافـق اللـي ينشـد علاجـه ** كنـه معلـّق علـى بـرزان ومسمّـر

وانت تعرف يا بعد حيي مـن تواجـه ** بيضان الافعال لا مـن الزمـن سمّـر

ان ضاقوا اعنف من البحر ومن امواجه ** وان راقوا اركد من الخرمان لا عمّـر

كم صيت بيت عتق في الباب مزلاجـه ** وكم شيخ امـارة قبـل تعينـه مؤمّـر

وكـم حاتمـي تكفـي فلـة حجـاجـه ** وشلون للضيف لو عن ساعـده شمّـر

وان مـر تاريخهـم متلبـس تـاجـه ** كم عاشق كيٍـف وكـم حاسـد زمّـر

في جوٍ اغلى على الرجلي الـى داجـه ** من ديرة السادس ومـن ديـرة معمّـر

كنه الى اهـدي لـه البـراق ثجاجـه ** طلة غريرضحك ومـن الخجـل حمّـر

توارثـوا حرثـه وتمتـيـر ديبـاجـه ** ركابـة الجيـب مـن ركابـة الضمّـر

الود لا غرس بدري صعـب مخراجـه ** والله ولا الـذ واحلـى منـه لا ثمّــر

ادخل على اللي تطوف البيـت حجاجـه ** من ناقص عنـد مـدح الغيـر يتذمّـر

والمدح لو كان في الرديـان للصاجـه ** ويقال (عمر بلـد ) بالعـون ماعمّـر

والذم لـو زاد فـي الطيـب تولاجـه ** لا احرق ولا اغرق ولا عمر ولا دمّـر

مانيب متحسف بشعري علـى حاجـه ** الا انـي اروح ماغنيـت فـي شمّـر