|
من اجمل القصايد الحكمة والنصح
يا الله يا اللي نبتهل لك ونخشاك يا خالق الدنيا ورافع سماها يا واحدٍ ما هي بتحصى عطاياك الخلق كل الخلق محدٍ حصاها الجود من جودك وعطفك وحسناك يا مستجيب الداعيه في دعاها أنت الكريم اللي نخافك وندراك لولاك نفسي ما تحقق مناها أنك تثبتني على غاية ارضاك عبدك ولا غيرك حياتي ولاها سجدت لك يا دايرٍ كل الأفلاك يا غاية الشكوى ويا منتهاها لولاك يا رب السماوات لولاك ما تقبل التوبه على من نواها يا العبد مالك غير ربّك ومولاك كل البشر تفنى ويمحى ذراها اهْو الذي صوّرك سوّاك وأنشاك إعجاز ما وصل البشر مستواها لا تشمت العالم وتنسى خطاياك احكم هوى نفسك وحاسب خطاها حاسب ضميرك قبل لا تدفع خطاك كم من قدم قلب المشقى حفاها عليك بالإحسان والرب يحماك من قدم الحسنات يلقى جزاها شيطان نفسك لا يغرّك ويغواك قبلك غوى ناسٍ وكدّر صفاها من زمرة الطاغوت حذراك حذراك لا تبتلي بجروح يصعب دواها وإلى مشيت اعرف دروبك وممشاك احرص على نفسك وخالف هواها أمّارةٍ بالسوء ما هي بتنهاك اقبض عليها لين يجلى صداها اقطع نواياها بدينك وتقواك هلّل وعند الله سريعٍ شفاها والعين لا تنظر بها من تعدّاك المحصنه لو تلتفت لك وراها اصبر على همّك وغمّك وبلواك عف وتعفف لا يغرّك حلاها واترك حرام القوت ما هو بيملاك كل البطون الجايعه ما ملاها رشفة حلال اتسد جوعك ومضماك تسوى مشاريب الحرام وغثاها النار في جوفك وتصلى حناياك نار الجحيم تزيد للي وطاها واحفظ لسانك لا يجرك ويبلاك اخذ الثمينه لو غلى مشتراها الهرج ميزانك ويكشف خفاياك كلمة تعيبك لا تبيّن نباها صون الكلام وصون نفسك ومبداك للنفس حشمة لا تفصّم عراها اصمت مدامك عارفٍ سير مجراك لا تنقل النّمة وتبحث خفاها يزول قدرك عند أقرب دناياك لو هو ولد عمّك حياتك جفاها واحلم تراه الحلم يرفع مزاياك هو سيّد الأخلاق هو مبتداها وصّى به المبعوث ما هو بيخفاك شفعينا يوم الملاقاة طه خل الجهل لا تجعل الغيظ ياطاك ترى الجهل سم القلوب وعماها وإلى ابتليت ارفع إلى الله شكواك لا بدّها الأيام تكشف غطاها اصبر يزين الحظ ويزين مرماك الله يفرجها ويدفع بلاها لا تمنع المرحوم لا من تنصّاك الناس لأجل الناس وأحسن عطاها ابذل لوجه الله والله يجزاك مثل الغروس اتطيب للي سقاها لا ضاع معروفك ولا ضاع حسناك إن كانها لله تلقى جزاها جارك ولو هو جار تسقيه من ماك عليه لا ترفع يدينك عصاها أحسن جوار الجار لو كان يشناك ترى العرب تحشم كلاب اقصراها بكره يشد ويكتب الله فرقاك عساه يذكر جيرتك ما نساها الظلم شين ويجعل النار مثواك راع الظليمه عيشته ما هناها فوقك إله العرش عالم نواياك ينظر قلوب الناس وش محتواها يسمع بما تجهر وعارف خفاياك بأمره شروق الشمس ترسل ضياها هو عالمٍ غيبك وركّب خلاياك هو خالقٍ فيك العروق ورواها والضيف له حقٍ إلى حل بحماك قلّط ضيوف الله وأكرم لحاها لا تحقر الضيفان واتشح بغذاك من ما عطاك الله قلّط عشاها وعليك باللي حزة الضيق يفداك لا شانت الدنيا ودارت رحاها لا من زهمته لو على الموت لبّاك عيني لجل عينك وروحي فداها ترى الخوي نبراس روحك وملْجاك لا كلّحت بقعا وزادت غثاها حذراك من بعض المخاليق حذراك بعض العرب ما تفرقه من نساها تايه وضايع بين ذولا .. وذولاك فيه الجهالة واصلٍ منتهاها و صح الله لسان الشاعر وسلامتكم |
رد : من اجمل القصايد الحكمة والنصح
الله يعطيك العافيه
|
رد : من اجمل القصايد الحكمة والنصح
لاهنت على النقل يانمر
وياليت نعرف اسم الشاعر اتمنى من المشرفين نقلها للمجلس المخصص عذب الكلام تحياتي للجميع |
| الساعة الآن 07:12 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .
Copyright ©2003 - 2011, www.qahtaan.com