|
ناظرته بعين قويه... فأنظروا ماذا قال فيها (قصيده جميلة)
. السلام عليكم ورحمة الله وبركاته صبحكم / مساكم الله بالخير جايب لكم اليوم يا طويلين الأعمار قصيدة لكن غير وفيها من المعاني الشي الكثير فأتمنى انكم تستمتعون بالموضوع، تقول القصة انه فيه بنت كانت تطالع واحد بعين قويه ، المهم الرجال طلع شاعر وما قصر فيها عطاها كم بيت عشان يأدبها.... لكن المفاجأه هي ؟؟؟؟ اقروا القصيدة وبتعرفون: ــــــــــــــــــــــــــــــــــــــــــــــــــ ـــــ كل شبر بهالوسعيـه ملـك ربـي تعلميـن وأعلم إن اللي خلقني هو خلق لـك هالعيـون لكن انتي من جلستي وانتـي فينـي تحدقيـن كن ما به ناس غيري بهالكراسـي يجلسـون لو سمحتي عاد أسمعي وحتى لو ما تسمحيـن المهـم اللـي بقولـه تسمعينـه و يسمعـون ع الأقل ليا نظرتك سـوي روحـك تستحيـن غضي طرفك مثل غيرك خوف ربعي يلمحون الركادة عاد زينة والحياء فـي البنـت زيـن وفيـك جآزم لا ركـادة ولا حيـاءٍ يـذكـرون تعرفينـي ؟! أعرفـك ؟! ماأذكـر إنــا ملتقـيـن لا أعرفك من تكوني و لا تعرفي مـن أكـون وإطمأني إن كان قصدك بس فينـي تشبهيـن ما هـو أنـا إلي تعرفيـه والبشـر يتشابهـون مـا دريتـي من التشابـه يخلـق الله أربعيـن وأعرف أربع يشبهنك بـس والله يستحـون وإن كان قصدك شي ثاني عاد قولي وش تبين خايف إنا نصير فرجة وإللي ماشتروا يتفرجـون وإذا ببالك عاجبتنـي لا يحوشـك تحلميـن صح ربعي من جمالك فيـك صـار يمدحـون بس وش لي في حلاتك دام فيهـا ترخصيـن حشمة البنـت وحياهـا والكرامـة يلفتـون ولو توفر فيك هـذا مـع حلاتـك تبشريـن ما هو أنا ألف غيري بـاب بيتـك يطرقـون وش علامك رغم كل اللي أقولـه وتسكتيـن مو طبيعي هالسكوت وهالبـرود وهالسكـون إنتـي خرسـا أسألـك ولا منتي تسمعيـن؟؟ قالوا ربعي ذي كفيفـة قلـت لا لا تمزحـون لين شفتك يوم رحتـي يمسكونـك باليديـن ما دريت إلا عيونـي أربـع أربـع يذرفـون آه ياني منه مشهـد يـوم شفتـك ترحليـن جيت اشوف عيون ربعي لقيت الكـل يدمعـون قلت سنّـة هالحيـاة وحـن ترانـا مؤمنيـن الله اللـي مسيّرنّـا بيـن كافـ وبيـن نــون وكل أبونا نختلف مع إننا مـن أصـل طيـن سبحان يلي مصورنا ولله في خلقـه شـؤون يعني حنا كل أبونـا عـاد إسمنـا بنادميـن وليا قضى ربك أمر وقـال لـه كـن فيكـون فينـا يلـي رازقه خيـر رب العالمـيـن وفينا يلي هو لعطفه بحاجة القلـب الحنـون وفينا يلي مـا شكـى مـن علـةٍ كالآخريـن صـمٌ و بكـمٌ وعمـيٌ فـهـم لا يفقـهـون بس قليل عـاد فينـا للنعـم هـم شاكريـن والله يرزق هالخلايق من حيث هم لا يعلمون وتدري عاد يالكفيفة حنا تراى متشابهيـن وإن ماانعمت أبصارنا قلوبنا هـم إللي يعتمـون يالكفيفة يالعفيفـة إن قلـت آسـف تقبليـن؟؟ يغفر الله ذنوب عبده ليا خطا وهـل تغفـرون؟؟؟؟ ــــــــــــــــــــــــــــــــــــــــــــــــــ ــــــــ المغزى من الموضوع لا تستعجل يا بني آدم بالحكم واتمنى انكم استفدتوا من الموضوع |
رد : ناظرته بعين قويه... فأنظروا ماذا قال فيها (قصيده جميلة)
لاهنت ... والله يعطيكـ ألف عااااااااااااافية ...
تقبل مني فائق التقدير و الأحـترام ... حسين بن فارس الفحوس . |
رد : ناظرته بعين قويه... فأنظروا ماذا قال فيها (قصيده جميلة)
لا هنت يا الغالي
على جهودك الجباره |
رد : ناظرته بعين قويه... فأنظروا ماذا قال فيها (قصيده جميلة)
اوف اوف اوف على هالقصيده والقصه والمعنى
بصراحه اخذت جو معاها وكلمات القصيده سهله ورائعه وبصراحه النتيجه كانت شيء وغير متوقع صدق الواحد مايستعجل في الحكم عيني عليك بارده اخوي سلمان ال سعد صدق انك مصمم ومبدع من ذهب تسلم يالغالي على هالقصيده والقصه الرائعه وتستاهل سمعه والله انها شوي فيك الف تحيه |
رد : ناظرته بعين قويه... فأنظروا ماذا قال فيها (قصيده جميلة)
اقتباس:
ومن قال ما هان يا ابو حسين اشكرك على المرور يالغالي اقتباس:
ومن قال ما هان لا شكر على واجب وانا اخوك وتسلم لي على هالرد. اقتباس:
شرفني مرورك يالغالي وهذا من ذوقك يا ذوق . |
رد : ناظرته بعين قويه... فأنظروا ماذا قال فيها (قصيده جميلة)
لاهنت يالذيب
والله انه شاعر بس استعجل لاهنت يا المبدع |
| الساعة الآن 08:06 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .
Copyright ©2003 - 2011, www.qahtaan.com