|
الفرت والهاف
السلام عليكم ورحمة الله
مقتطفات عن بعض ماقيل في الفرت والهاف من الابيات والقصائد الشعبيه على ألسنة السائقين والشعراء المعاصرين لتلك الحقبه يقول بندر بن سرور ياتــل قلبي تلــة عبيــد للهاف _×××_تلــه ولـد زايــد بدارٍ مخيفــه تله من العارض يبي خط الأطراف _×××_كب السهل وأرقاه راس الحتيفه ويقول ايضا من يسب الهاف جعله فدوة له_×××_جعل يفدنـه غناديــر البناتي لانهمت الهاف جاك الهاف كله_×××_تقول يشرب من غراش المسكراتي ويقول شاعر يشتغل بالتهريب اسمه ناجي موجها حديثه الى بن ودمان الدوسري الذي كان آمر مركز أبرق الكبريت ياهل الهافات زيدوا سعرهنـّه _×××_إشتروهن نقد وألا بالقصودي ما حلا مرواحهن بحمولهنـّه _×××_جاوزوهن غيبة الشمس الحدودي أبرق الكبريت لا زم يسهجنـّه _×××_مركزك يالعبد بيـّاع الجلودي ما بغنـّه لازم إنهن ياصلنـّه _×××_فوق والهافات عجلات الردودي ويقول آخر الله من قلب تتله كميه_×××_كما يتل الهاف خطو الشناحي جاه الطرد واستفرده عن خويه_×××_بأرض الاديرع في شمال اللياحي عليه من طرز العجم ربع ميه_×××_ وطال النهار بثالثه ما استراحي ويقول بن عبار العنزي يا راكب اللّي فوقه العبد يدني_×××_منوة غريبٍ ناحراٍ صوب نوّه هافٍ جديد ومن حفيزة وردني_×××_امورداً من معرضه جيب توّه وهذا اخر يتمنى ان الدوج يكون فدوه لموتره الفرت اللذي اذا زهمه يهب مثيرا وراءه رياح الصيف عسى الدوج يفدى موتري لاأبعد المرواح _×××_إليا من زمـى جـالٍ ودونـه تماثيلـي إليا من زهمت الفرت ثـوَر وراه ريـاح _×××_معاصيـر صيـفٍ قافيتهـا المخاييلـي يقول الشاعر مهنا بن براهيم: واهني اللي على فرت جديد_×××_ يقطع الفرجة اللي عمد سرابه من دياره لا في صافي الحديد_×××_ ما قضبه مهندس صلح خرابه كل ما عشق له بنمر ه يزيد_×××_ما تعرف اشجار نجد من هضابه ويقول آخر تل قلبي تل هاف حوض ما شدي_×××_ومن الخضر يلحقه رشاش واطلاقي ويقول آخر ياحمود هات الفرت واكمـل زهابـه_×××_كمـل زتاتـه يازبـون المشافيـق اسرح عليـه ولاتحـن الوطـا بـه_×××_جنب عسى دربك ودربـه توافيـق وتقول احداهن ياراكـب فـرت وقـف بالزبـاره _×××_عبى من الشيشه حديده جويـدي لا ركبه السواق صـك الغمـاره _×××_زين العجل توه جديـد الحديـدي أسرع من اللي طار من راس قاره_×××_جول الحبارى شافهن من بعيـدي يقول ناصر الفايز وكان ساكن في جده عندما رآى السيارات في الاستيشن تحمل الركاب الى منطقة نجد تكفون يا أهل الفروت الخضر شيلوني_×××_خلوا غريب الوطن يستـر بأوطانـه معكم على خير يم الشـرق ودونـي_×××_الخبت ماعاد أبي شوفـه ومسكانـه لاتقصر العرف والمعروف من دوني_×××_أنا الذي يكسر الجانب علـى شانـه لاتلحقونـي شـره ولا تلومـونـي_×××_ولا تعذلـون مشـتـاقٍ لخـلانـه وإلى وصلتوا بلـد فيحـان خلونـي_×××_مع السلامـه وكـلٍ يعتنـي شانـه خلوني ألحق هوى نفسـي ومدونـي_×××_من نجد لو رايحه حمضه وضمرانـه من يوم فارقتها والقلـب مشطـون_×××_ماغير أهذري بها والعيـن سهرانـه إلى اجتمع شف مضنون ٍ لمضنـو ن_×××_الطـب تلقـاه مقـرونٍ بحجـانـه وهذي سالفه واحد كان معه فرت وربعه شرو هافات وصارو يسبقونه وموتره مايلحق معهم شي وقال هالبيت ياهل الفرتات شوفولي سوايا _×××_واقصرو من سرعة هل الهافات ليه وبعد ذالك باع موتره وشرا هاف جديد يو مرهم قال ياهل الهافات من فيكم يماري_×××_من هقى في موتره هقوى يجيني ويقول آخر ياهل الفرت الحمر لاتتركوني _×××_ركبوني لو على سطح الغماره وأن وصلت ديار خلي نزلوني_×××_تكفون بصبر لو على شمس وحراره وحده بحايل ارسلت هالقصيده لولدها بالكويت تذكر فيها الهاف راكب اللي لونها لـون السفينه_×××_يوم حط شراعه القربـي حداهـا هافٍ أدهم مـن حفيـزه جايبينـه_×××_شلع القرطـاس زود ٍ مشتراهـا مانقص من عدته عنده ضمينـهم_×××_ـآخـذٍ رقـمـه وعـنـده ماكفـاهـا يـوم دقـه سلـف والقيـر بيمينـه_×××_يوم ثارت عن أبو سالم عشاها عنـد بـن صبـاح ياللـي خابرينـه_×××_من عنا لـه لازم ٍ يشكـر غناهـا وهذا يشكي من فرته الفرت غرزبي وأنا بأسفل الواد _×××_ يبست لهاتي والضما في شعيبه زيت وشحم بالليل والصبح نشاد_×××_ يا من يجره .. علقه في صليبــــه ويقول آخر من باب الدعابه يا راكبٍ فرتٍ يسوقه حمــــــيدان_×××_ سته وخمسينٍ تواما جنـــــوطه اليا أشتغل ثارت قنابل ودخــــان _×××_وليا مشى مثل الدركتن فحــوطه وقال احمد الكندي من الامارات يمدح الدوج تمنيت عندي من أمريكا رفيع الصوت_×××_سريع دورانه وان بدا بالمشاريفي طعامه يجرونه من الأرض حسب الفوت_×××_يركب غلى بيبه ولوف مراظيفي ولا هوب من طرز الجماسي وطرز فروت_×××_شنبات له من جدام ليته معاطيفي يروح ضهيره عجل قبل الصلاة تفوت_×××_ تسكر له الجامات و ان هب لك هيفي يقرب وليف حال دونه وعر وخبوت _×××_وجوان تتلاها زميم مواقيفي ورد عليه واحد اسمه بن دسمان يذكره بفعل الفرت والجمس أنا أحس أن منهو يمجد رفيع الصوت _×××_ يقوله و فعله عندنا مابعد شيفي يا ليته حضر فعل الجماسي و فعل فروت_×××_ مع عبله فيها سنود ومهايفي ضحك راعي الفرتات و الدوج أهله سكوت_×××_ وراعي الشفر اليوم عنده من الكيفي قال احدهم مادحا الفرت وهازبا الشفر الفروت الطيبـه ياهـل التمانـي_×××_من بغى يضوي عشيره قبل ليله الشفر عزمه كما عزم الهداني _×××_لا ضرب له رملة ٍ مافيه حيله الشفر خله علـى الثقبـه يسانـي_×××_و قفّه في بندر ٍعرضه فتيله وهذه محاوره بين الجمس والدوج والفرت لبن سطوه الهاجري الدوج يسب الجمسي &&يقول ان شغلتة تكسي&&وانة يقطم العكسي&&وخلق اللة يعرفونة وجاك الفرد مغتاظي&&وقال الهرج ذا فاضي &&عسا من ينكر الماضي&&مع السكراب يرمونة انا سيارت اسعافي&&وكم شليت من حافي&&وكم حجزت للاشرافي &&لبيت اللة يزورونة وقال الدوج انا الوافي&&وانا الي رفرفي ظافي&&وانا من الرمل ماخافي&&وانا لي دبل كارونة وجاك الجمس وشهودة&&على الكبوت مرصودة&&حروف تطير النودة &&من الي ما يعرفونة وقال الجمس انا الفلة&&وانا الي زينو دلة&&غرظ من يشتهي خلة &&لا ذكر مظنونة وسواق من الساحل الغربي يشتكي من الفرت مع البهيتة ودرب السيل _×××_ لف الدركسون يعجبني عشقت واحد ا ونمر اثنين _×××_والفورت عيا يساعدني وآخر من الساحل الغربي يقول الا ياوجودي وجد من صك دونه باب_×××_بقفل اعجمي مغلقات مساميرة غدوا به على اللي كنه الصقر بالمرقاب_×××_على هاف احمر كاملات شراشيرة وايضا يقول آخر هازبا الفرت مادحا المورسيدس المرسيدس قال أنا فنان_×××_ دك الحجر في طريقة دك ما هو كما الفورد ابو تيلة _×××_ لادست أبنصه عليك انفك يقول أحد الشعراء: ياحن قلبي حنيين فروت_×××_باثنين والخط مع رمله قام الدريول يشوته شوت_×××_ وزودٍ على حملته حمله والنارتلسب مع الكبوت_×××_ولا عندنا اسعاف نزهم له على وليفٍ خذاه الموت _×××_ بأول شبابه تقدم له ويقول آخر الا ياحن قلبي حن فرتٍ حن بالثاني_×××_ضرب عرق النفود وفارق التمرين والراحات والايا حت قلبي حت حـبٍ حتـه الجاني_×××_بعد حت الورق يبست سنابيله وعرقه مات والايا لجتي لجت ضلوع الذيب سرحاني_×××_والا يا تل قلبي تلتين وتلتين افوات وقال عايش الداموك يالفرت روح ترا الديره خلاويه_×××_ روح ترا رماة الشهبان جيناها ممشاك بثنين مالك فيه ماويـه _×××_ياقرد خظك ليامنـا وصلناهـا والله لاخلي صياحك حس جنيه_×××_ جنية قام بن جلعـود يقراهـا نبي ربوعٍ ورى حائل وجلديه _×××_يم الغزاله شمالاً مـن قراياهـا وقال احدهم في وصف عملية تجهيز الهاف قبل عملية التهريب وواصف ماجرى اثناء مروره من مركز الحدود مهربا سلع او بضائع راكب اللي تعبين عليه المتجر_×××_هاف حيث الهاف ماله مع العالم وجود احمر سته وستين لوحاته سمر_×××_ في ثلاثين الف بالضبط للبيع محدود واشتراه اللي يبي قطف نوار الزهر_×××_دافع كل الثمن كاش مايطلب قصود ومرنه وسط البلد لين وافق للسفر_×××_ماتغالى فيه دفع الخساير والنقود ودخله عقب التمرن كراجات النمر_×××_ لاجل تكميل اللحايق وتدبيل العضود دبل السبرنق عل لايميل وينهصر_×××_والتواير جددن طقم بريجستون سود وحمله من عند خيطان وجنب للبحر_×××_مع تقاطيع الشعيبه على مينا سعود ويدهج الوفره ومنها مشى عقب الظهر _×××_ ناحر الكبريت ماله عن المركز صدود جاك مثل مقادع الذيب معطيهم نحر_×××_ حاذف نفسه تحت عين حلال العقود ومرهم في غفلة ماخذو عنه حذر _×××_واوجسو حسه وهم قبل رقاد سجود وطلبوه اخوان رشده يقصون الاثر_×××_خلو الرشاش قفوه مثل قصف الرعود يطردون الهاف ماعندهم علم وخبر_×××_ وهو جديد ولاقضب طارته رخو الزنود ماركة مصنع امريكا مهو دوج وشفر_×××_ وارد كل يخبره مجرب ومحمود يطنخ السايق بحسه ايلامنه زفر_×××_عند مايذكر غرابيل نزلات وصعود صافي منه النواظر تحير وتفتكر_×××_ اسرد ودك تغطيه عن عين الحسود المواتر كواكب وهو مثل القمر_×××_مايسبه كود كوبان والهيس الربود وفي قصيده لشاعر مجهول يشكي الفراق ويندب عشره من الهافات للبحث عن الحبيب في اطراف الجزيره زادن همومي والدموع اغرنني_×××_ ودموع عيني لون مزن يهطلن يومن بربعي ناظروني اوني_×××_ قالوا صوابه في ضميره تمكن قلت اصبروا والله ما يوجعني_×××_ الا ضعونه يومهن فيه قفن قمت اصطبر واقول الله يعني_×××_على ليال للمصايب يجيبن ثمن اصيح ثمن ابكي واوني_×××_ونت صويب اللي عظامه تشظن ياراكب اللي هن مناة التمني _×××_حيل من اللي كل دل زهاهن من زينهن عند القبايل زهني_×××_ مع كل امير وشيخ يعرف طلبهن وسم الشراري وسمهن لا اعرضني_×××_ شقح يقال ان الشراري غذاهن ان صفن امع الجيش ما يلحقني_×××_ وان سابقن تقطع الخيل عنهن يشدن جراده في وقوت مضني_×××_ بارض القميز وفي زمنهن يعدن قم يانديبي هاتلي ما يوني _×××_عشر هافات من الوكاله اخذوهن اليا نعشته بالثلاثه يحني _×××_حس التواير يكشطن في حصاهن اثنين منهن للحويه مشني_×××_ لاهل الركايب والدور يكملن وهافين للنفود ووادعني_×××_ واقصى القعوره بالنفود ادخلوا هن وهافين لحدود الكويت اقفني_×××_دارن وحامن لا لقنه ولا جن وهافين لحدود العراق اعمدني_×××_ ومسلحات عن الخطر وين ماهن واجي على هافين بحسن يحني_×××_ كل الينه شيف بالقلب يشطن جنك العشره كلهن ينشدني _×××_على حبيبي في ديار اعرفهن الشاعر محمد البحيح الشماسي نظم هذه القصيدة (محاوره بين سيارتين) في أيام شبابه وكانت أفضل سيارتين المور ( المرسيدس الشاحنه ) والفرت ألايا فكرتي كيف القضاء والحكم بين أثنين_×_لقيت المور وياالفرت يطـلب حكم شرعـيه يقول الفرت أنا الطيب مكمل واجـب الطيبين_×××_سريع في الطلب تشهد لي أفراد السعوديه تفرج شوف طبلوني ميه مـن فوقها الستين_×××_سريع في الطلب مانيب سيارة دويينه وقال المورأنااللي سرعتي تمشي على التقنين_×_وشيل الحمل لاعجزت عنه صنع المريكيه أنا من صنعة ألماني شف الطمغه على الشاصين_×××_شهودي قيمتي مع قوتي ميه على ميه وقال الفرت أنا قبل المزفلت وأنت وينك وين _×××_تغرز في دروبي ما تعدي خطوط رسميه ليا من رحت مع دربي يثور عندك التدخين_×××_تغرز لو كفاراتك بعد يالمور رمليه وقال المور أنا ديزل ولاني بلذع بليتين_×××_مقرر صرفتي يومين تصرفها انت يومـيه كليت أهلـك بتبديـل الغيـار وشربكالبنزين_×××_خساره لو تنزل قيمتك يالفرت ربيه وقال الفرت أنا لاجيت صحراء رحت عنك يمين_×_أسافر مع نفودأخريص منقل منه هميه أسافر مع نفود السر كل شافني بالعين_×××_بطل مانيب مثلـك مـا تعـدى خـط ردميه وقال المور أنا أشيلك وأشيل من الفروت أثنين_×××_ثلاثه مـن الفروت بحملها ما حمل ليه لكن أصحى تجاكرني وأنا مانيب لك سنين_×××_تسمح خلها ما بيننا دعوى سموحـيه وهذي قصيدتين لحمد بن هادي المسردي يذكر فيهما الهاف ويشيد بمزاياه يا نديبي قم تجهز للمراح _×××_فوق هاف ٍ لا عطا ا لارض البراح قام يكفح مثل خفاق الجناح_×××_لا نهض من راس رجم ٍ معتلي هاف لوري فوق ماطوره صليب _×××_منوة اللي عن هوى باله غريب لا عطى الحزم الجلد يقنب قنيب _×××_نوع ماطوره ثمان سرندلي من ديار البعد يمشي في السحر_×××_بالغلس قدام ينباج السفر والضحى متعدي ٍ دولة قطر_×××_داخل ٍ سلوى ورقمه يجهلي لوحته مجهولة ٍ من غير زور _×××_سقطوا رقمه بابوظبي المرور حين سافر واسمحو له بالعبور _×××_ضامنينه من جميع المشكلي ضامنينه من جميع اي اعتراض_×××_ لين يدخل نجد واطراف الرياض وامرهم نافذ ولا فيه انتقاض_×××_ما عدا الجمرك لزوم ٍ يحصلي ثم يسافر عقب تركيب النمر_×××_مثل زاروق معا غبة بحر يجعل الوادي على دربه ممر _×××_ناصي ٍ تثليث والمخرج ملي صار له يوم استوى الخط اهتواش_×××_ واعجب السواق بالسرعة وشاش مانوى الوقفة يكون بحزم جاش_×××_ صامل ٍ في نيته ومصملي ويقول ايضا يالله ياللي للخطا غفار _×××_رب الملا ياعالم الاسرار ياباسط سبع ورافع مثلها _×××_سبع بدون اعماد يا جبار وانت الإله الواحد الفرد الصمد _×××_وانت الإله الواحد القهار مجري الفلك يامجري شمس وقمر _×××_مجري البحور ومجري الانهار ياعالم النيات يامنشي المطر_×××_ياقاضي الحاجات ياستار تكتب لنا عندك نهار الملتقى_×××_غفران وانت الواحد الغفار بديت باسمك ما بديت بغيره_×××_ يوم القلم بحروف غيري سار فيا رب تهديني على قول القدا _×××_ولا تواخذني على الاشعار من عقب ذا ياراكب اللي لامشا_×××_ لولا الفرامل يمسكنه طار هاف جديد صاحبه متخيره_×××_توه ورد تشتاق له الانظار باقي على تصميم شد بلاده _×××_شد الخواجه صنعه الكفار ماٌٌٌٌٌقٌٌربه راعيه عند السمكرى _×××_ولا تغير فيه لو مسمار لاناش بنزينه قدم سواقه _×××_خطر عليه انه يطير طيار ما فوقه الاعقربه واسبيره _×××_ولا الرسول وسايق بيطار سواقه اللي شاطر ومجرب _×××_من خلقته ضاري على الاسفار يمشي من الدوحه مع وقت السحر _×××_والظهر عند اهل الوفا والكار ويقول شبيب الدغيبسي الفرت ماطاري(ن) علينـا نبيعـه_×××_مغليـه مـاودي يفاخـت مراحـي من شار في بيع الحمـر مانطيعـه_×××_ضايع وغاوي عن طريق الصلاحي لا فرق الراعي وحاسـب وديعـه_×××_ابيـه ليامـن اول الوسـم طاحـي نبـي نـدوج بالفيـض الوسيعـه_×××_عليه عن منت ارخوم(ن) اشحاحـي خـوت نشامـا مهتويـن الطبيعـه_×××_عايش وابن سيحان وابـو فلاحـي هذا طرب قلبـي وغتيـة ربيعـه_×××_ربيـع قلبـي دوجتـي بالفياحـي يامـحـلا تطليعـنـا بالرفيـعـه_×××_اليا نتـل سبقـه لبـرق الجناحـي لاشاف له جول(ن) تدارج بجيعـه_×××_سقناعليـه مزهبيـن السـلاحـي ربعي مضاربهم تجيـب الوجيعـه_×××_امسنعين الرمـي ماطـار طاحـي صدنـا وفدنـا ماعلينـا هزيعـه_×××_طربين للمرواح والفـرت صاحـي خطو الولد ناشي وشايـب بسيعـه_×××_بين الربايع مثـل ثـور المناحـي ان جاء مجاله قيل لـه والقطيعـه_×××_عسـاه يفـدا مدركيـن المداحـي آمل انكم استمتعتوا بهذه القصائد ودمتم في حفظ الله |
رد : الفرت والهاف
وش ذا الزين يابو محمد
بيض الله وجهك وعزالله انه موضوع في قمة الروعه وتم الأحتفاظ بنسخه منه للأستمتاع به في أي وقت الف شكر لك وبيض الله وجهك اخووووووك |
رد : الفرت والهاف
ياسلام عليك يالرهالي
عزالله موضوع جداً في قمة الروعه للهافات والفروت :) بيض الله وجهك يالذيب على هذا الطرح المميز وانا سأتذكر بعض الأبيات التي لاتحظرني حالياً حول هذا الموضوع وسأضيفها لحقاً بإذن الله سلمت ودمت ولك تحية اخوك ،، . |
رد : الفرت والهاف
ارحـــب يابو غادة
ووجهك ابيض يالغالي والحقيقة الموضوع منقول واعجبتني القصائد والردود بين الشعراء رحم الله من توفي منهم وابقى الجميع دمتم في حفظ الله |
رد : الفرت والهاف
أرحب ياسعد ووجهك ابيض يالغالي
اسعدتني بمرورك الكريم دمتم في حفظ الله |
| الساعة الآن 05:05 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .
Copyright ©2003 - 2011, www.qahtaan.com