قصيدة ( الوسم ) للشاعر شايع بن فارس العيافي ( مشهور الخيال )
 

لاصرت وسم العرق الاكحل وانت بالكيه جدير
يا وسـم سمينـاك والدنيـا عطتـك حبالهـا


نكاث عهد ولاجزمـت تكسـر الهـم الجبيـر
غارت معك بقعـا وفـرت للخطـا محالهـا


الله ولا خشرة عيال الشاه فـي راس البعيـر
بين البيوت اللـي يسولـف بالرفـاه ظلالهـا


يحرم علي اني ماغطي هامتي من ريش طير
لوغابت البسام مـن سـوق الغتـر وعقالهـا


ولو ضميت وحك ضلع الزور بالضلع القصير
ماني مخايل مزنـةٍ سـاق الهبـوب خيالهـا


ولو عمست ومجلس أهل الكيف وراد وصدير
والله مالـد لدلـة قــد زلـنـي فنجالـهـا


يارب لاتكتب علي مـن الشقـا درب عسيـر
ولا تحملـنـي قــدر ذره ولا مثقـالـهـا


يارب لابادت كبار القـوم واحتـال الشويـر
قبل الأجل بيّـد صغـار القـوم وادن اجالهـا


يامن بها المسلم ولايخطي عن اليمه ضريـر
وتورد الهزلـه معـا حدبـا السنـام لحالهـا


الموت كان الدار قاطع حقهـا (تونـي بليـر)
ماهي غريبه تصعد اللآقـح ويقضـي حالهـا


ياربعنا اللي في السنين الغابره حـد شطيـر
حفيت عراقيب الظنـون وضيعـت معدالهـا


ماني وانا مشهور نقال الخطـا عبـر الأثيـر
انا سعوط الروس وخضاب اللحـى وسبالهـا


من برني بالطيب يجذبني معه سلك الحريـر
ومن غط قسمي ينظر ظعونـي ولا يبرالهـا


هذا وانا ماقد لويت الـراس للصـف الأخيـر
على العمد تبنا بيـوت العـز فـي منزالهـا


يا سعيد بشرنـي وتبشـر بالبشـاره يابشيـر
ان الحصاني حرمت تومـي بزهـر اذيالهـا

رد : قصيدة ( الوسم ) للشاعر شايع بن فارس العيافي ( مشهور الخيال )
 

.


ارحب يابن عياف



لاهنت يالغالي ونشكرك جزيل الشكر



وصح لسان أبو فارس



وبيض الله وجهه ووجهك على هالقصيدة المميزة




دام حضورك المتميز ودمت بألف خير

رد : قصيدة ( الوسم ) للشاعر شايع بن فارس العيافي ( مشهور الخيال )
 

تبقى وتسلم

ولاهان من قال

أنا من يشكرك وانت من يستحق الشكر

لتواضعك

ولمرورك

ولتواجدك

وتواصلك

مع جميع الاعضاء

ولاهنت يالذيب على تغيير أسم القصيدة في العنوان

شاكراً لك ذلك

وشرفني مرورك السريع ..........لاعدمناك يالذيب

رد : قصيدة ( الوسم ) للشاعر شايع بن فارس العيافي ( مشهور الخيال )
 

ابن عياف خيلا الشدقاء








ما اقول الا بيض الله وجهك على نقل القصيده

وصح لسااان الشاعر

رد : قصيدة ( الوسم ) للشاعر شايع بن فارس العيافي ( مشهور الخيال )
 

تركي بن فرحان الجعادنة

ووجهك ابيض يالذيب

لاهنت على المرور والتواصل معنا

ودمت ولسانك صحيح