نبض الشوارع




ما غـدا للوقـت معنـى .. مابقـى للشعـر دافـع
ملّت الآمي حروفي .. ومل صدري من الضلوع
غصت في أعماق روحي .. خذت نبض من الشوارع
يمكن ألقى أي معنى يوقد لشعـري الشمـوع
صرت اراقب كل ومضة .. وارخي للهمس المسامع
واحتري قلوبٍ تسافر مـن قساهـا للخشـوع
ألتقيت الظلـم لـذة فـي البشـر والعـدل ضايـع
وألتقيت من المشاعر كل صنـف وكـل نـوع
به قلوبٍ ياهـي تشقـى لـو يبـات الحقـد جايـع
وبه قلوبٍ لوهي تقوى مابقى في الدنيا جـوع
وبـه عيـون فـي هدبهـا تسكـن الآم ومواجـع
ومن سواد اليأس فيها ماقوت تـذرف دمـوع
به فقر مُدقـع يبكـي وبـه غنـا فاحـش ورائـع
به بخل ظاهر وشامل بـه كـرم لكـن قنـوع
به بشر ينسـى صلفهـا ان كـل مـن راح راجـع
وبه بشر تنطر اجلهـا ترتجـي ذاك الرجـوع
بـه مسلـي طـول ليلـة كـل مـا مـولاه مانـع
وبه مصلي ذاب ليله فـي سجـوده والركـوع
به كساد و به فسـاد و بـه طمـوح وبـه مطامـع
به بطالة بـه سفالـة بـه مخـادع ومخـدوع
به اسى غطّى الحناجر به كـدر قضّـى المضاجـع
بـه هـروبٍ للتطـرف والا لغيـاب وهجـوع
به دجل يملا الحواري بـه كـذوب ٍ فـي الجوامـع
طوّل اللحية لسلطـة ماهـو سنـة والا طـوع
به نفـاق وفـاق حـده مالقـى فـي النـاس رادع
به صدق موجود لكن مهمـل ومالـه شيـوع
به شعوبٍ ضـاع املهـا تكـره الفعـل المضـارع
تلقى في الماضي عزاها اما حاضرهـا يلـوع
بـه تعاسـة وانتكاسـة بـه ظــلام ٍ مايمـانـع
يقتل اخر ضيّ فينا وشمسنا تنسـى الطلـوع
بـه كاءابـة بـه سحابـة غيثـهـا دم ومـدامـع
به مهانة واستكانة بـه مذلـة بـه خضـوع
بـه ليـال ٍ مـا تبالـي لـو تجيـنـا بالفـواجـع
الحزن فيهـا مثالـي واصـل ٍ ماهـو قطـوع
وش بقى في العمر معنى وش بقـى للشعـر دافـع
وكل ما سالت حروفي ضاقت بصدري الضلوع