نادره هديه لهذا المنتدى ضمن . ( شاعر و قصيدة الحلقة الثانية )
 

هاتين القصيدتين هما هديه لهذا المنتدى و رواده الكرام حيث لم يسبق أن تناقلها الناس بينهم حيث أنهما من أخر ما قاله الشاعرين .

حيث تربط الشاعر عبد المحسن بن حسن بن رويشد المشعلي صداقة بالشاعر محمد بن ناصر بن صقر السياري و في آخر حياتهم افترقا و تذكر الشاعر السياري صديقه بن رويشد فأرسل له هذه القصيده :

[poem=font="Simplified Arabic,5,blue,bold,normal" bkcolor="white" bkimage="backgrounds/13.gif" border="solid,thick,red" type=4 line=0 align=center use=ex num="0,black"]
عجبي على دارٍ تقافا نزيلها=عليها الرياح الهوج تسحب شليلها
هبايب سهيل اللي ذكرها الخلاوي=لين افختت جل الجوازي مقيلها
و أنا إلى طالعت باقي رسومها=عيني من الفرقا تزايد هميلها
أذكر من اللي فات ما يجرح الحشا=زحول الرجال اللي سريعٍ رحيلها
تبقى من الماضي بقايا قليله=على مساويها يغطي جميلها
يا من يودي لي سلامٍ لغالي=نفس الفتى ما تقبل إلا زميلها
ماهوب مغرورٍ من الناس جاهل=نفسه من الضيقه تبور بعميلها
وده لمحسن في البلاد الجديدة=تحت معانيقٍ هي أكبر دليلها
وقله رفيقك بالسنين الأوايل=يهدي تحياتٍ جزاها بديلها
ليلاق في عيني من الناس واحد=ابيه عند اللأزمه يرتكي لها
جنب عن الواجب و كثر عذايله= و جمع له أعذارٍ قليلٍ حصيلها
و الناس مثل الناس و الرب واحد=لاكن اجلال الزمل ينقل هزيلها
هذا و لو ثقلت حمله مشى به=و هذاك لو هي قربتك ما يشيلها
ترا الرجال اللي تحمل النوايب=مثل العدود البينه ينعني لها
عفا الله عنهم كل ما حل ذكرهم=بقدر على ميلاتها و تعديلها
و عسى صبيٍ ما يقوم بنوايبه=نفسه عسى المولى سريعٍ يزيلها
و صلوا على المختار ما قال شاعر=عجبي على دارٍ تقافا نزيلها[/poem]
و قد رد عليه الشاعر عبد المحسن بن حسن بن رويشد يرحمه الله بهذه القصيدة :

[poem=font="Simplified Arabic,5,blue,bold,normal" bkcolor="white" bkimage="backgrounds/13.gif" border="solid,thick,red" type=4 line=0 align=center use=ex num="0,black"]
المشعلي عدا حجا رأس مرقب=فيه الذياب الشهب تسمع عويلها
و بديت باسم الله مما طرالي=و أبدع رسوم القاف و آخذ جليلها
يا مرحبا بكتاب حيّ و مهجتي=عداد ما هل المطر من مخيلها
أكتاب منهو لي مودٍ و صافي=بيّن صحاح أرجالها من رذيلها
صافي على طول الدهر في مودته=أبن صقر جل المراجل كفيلها
الله يديم الصاحب اللي على الوفا=عاشت رجالٍ ما تناست عميلها
ذكُرتني يا بدر الأنصاف ما مضى=رجالٍ تقاضى بالمراجل قبيلها
الأيام هي الأيام ما زاد عدها=أقفت على الطيب و تضحك لجيلها
أقفت بمن تشكي العدا من فعايله=و الخيل بالميدان تسمع صهيلها
إلى جاء نهارٍ فيه كسب المدايح=و بانت زحول رجالها من ذليلها
دنيا كفا الله شرها كل خيّر=عسى سناينها توطي بخيلها
وقت مصى يالقرم ماهوب راجع=يا شوق من شامت و خلت حليلها
وقت الصبا و الغيد راح و قعدنا=و اليوم في دنيا قليلٍ حصيلها
ياما درجنا للجوازي و ياما=هذا يدارجها و ذاك يحبيلها
يا صاحب المعروف و المدح و الصخا=أطلب ولي العرش مضفي جميلها
صبرت صبر أيوب و الله و أكبر=و النار في صدري تزايد شعيلها
ليقلت يبرد حسرةٍ جاء مثالها=قبور النشاما ذي سمايا نثيلها
نطاحة الكايد على واضح النقا=و يكفيك عن طول السوالف قليلها
كسابة الناموس و المدح و الثنا=اللي نهار الهوش يضحك دخيلها[/poem]

رد : نادره هديه لهذا المنتدى ضمن . ( شاعر و قصيدة الحلقة الثانية )
 

هديه ثمينه وانت تحري بالعلوم الغانمه


لاعدمناك يابن رويشد


بدعٍ جميل وردٍ رائع رحم الله الشاعرين


واشكرك على النقل ودمت بخير


.

رد : نادره هديه لهذا المنتدى ضمن . ( شاعر و قصيدة الحلقة الثانية )
 

بن رويشد


ألف شكر لك يالغالي على الموضوع والهديه القيمه


أنت كريم والموقع يستاهل مدة يمينك يالقرم


رحم الله الشاعرين وأسكنهم فسيح جناته

قصائد في غاية الروعه كروعة حضورك الغالي


أخوووووووووووك

رد : نادره هديه لهذا المنتدى ضمن . ( شاعر و قصيدة الحلقة الثانية )
 

الله لايهينك

رد : نادره هديه لهذا المنتدى ضمن . ( شاعر و قصيدة الحلقة الثانية )
 

أخوي بن رويشد بيض الله وجهك على النقل وصح لسان الشعار

سجلني متابع لكل جديدك

تقبل تحياتي وتقديري

رد : نادره هديه لهذا المنتدى ضمن . ( شاعر و قصيدة الحلقة الثانية )
 

أخي سعد لك خالص الشكر على مرورك الكريم

عبد الله بن غفره لك خالص الشكر يا وجه آل سلطان و مرورك شرف لي

حبابي أصل و فصل الله لا يهينك و تسلم يمناك

أبو عساف يزيدني شرف وجودك و يشرفني حرفك الكريم




أخوكم / حمود بن رويشد