وصف في الابل (لا هان من يقراه)
 

لا والله الاّ شـدوا البـدو مقفيـن
ينوون دارٍ وسمهـا وابلـه جـود

جاهم صدوق العلم قدهـم مندّيـن
وأقفوا بقطعـانٍ تواصيفهـا سـود

إبلٍ مجاهيـمٍ تحـوز الحـلا زيـن
ما فرّطوا فيها على العسر والكـود

سودٍ كما الغربان أو كحلـة العيـن
قدمي شحمها كنّه نصـال ولهـود

فج المناحـر والغـوارب ذراعيـن
والورك باب القصر ومن طوفته زود

وإذنين مثل حراب جنـد السلاطيـن
والعرف يا سبحان من صاغه جعود

ما تلحق الخضره من سبالها ليـن
قد للعرب شهرين من زمة العـود

لا قرّبوا منها مـع القـدر قدريـن
فاضت ويبقى فـي مواخيرهـا زود

وإلى تكلّم مـن هواهـا بصوتيـن
تكسر له الحقّه له الشوف مشـدود

زين إرزمتها حزة الناس ممسيـن
تنهض صغيرٍ تالـي الليـل مالـود

واليا تخطّا من عقب وقـم يوميـن
ما عاده من الشد والسير مضهـود

شدوا على شف المجاهيـم عجليـن
ما قهقروا الطرعات بشبوك وقيود

واليا وصلوا قاعٍ تشـوق المفليـن
صفّارها يلعـب إلـى هبّتـه نـود

بنّـوا بيـوتٍ كنّهـا زرع يبريـن
وطقّوا لمنزلهم من الـذود مفـرود

وشبّوا هشيمٍ ما توهجـم ببنزيـن
ودنّوا دلالٍ تحتوي الهيـل والعـود

وتحدّثوا من ذودهـم والحشاويـن
ومسراحها والكسب والفال محمـود

من صوت جرّتها فراحـا وطربيـن
تدحن منارتهـم غواليّهـا السـود

ذاك الزمن والبدو مثل السلاطيـن
ما حسّبوا للمال والنقص والـزود

الله يحـب اللـي يحـب البداويـن
واللي نساهم ميّت الحـظ مقـرود
.



قصيده للشاعر

محمد بن شرهان الدحابيب المري

صح لسااااااااااااااااااان


الشاعر وصحت يمناك على النقل


لاهنت وابيض وجه

الله لا يهينكم جميع

ويطول أعماركم

ومشكورين على مروركم

وتقبلوا تحياتي .

بيض الله وجهك ياراعي السمراء على نقل القصيدة وصح لسان شاعرها

عاشق المرجله

ووجهك أبيض

ومشكور على المرور

يا سلام عليك اخوي راعي السمراء

انا شخصياً مقدّر هذا التعب والجهد....يشهد الله انك منت مقصّر..صح لساااان شاعرها
وتسلم يمين ناقلها...


اخووووك الشااااعر
(( عمر السخني ))

صح لسانك بالمري

شكرا لك يا راعي السمراء

قصيدة وصف رائعه

ونقل مميز

وصح لسااان المري



تحياتي لك يالغالي

مرحبا

بالشاعر عمر السخني

ومشكور أخوي على ردك هذا

الله يعطيك العافيه

وهذا المجهود يبذل من أجل شي واحد هو

((((( خدمة هذه المجالس التي تهمنا جميعاً ))))

وتقبل تحياتي .

مشكور أخوي ال معمر

على المرور

أبيض وجه الله لا يهينك .

أخوي الغالي بن غفره

مشكور على مرورك الطيب

والله لا يهينك ما تقصر يا أبن لجواد

وتقبل تحياتي .