ممنوع الدخول لأصحاب الحالات النفسيه(للرايقين فقط تفضلوا)
 

بسم الله الرحمن الرحيم

حبايبي من أعضاء و مشرفين و زوار

مساكم الله بالخير جميع

كيف أنتو......عساكم طيبين

بشروني…كيفكم مع بداية البرد..ان شاء الله مستعدين

المهم يا حبايبي يا قراء..يا بعدهم أنتو

ما في بالي شي معين اتكلم فيه...بس قلت اخليها سوالف و دردشه حلوه مع اللي احبهم و يحبوني

أنا راح أتخذ أسلوب جديد في طرحي و هو البساطه

لأني خايف أتفلسف بعدين تقولون وش يبي هذا المهبول شكله موسوس

لذلك راح تكون مواضيعي تناقش قضايا حنا معاصرينها في هالوقت بس بأسلوب ساخر نوعاً ما

عاد انا عضو جديد و أبي منكم التشجيع و بث روح الحماس فيني علشان أكمل المشوار معكم

ولا بأزعل عليكم و بروح لبيت أهلي<<<<<طبعاً هذا أسلوب بنات هذا الجيل

هالحين اللي يسمعني يقول إني قد بلغت من العمر عتيا...ما كني من هالجيل جيل القشطه و التميس

يالله راح أخبركم بعمري....وش فيها عادي...أنا في آخر مرحلة المراهقة و عمري 22 سنه<<قولوا العمر كله>>

وبالنسبة للسعوديين فترة المراهقهم عندهم احس انها تطول شوي مو مثل باقي العالم

الواحد عمره 25 و تلقاه يفر في الحواري بددسن 85 و مشغل المسجل و خاش جو مع فتى نجران و حسين العلي

و هالحين تطورا شوي و صاروا يفترون بكامري و الواحد ما يقطع راسه 100 سيف

ما علينا

أنا يا اخوان بكتب كلام كثير و ابيكم تركزون معي في اللي بقوله

تكفون انا طالبكم..و عاد تكفى تهز الجبال..تأملوا في كلامي

حطوا رجل على رجل و خلوكم راايقين علشان يعجبكم كلامي

و صدقوني الكلام اللي بقوله ما قلته الا لأني احبكم و اموت فيكم ((غزل عفيف))

اليوم الخميس و أكيد الأغلبية في إجازه....هذا إذا ما كان البعض في إجازة على طول<<لا تفهموني غلط

بس البعض طاح في هذي الأسهم و تركوا وظايفهم و صاروا مرابطين في البنك

حتى الشيبان اللي كنا نشوفهم في سوق الغنم صاروا يشتغلون بالأسهم

بس فيه شي محيرني...هالحين هالشيبان من وين يجيبون هالفلوس ما أدري

تلقى الواحد كل يوم في البنك و في خدمة كبار العملاء و الثوب مقطع و الشماغ شماغ العقل ان كان باقي تذكرونه

و النعال الله يكرمكم من القديمه أم سمكه...و السياره هايلكس 79 ومطوفه من عشر سنين

المهم يا حبايبي يا حلوين

خلونا نتبادل أطراف الحديث و اعتبرو الوضع جلسة حبايب

يعني ما فيه موضوع بحد ذاته,,بس مجموعة سوالف مفيده وحلوه

و إذا فيه أحد يبي يضيف على كلامي فعلى الرحب والسعة و اكون ممنون وشاكر له

حبايبي يا قراء
صليت اليوم الفجر في المسجد و رجعت للبيت((الأخ مواصل,,باقي ما نام..كعادت الشعب السعودي في الاجازات..ما ينامون الا بعد الفجر))

رحت لغرفتي الصغيرة و حطيت راسي على المخده(( المخده هي ما توضع تحت الراس عند النوم))

و عندي ذاك الفراش اللي يحبه قلب قلبكم..مو سرير....فرااااش

ما احب انام على السرير(((يمكن لأني بدوي وما تعودت عليه)))
و عاد مشكله البدوي اذا تحضر وسوا فيها اتكيت,,عز الله اللي بجيبها بعروقها

المهم لما جيت أبي أنام خذيت جوالي كالعاده و صرت أقلب فيه علشان يجيني النوم و انخمد

فجأه خذاني التفكير لبعيد و صرت اتأمل في الحياه و الوضع اللي حنا فيه..

اكتشفت انا معذبين انفسنا و هي ما تستاهل الحياه كل هذا العنا و التعب

تأملت و لقيت
هذا يعصي والديه ومتخاصم معهم ومقاطعهم نهائياً,,
وهذا يضرب اخوانه واخواته بسبب وبدون ويتسلط عليهم,,
وهذا اللي يأكل حق الايتام,,
وهذا اللي يظلم الناس و مايعطيهم حقهم,,
وهذا اللي يزعج خلق الله,,
وهذا اللي يحتقر الهندي ويعامله معاملة حيوان الله يكرم القراء,,
وذاك اللي يتكبر وما يسلم الا من راس خشمه ((وهذا اللي يفقع مرارتي))
هذا غير تقصيرنا في الصلاة و القران و عمل الخير

طبعاً غير البلاوي اللي تقريباً أصبحت روتين يومي مثل السب والشتم والغيبه والنميمه
وارسال مقاطع الجوال اللي تفشل و المغازل ((يجيك كل واحد يترزز بخشته على باله مطيح البنات))

طيب و بـــــعــــديـــــــــــن؟؟؟؟
فعلنا و سوينا و و و و....الـــخ
وش استفدنا...بالله عليكم وش نستفيد؟

يا ناس يا عالم...حرام و الله حرااام اللي نسويه في حالنا

عيشتنا يا اخواني و الله ما تسوى اذا هذي تصرفاتنا

الحياه حلوه و الله حلوه بس كيف نعيشها بحلاوتها

انا اقولكم كيف
خلونا بسيطين جداً...خلونا على طبيعتنا...لا تكبرون الحاجه وهي ما تسوى

ياخي اجلس مع اهلك...سولف,,امزح,,اضحك,,يطلبونك قل حاضر من عيوني

و لا تقعد كل يوم تفقع في أخوك الصغير<<<يواعدك خويك و يسحب عليك و تعصب وتروح تضرب أخوك

تطلع للشارع تلقى العالم سلم ياخي وش خسران ابتسم في وجه الناس

لا تقعد مكشر بخشتك تقول وحيد القرن((حاله نفسيه,,شوي و ينكسر خشمك))

خلك ايزي مع الهندي مع السوداني مع الطفل مع الشايب و لاتعقد الامور..ابتسم ووزع ابتسامات
ترا ابتسامتك في وجه اخيك صدقه

لا تقعد تسوي فيها خفيف دم تبي تضحك اللي معك وتحش في الرايح والجاي و تكسب إثمهم

ترا والله تروووح فيها من كثر الذنوب

تزاعلت مع قريبك و لا زميلك رح الى حد بيته واعتذر منه وش خسران؟؟

يا شيخ لا تروح للبيت..الله يخلي الجوال,,رساله بنص ريال تسوي مفعول مو طبيعي

خاصه بعد ما وفرت الاتصالات خدمة الوسائط<<أرسل عيون بنت مبرقعه و تحتها كم كلمه حلوه
صدقني يسلك معك على طول و هو أصلاً ما درا وش قلت في الرساله

صل رحمك,,حب فوق راس خوالك وعمانك والشيبان اللي في مقام ابوك...تلقى دعوه طيبه منهم

خلك مرح مع نفسك ومع باقي الناس...لا تكون حاله نفسيه وتقعد لحالك

جلست الواحد بحاله والله تشيب الراس و تجيب الوسوسه...

لقيت عجوز و لا طفل و لا اجنبي في الشارع وقف وخلهم يقطعون,,لا تسوي فيها عناد أنت و المازدا حقتك

واحد متعطل في الشارع وقف وساعده,,

بالعربي وعلى بلاطه ومن الأخير
حاجه تحس فيها انك راح تفرح إذا احد فعلها لك لا تبخل وافعلها لغيرك

حبايبي ما ابي اطول عليكم كثير
لكن تأكدوا انه ما كان في الله دام واتصل وما كان لغير الله انقطع وانفصل

ولأني احبكم في الله فأنا علي يقين بأن محبتنا ستدوم و لن تنقطع

هذي اول مره اكتب بهذا الاسلوب البسيط
بس بيني وبينكم والله صفحة الوورد تخوف كلها خطوط حمرا تحت الكلمات وانا ماتعودت على هذي الخطوط,,,بس وناسه لا تدقيق املائي ولا يحزنون..

و انا اتمنى من كل الاعضاء يقرؤون الموضوع

لان الكلام خرج من قلبي وراح يوصل للقلب أكيد,,

و بعدين قدروني خاصه إني تو عضو جديد و يحتاج إلى دعم معنوي و أهم شي مادي<<<مو الأخ قحطاني

يا أعضاء يا حلوين والله الحياة بسيطه و حلوه بس خلونا نبعد عنا الحسد والحقد

و اذا فيه عضو يبي يعتذر من عضو يعتذر عادي وشفيها
و هذي مني بوسة على خشم و راس كل عضو يعتذر من عضو حس في يوم انه زعله
على الأقل أرسل له رساله خاصه و معها أغنية لخالد عبدالرحمن<<بس من أغانيه القديمه

يا حبايبي يا حلوين:
خلونا نبقى مثل النهر مهما تعكر مصيره يرجع صافي..(يعني صفو النيه)

و في الختام
هذا أخوكم عبدالعزيز يتمنى لكم السعادة الأبدية والسرمدية
و يدعو لكم بالتوفيق و النجاح
و رجاءه أن يعم الله عليكم بالصحة و العافية
و إذا فيه أحد راح يشيل في خاطره مني فهذي حبت خشم و بوسة راس مني له<<<<الأخ ناوي بالفساله من أولتها

و أنا راح أحط تصويت على الموضوع كتقييم لذلك أرجو التفاعل لحاجة في نفسي

والسلام مسك الختام....يا سادتي يا كرام

هخهخهخهخهخهخخه

انا اشهد انك في قمة الروقان هخهخهخهخه

ماشاء الله تبارك الله عليك والنفس الطويل في الكتابة

ياخي وش نوع العصير اللي تشربه :) نبي نروق مثلك يالحبيب :)

بالنسبة لموضوعك اخوي عزووز نقدر نسميه من كل بحر قطره ومن كل بستان زهره

كوكتيل مشكل من النصايح الطيبة والحلوة اللي طالعة من قلب صادق ورايق في نفس الوقت

وانا اؤيد كلامك بالنسبة للي يتكبرون :) ابي اعرف وش يتكبر الواحد عليه

لا زود رجله ولا مال ولا افعال طيبة ولا أخلاق زينه ولا روقان من عبد العزيز القحطاني :)

وش الكبره عليه ما ادري

وخصووووووووووووووووووووصا ذولا البزارين الصغينونييين اللي يتخرج الواحد منهم ملازم في الجيش والا

الشرطة ليش يتكبر ما ادري ؟؟ تلقاه ما يشم القاع الا جيفه

لا شفته تقول شوي ويقلع من الارض بس مالقا مدرج جاهز هخهخهخ

طبعا انا ما اعمم ولكن هذه الغالبية

وغيرهم من بعض الناس لا جمعه كم قرش قام يتكبر ويناظر الناس من طرف خشمه

وهو ما يدري المسكين الخبل ان خاتمة هالدنيا الى زوال والى القبر

ما اجمل البساطة والاريحية والتواضع ، اذا طبقها الواحد في جميع امور حياته راح ينظر للدنيا بعين اخرى

راح يلقى الدنيا كلها راحة وبسط ووناسة واهم شي راح يلقاها رواقه مثل اخونا عزوز

ويشرفني اخي عبد العزيز اكون اول واحد يصوت لموضوعك

مشكوووووور اخوي عزوز وابيك بكلمة راس بس ما ابي المشرفين يدرون وخصوصا عاشق الوطن لا يزعل علي ويقول اني اخرب عليه المجلس العام

انزل اخوي عبد العزيز تحت لحالك والبقية لا احد يجي

7

7

7

7

7

7

7

7

7

فيه مجلس اسمه ( استراحة المجالس ) ما يدخله إلا كل رايق ) :) انصحك تزوره وتشارك فيه

وبعدين ترى رديت في موضوعك الاول ولكن لما شفتك حررته رديت عليك هنا وياليت تحاول تحذف موضوعك الاول
تحياتي لك

بساطتك ستبسط لك القلوب إن أنت استمررت على هذا الأسلوب

أشكر لك موضوعك
تم التصويت


أبو زيد

هههههههههههههههههه ....................


اثرت بعض القضايا الهامه الى يبي لكل قضية موضوع مستقل ..



بالتوفيق انشاء الله ..............

تم التصويت

اسلوب شيق و اتوقع ان استمرارك بهذا الاسلوب سيجعلك احد كتّاب الشبكة المتميزين

و فقك الله و وفق كل قحطاني ..

تم التصويت

خووووووووك بوفارس

صدقت

موضع رائع جدا جدا

وله أهميه في المجالس وشكرا للك



أخوووكم / كحيلان

فعلا أعجبتني بساطتك و روقانك ...


أسلوب رائع و شيق ... و الله يوفقك انشاء الله و الى الأمام ..






أخــــ ابن شطفان ــــوك

جميع من رد على موضوعي

الشكر موصول لكم حبايب قلبي

و راح يكون لي رد و جلسة مصارحه مع كل واحد منكم<<<<<الأخ حبيب:050103kss

لا عدمناكم و لا عدمنا تواجدكم الغالي على قلبي

أخوكم////عبدالعزيز

هلا وغلا أخوي عزوز

ومشكور على الوصفة الزينة

وبالنسبة لرمان الجوف فانشدني عنه يا عليه طعم خياااااااااااااااااااااالي ما تلقاه في اي مكان

الله يا زمااان رجعتني للخلف سنوات

الحين وين عاد تحصل الرمان الزين حق الجوف


وباقي بنشوف رمانك يمكن ما بقي في الجوف إلا هو :)

وبالنسبة للموعد فما فيه مشكله واذا جيت انت عند التكسي على الدوار راح تحصلني على بنز فياغرا
م 2006 لون ذهبي وليس أصفر :) لوحة رقم ( ا س د 001 ) هخهخهخهخه

هاه وش رايك تبادل بالسيارات والرمان فوق البيعة هخهخهخه

أشوف المجلس العام قلب إلى استراحة المجالس


يا رب دوم هالضحكة يا شباب
يعطيكم العافية

هلا وغلا اخوووووووووووووووووووووووووووووي


الغالي يحفظك ربي عبد العزيز


وفقك الله



ههههههههههههههههههههههه

ههههههههههههه


ههههههههههه



ضحكتني وفقك الله


اما بالنسبة لشكري لـ آل معمر فأعذرني لأني أخاف من المشرفين



واشكرك على اسلوبك فائق الروعة وفقك الله

سعود الكبيسي

جعلني أكبس قلبك بالعافيه

لا خلا و لا عدم يا رب

لا هنت يالغالي

أخوك///عبدالعزيز

**********************************************

حر اليدين

هلا و غلا فيك وفي دار زايد و أهلها

أخوي

لولا الله ثم وجودك و وجود مثلك و شرواك من الأعضاء لما كتبت

دمت بكل الود....

أخوك///عبدالعزيز

كحيلان

يالبى قلبك على هذا الاسم

كحيلان

ممكن أعرف معنى اسمك

أنا أتوقع عيونك غير طبيعيه<<<<<<يهب عليك:040104_em(((عابرالقارات))))

يعني أقصد مكحله من يوم ربي خلقك

و هذي نعمه ما يلقاها أحد

كحيلان
الله يكحل أيامك بكل فرح وسعادة....

لك مني أزكى التحايا و أرق الكلام..

أخوك///عبدالعزيز

**************************************************

السعدي

يسعد صباحك يا بعدهم

مشكور على المرور

*********************************

ابن شطفان

و الله مرورك الي يعجبني

لا عدمتك و لا عدمت هذي الطله الحلوه

الأروع ياعزيزي هو وجودك في صفحاتي .....

قارئ أعتز بك فلك مني كل الحب و الاحترام

أخوك
عبدالعزيز

رد : ممنوع الدخول لأصحاب الحالات النفسيه(للرايقين فقط تفضلوا)
 

عبد العزيز

أنا ما صوت للموضوع ألا حد الان


وماني مصوت


تعال عندنا في الاستراحه أنت شكل يبغالك تكيه لحالك




أهلاً بك عضو جديد


وتقبل تحية أخوك


والقصيده أي عندك في التوقيع ممتازه

ولا زم تعلمنا ليش حطيتها

أو بالأصح ويش سالفتها


أنا ماني أخذ راحتي في المجلس العام بالعاده

ونت شكلك تبغا تخربني

تعال عندنا الاستراحه

أوريك سفينه في الصحرا

ورا ذا ك الطعس


ولا ثعبان في الارضيه ألي ورا الحاره



وتر عندنا مشرفين

زي اللوز

ال معمر منصور العبد الله الواصل


ولا قصور في الباقي المشرفين



لا كن ذولا تلقاهم مروقين على طول



في أنتظارك

رد : ممنوع الدخول لأصحاب الحالات النفسيه(للرايقين فقط تفضلوا)
 

ماقصرت والله لا يهينك كلام العقل والعاقل الفاهم هو الذي يتبع هذه النصائح ودديننا امرنا بها وقال رسول الله"ص" انما بعثت لاتمام مكارم الاخلاق0

رد : ممنوع الدخول لأصحاب الحالات النفسيه(للرايقين فقط تفضلوا)
 

عبد العزيز القحطاني ههههههههههههههههههههههه
من جد قريت موظوعك وانا معصب اشووي وبصراحة
قعدت اكتب الرد وانا اضحك وفعلا كلامك بسيط وسهل
ويوصل للقلب وفعلا كتابتك هااذي فيها نصايح مفيدة وكثيرة
وعساك على القوة ونشوفك بموظوع ثاني

رد : ممنوع الدخول لأصحاب الحالات النفسيه(للرايقين فقط تفضلوا)
 

يعطيك العافية اخوي عبدالعزيز على الموضوع الرااااااااايق، جزاك الله خير.

رد : ممنوع الدخول لأصحاب الحالات النفسيه(للرايقين فقط تفضلوا)
 

وين عاد رحت ياعبدالعزيز


لاعلم ولاخبر بعد الموضوع القوي هذا

نتمنا تواجدك بيننا

رد : ممنوع الدخول لأصحاب الحالات النفسيه(للرايقين فقط تفضلوا)
 

الموضوع مفيد جدآجدآ ومشكور

رد : ممنوع الدخول لأصحاب الحالات النفسيه(للرايقين فقط تفضلوا)
 

بيض الله وجهك يا صبي ال معمر

ياخوى انت مجنـــــــــــــــــــــــــــــــــــــــــــون باسلوبك



وصراحة شكل الرمان طلع مفعولة



والوعد دوار السراة بس بشرط تباشر علينا من عصير الرمان





( رمان جوف ال معمر )

رد : ممنوع الدخول لأصحاب الحالات النفسيه(للرايقين فقط تفضلوا)
 

مشكور

موضوعك رايع

رد : ممنوع الدخول لأصحاب الحالات النفسيه(للرايقين فقط تفضلوا)
 

الله لا يهينك على هذا الموضوع
ومع تحيات سواق التريله يوم بنشر عليه150 كفر
على خطابوحدريه وهو محمل حطب(افضل+نوره)

رد : ممنوع الدخول لأصحاب الحالات النفسيه(للرايقين فقط تفضلوا)
 

حرام ان الموضوع يستحق مليون صوت