|
وقعة [ عقيلان ] بين آل مسعود وآل الجرو ضد عتيبه .
إلى جميع الأخوان ارررحبوا تراحيب المطر
صبحكم الله بالخير في هذا الموضوع يسرني أن انقل لكم إحدى المعارك التي دارت بين قبيلتي قحطان وعتيبه وإليكم التفاصيل بسم الله : ##اسم الوقعة : [ وقعة عقيلان]. ##مكان الوقعة : [ في أطراف بيشه ] . ##اطراف الوقعة: [ من قحطان آل مسعود وآل الجرو ومن عتيبه قبائل برقا] . ##قادة الوقعة: [ آل مسعود شيخهم الشيخ الفارس جعفر بن منيس بن عبود وآل الجرو الشيخ الفارس ضويحي بن عبيد الله بن عريج وقبيلة عتيبه شيخهم الشيخ الفارس محمد بن هندي بن حميد ومعه القليل من سبيع ]. كانوا آل مسعود مربعين بأبلهم حول عقيلان بزعامة الشيخ الفارس جعفر بن منيس بن عبود شيخ آل مسعود وكانوا آل الجرو مربعين بأبلهم بزعامة الشيخ الفارس ضويحي بن عبيدالله بن عريج حولهم مابه بعد في هذه الأثناء كانت قبيلة عتيبه بزعامة الشيخ الفارس محمد بن هندي بن حميد قريبة منهم ومربعين بأبلهم في مكان يبعد عن مكان آل مسعود وآل الجرو مسافة يوم كامل . في هذا الأثناء كان مع عتيبه واحد ٍ من عبيده [ يا هاجري وإلا فهري ] وكان قصير ٍ لهم . المهم في هذا الوقت قرر الشيخ الفارس محمد بن هندي بن حميد إنه يغزي على آل مسعود وآل الجرو المهم سمع هذا الرجال كلام الشيخ محمد بن هندي بن حميد لربعه إن بيغزى فسرى من ليله ويوم وصل لآل الجرو وعلمهم بنية ابن هندي بالمغزى قاله الشيخ ضويحي بن عبيدالله بن عريج : [ عن آل مسعود على عقيلان رح وعلمهم بنية ابن هندي ] . المهم استعدوا آل الجرو وآل مسعود لابن هندي وربعه . قال الفارس ضويحي بن عبيدالله بن عريج آل الجرو للشيخ جعفر بن منيس بن عبود شيخ آل مسعود : [ يابو ذيب أنا يا ضويحي بتيّه بكاري على عقيلان واستدرج العتبان لين جاوا يبون الأبل دخلنا عليهم صفين حنا يآل الجرو وانتم يآل مسعود من يمين ومن يسار وخيالة ٍ يجون متفرقين يباغتونهم فجاءة ]. المهم بعدما وصلو العتبان لعقيلان ودارت المعركة الشرسه بين الطريفين وقتل خلق كثير من الحمده وغيرهم من عتيبه حتى تركوا عتيبه عقيلان ولاذوا بالفرار من الوقعة وانتهت المعركة بانتصار قحطان على عتيبه . في الحقيقه برز في هذه المعركة فرسان واجد بان لهم فعل ٍ طيب ذاك اليوم ومنهم : 1)الشيخ الفارس جعفر بن منيس بن عبود شيخ آل مسعود. 2) الشيخ الفارس ضويحي بن عبيدالله بن عريج آل الجرو. 3) الفارس عروان بن منيشط آل جاهل آل مسعود. المهم بعد هذه المعركة قال الشاعر عبدالهادي بن شعواء آل سبعان الخنافر هذه القصيده يذكر فيها ماجرى في وقعة عقيلان يقول ابن شعواء: [poem=font="Times New Roman,5,darkred,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"] حر ٍ شهر من صوب نجد مطاره=نوى المطار وقرّب الفطر الشيب. ثوّر من الصخة تقّطع شراره = يتلاه من برقا أسوات العياسيب . وعلى عقيلان نوانا بغاره = وعما علينا مدنا من الأقاريب قلط حشيفان يدور سباره = متعليٍ في نايفات المراقيب . كانوا علينا والدبش بنت شاره =لاد الكريزي ميبسين المشاريب. لحقوا قحاطين أسوات النماره =والكل منهم لفها بالعراقيب. ابشلف ٍ مظاربها أسوات الحجاره = ترعى بها العرّا ويرقى بها الطيب عاداتنا في الجلب ننقي خياره =ثلاثة الجذعان غصبٍ بلا طيب . اللي شرد خلّى الحويا ايساره =واللي نصا رنية يدور معازيب . عز الله إنها حجة ٍ بعتماره =نطاحت الوكحا انجوم المغاييب . يا مسوي الفنجال كثّر بهاره=وعدّه على عروان واثنه لابو ذيب. وعدّه على الشاوي متيه بكاره=ضويحي ياشوق البني الرعابيب.[/poem] المقصود من [ حر ٍ شهر صوب نجد مطاره ] المقصود الشيخ الفارس محمد بن هندي بن حميد . المقصود من [ يتلاه من برقا سوات العياسيب ] يقصد قبيلة برقا من عتيبه وذلك لكثرتهم ذاك اليوم المقصود من : [ لاد الكريزي ميبسين المشاريب] المقصود منهم الحمده نسبة لأصلهم من الكرزان البقوم ومعنى ميبسين المشاريب تدل على شجاعتهم وفروسيتهم. المقصود من [ اللي شرد وخلى الحويا يساره ] العتبان عندما هربوا من المعركة باتجاه الحويه . المقصود من [ واللي نصى رنيه ] هم اللي مع بن هندي من سبيع عندما هربوا من المعركة. المقصود من [ عروان ] هو الفارس عروان بن منيشط آل جاهل آل مسعود. المقصود من [ أبو ذيب] هو الشيخ الفارس جعفر بن منيس بن عبود شيخ آل مسعود. المقصود من [ ضويحي] هوالشيخ الفارس ضويحي بن عبيدالله بن عريج آل الجرو. هذا ولكم خالص تحياتي |
رد : وقعة [ عقيلان ] بين قحطان وعتيبه .
ارحب يالقرم
عقيلان من اشهر معارك عتيبه مع قحطان وكفوا ال الجرو وكفوا ال مسعود خياله الشرفا ولاهنت يا ابالذموم على موضوعك الرائع |
رد : وقعة [ عقيلان ] بين قحطان وعتيبه .
والله ومليون نعم في ال الجرو وال مسعود ابا الذموم تقبل فائق تقديري واحترامي انت موسوعه في تاريخ قحطان وخصوصا معاركها مع عتيبه ننتظر جديدك ياالقررررررررررررررررم |
رد : وقعة [ عقيلان ] بين قحطان وعتيبه .
السلام عليكم ورحمة الله وبركاته
الحقيقة معركة عقيلان جديدة علي لكن الي يعجبني في (ابا الذموم) بعد أنتهاء القصيدة يقوم بشرح بعض الابيات وهذا يدل انة قديم في الشغلة والحقيقة ما هي غريبة على ال مسعود وال جرو الانتصار . ويكفيك أن أول قبيلة من قبائل قحطان حاربت في نجد هم ال مسعود قبل ما يجون الجحادر في نجد عام980 هجرية يوم يفزعون للدواسر على ال مغيرة والسهول وسبيع . اما ال جرو يكفيك ذبحتهم لعوال الشيخ محمد بن هندي بن حميد الثلاثة مع الحشيشي . حبيت استفسر عن البيت : كانوا علينا والدبش بنـت شـاره _________ لاد الكريزي ميبسين المشاريـب هل يقصد لاد الكريزي الحمدة . : اخوكم ابن الاسود العاطفي : |
رد : وقعة [ عقيلان ] بين قحطان وعتيبه .
ابا الذموم بيض الله وجهك على المشاركات القيمة الموثقة باالقصائد سجلني متابع لطرحك القيم تقبل تحيتي |
رد : وقعة [ عقيلان ] بين قحطان وعتيبه .
اقتباس:
ما عليك زود يا كحيلان الله لايهينك على مرورك على الموضوع تقبل مني جزيل الشكر والتقدير. |
رد : وقعة [ عقيلان ] بين قحطان وعتيبه .
اقتباس:
أررررحب يابو عايض تراحيب المطر الله لايهينك على مرورك على الموضوع تقبل مني فائق الاحترام |
رد : وقعة [ عقيلان ] بين قحطان وعتيبه .
اقتباس:
أررررحب يابن الاسود تراحيب المطر الله لايهينك على مرورك على الموضوع . بالنسبة للبيت : كانوا علينا والدبش بنت شاره ******** لاد الكريزي ميبسين المشاريب المقصود من: [ كانوا علينا ] يعني غزوا علينا حيث إن العتبان هم اللي غازين. المقصود من : [ لاد الكريزي ] هم الحمده نسبة ً لأصلهم من الكرزان البقوم . المقصود من : [ ميبسين المشاريب ] تدل على شجاعة الحمده وفروسيتهم . تقبل مني فائق الاحترام. |
رد : وقعة [ عقيلان ] بين قحطان وعتيبه .
اقتباس:
الله لا يهينك على مرورك على الموضوع تقبل من جزيل الشكر والتقدير |
رد : وقعة [ عقيلان ] بين قحطان وعتيبه .
السلام عليكم ورحمة الله وبركاته
البقاء يا ابا الذموم والحقيقة حبيت أتأكد والا انا خابر الحمدة من الكرزة البقوم والمشكلة يا خوي (ابا الذموم) ان قبيلة الكرزة انقسمت قسمين نص بقى مع البقوم ونص راح للمقطة عتيبة وسووو لحسة مخ . اخيرا (ابا الذموم) بنشدك انت تحب ذا اللقب ابا الذموم والا انت من نسلة او من جماعتة؟؟؟؟؟؟ ولا هنت على شرح البيت يالغالي .. : اخوك ابن الاسود العاطفي : |
رد : وقعة [ عقيلان ] بين قحطان وعتيبه .
لاهنت يابا الذموم
1000000نعم فيكم ياربعنا من غير قصور فالقبايل كلها من اللي يحط راسه براس قحطااان هذا السؤال يطلرح نفسه |
رد : وقعة [ عقيلان ] بين قحطان وعتيبه .
اقتباس:
أررررحب يالابن الأسود بارك الله فيك على متابعتك الموضوع يالقرم بالنسبة لسؤالك : أنا من نسل " أبا الذموم " . تقبل فائق الاحترام والشكر والتقدير. |
رد : وقعة [ عقيلان ] بين قحطان وعتيبه .
اقتباس:
والنعم فيك وفي جدك مسفر بن هادي الله يرحمة وفي حمولة ال سعيدان وفي قبيلتك ال عاطف وفي قبيلتك الام الجحادر قحطان وفي جميع من ينتسب لقحطان . والحقيقة ال سعيدان شيوخ ال عاطف افتخر فيهم بما انني عاطفي وهم شيوخنا من قديم الزمان الى ذا الحين وهم كفو لهذي الشيخة. :اخوك ابن الاسود العاطفي : |
رد : وقعة [ عقيلان ] بين آل مسعود وآل الجرو ضد عتيبه .
أرحب أرحب أرحب تراحيب المطر يابالذموم يطيب المجناوطيب الراس ودايم معودنا علي العلوم الطيبه ونعم بربعنا ال الجرو وال مسعود ولاهنت يابالذموم ولك منا جزيل الشكر والعرفان علي متقدمه لنا من العلوم الغانمه اخوك مسعود الوعيلي
|
رد : وقعة [ عقيلان ] بين آل مسعود وآل الجرو ضد عتيبه .
الاخ الغالي اباالذموم دائمآ انت مبدع . اشكرك على هذا الطرح الجميل وعلى على هذه التفاصيل الدقيقه .
ولكني اختلف معك في بعض النقاط منها: 1- ذكرت ان الوقعه من قحطان آل مسعود وآل الجرو ومن عتيبه برقا وأنا اختلف معك حيث ان الوقعه بين آل مسعود وبرقا اما من ناحية آل الجرو فكانو مجموعه من الفرسان مع آل مسعود ولم تكن قبيلة آل الجرو كامله . 2- قلت انه قاد آل مسعود جعفر ابن عبود وآل الجرو ضويحي ابن عريج وهذا غير صحيح وقعة عقيلان لم يكن لها قائد غير جعفر ابن عبود وهذا معروف عند قحطان كافه . واحب ان اضيف لك ان في هذه الوقعه مع آل مسعود فرسان كثير من قحطان غير فرسان آل الجرو . ومن المعروف ان جعفر ابن عبود عندما يتحرك من تثليث الى نجد ومنها الى شمال المملكه حتى حائل يكون معه الكثير من فرسان قحطان حتى انه كان معه في كثير من تحركاته فرسان من الدواسر وشهران وهم فرسان كسابه يمشون مع آل مسعود لقوة آل مسعود في ذالك الوقت وقد لقب جعفر ابن عبود ( بجاد نجد ) لهذا السبب . اما بروز شجاعة ضويحي في ذالك اليوم فلا أحد ينكرها فهو فارس معروف وقد صنع ذالك اليوم ماتعجز عنه الفرسان . اما من ناحية القصيده فأحب ان اورد القصيده حسب ماهو معروف عند آل مسعود : [poem=font="Simplified Arabic,4,orangered,bold,normal" bkcolor="transparent" bkimage="" border="none,medium,white" type=4 line=0 align=center use=ex num="0,black"] حـــر شـهــر مـــن صـــوب نـجــد مـطــاره = يــبــي الـمـغـاروقــرب الـفــطــر الـشــيــب صــدرمــن الـصــخــه يـتـقـطــع شـــــراره = يـتــلاه مـــن قــومــه ســــوات العـيـاسـيـب وردد جـيـشــه مـــــن عـــــدام الــزبـــاره = وحــفــوه صـحـبـانــه بـكــثــر الـمـنـاديــب قـــــدم حـشـيـفــان يـبـيـلــه ســـبـــاره = مـتـعـلــي فـــــي نـايــفــات الـمـراقـيــب عــلـــى عـقــيــلان رمــالـــه بـــغـــاره = وتـشـيـب الـلــي مـابـعــد حــولــه يـشـيــب غـــاروا مـحـوشـة الـدبــش فــــي انـتـشــاره = الااد الـكــريــزي مـيـبـسـيــن الـمـشــاريــب فـلـحـقـوا قـحـاطـيــن ســـــواة الـنــمــاره = والــكـــل مـنــهــم حـثــهــا بـالـعـراقـيـب بـشـلــف مـواقـعـهـا ســـــوات الـحــجــاره = صـويـبـهــا عــيـــت تــســـره لـطـابـيــب يــامــســوي الـفــنــجــال زود بـــهــــاره = عـــده عـلــى عـــروان وثـنــه لـبــو ذيـــب ومـربـوعــه الــشــاوي مـتــيــه ابــكـــاره = ضـويـحــي شــــوق الـبــنــي الـرعـابـيــب عـاداتـنـا فــــي الـصـيــد نــاخــذ خــيــاره = ثــلاثــة الـجــذعــان غــصـــب بـلاطــيــب أنـشــهــد انــهـــا حــجـــة بـاعـتــمــاره = عــراضــة الـوكـحــي نــجـــوم الـمـغـايـيـب الــلــي شــــرد خــــلا الـحـويــا يــســاره = مـتـنـحــر رنــيـــه يـــــدور مــعــازيــب [/poem] # واخيرا اتمنى قبل الرد ان تتأكد من جميع ماذكرته انا وان تجمع كل المعلومات التي تخص هذه الوقعه ولك مني فائق التقدير والاحترام ............ |
رد : وقعة [ عقيلان ] بين آل مسعود وآل الجرو ضد عتيبه .
اقتباس:
أررررررحب يابو خالد تراحيب المطر ونعم ٍ بكم يآل مسعود ما فيكم كلام وافين اول وتالي. ## لي عدة تعليقات يالغالي: 1) هل في كلامي السابق قلت إن آل الجرو كلهم موجودين ؟؟؟؟؟؟؟؟؟؟؟ بالطبع لم اقله أبداً !!!!!!!!!!!!!!! حتى إن فارس آل الجرو الشيخ جديع بن مقبل لم يشارك ذاك اليوم . 2) أصلاً كل قبيلة لها عقداء وشيوخ يغزون تلقى بعضهم في نجد وبعضهم في الجنوب واي انتصار ينسب للقبيلة كلها جميعاً . 3) وذاك اليوم " وقعة عقيلان " من طيب فعل الفرسان وشجاعتهم الشيخ جعفر بن عبود عاتب مازحاً الشاعر ابن شعواء وقاله ليه تذكر عروان قبلي في القصيده قاله يالامير قومي فعله الطيب وفعلك طيب مثله . يقولون إن الفارس عروان بن منيشط من شجاعته ذاك اليوم بسيفه لا ضرب الواحد ذبحه من اول ضربه واشتهر ذاك اليوم " وقعة عقيلان " . 4) صدقني ما جاء مني إلا الصحيح وإن حصل شي فاختلاف الراي لا يفسد للود قضية. |
رد : وقعة [ عقيلان ] بين آل مسعود وآل الجرو ضد عتيبه .
بسم الله الرحمن الرحيم
السلام عليكم ورحمة الله وبركاته ونعم بهم كلهم جحادرن وعوم غانمه |
رد : وقعة [ عقيلان ] بين آل مسعود وآل الجرو ضد عتيبه .
لاهنت وبيض الله وجهك
|
رد : وقعة [ عقيلان ] بين آل مسعود وآل الجرو ضد عتيبه .
لاهنت وعداااك العيــب ياشــنب والى الامااام
تقـــــبــــل مــــروووري ولــــيــد الـعـــــلـــيـانـي |
رد : وقعة [ عقيلان ] بين آل مسعود وآل الجرو ضد عتيبه .
كفوووو بال الجرووو وال مسعوود
مشكوووور اخوووي |
رد : وقعة [ عقيلان ] بين آل مسعود وآل الجرو ضد عتيبه .
الأخ الجحدري تحيه طيبه الانتصار بسم قبيلة قحطان قبل كل شي والي اعرفه ان ابن عبود وجماعته كانوا حادرين من الجنوب من جهة تثليث الي نجد كماهو معروف عن قبائل قحطان بتنقل في ديارها من الجنوب الي الشمال والعكس بحث عن الربيع وكان ال جرو هم اقرب قبائل قحطان بتجاه عتيبه فكيف تقول انا ال جرو ليس لهم عدد كثير من الرجال في هذه الوقعه بل اول من ناوش العتبان هم الجرو وكان العقيد في هذه هو اضويح ال جرو الي جانب ابن عبود ويكفي قصيدة العتيبي الذي يرثي الحشيشي ويصف بطولات ال جرو وبتحديد ضويحي ارجو من الاخوان البعد عن تهميش ابناء العمومه فا ال جرو اخذوا ثار الخنفري من الحشيشي ولاء لهم فخرفي ذلك لأن مثأر القحطاني واحد وسلامتكم
|
رد : وقعة [ عقيلان ] بين آل مسعود وآل الجرو ضد عتيبه .
لاهنت على الموضوع
وانا ملاحظ انك مركز على معارك عتيبه وقحطان:rolleyes: ليه قحطان متحاربت مع غير عتبيه ولاحدها عتيبه:71_asmilies-com: ومت بود |
رد : وقعة [ عقيلان ] بين آل مسعود وآل الجرو ضد عتيبه .
أولا : بيض الله وجهك يا أبا الذموم لتوثيقك لتاريخ قحطان التليد ...
------------ ثانيا : أبو عتب : * أرحب أرحب بينا يالذيب ... * أنت تقصد إنه مركز على معارك الجحادر :71_asmilies-com: (فقط) مع عتيبة ... * الجحادر لحالها حاربت ( مطير ، عتيبة ، يام ، الأشراف ) وغيرهم ، لكن الأكثر مع عتيبة ، وهي فخذ من 9 أفخاذ من قحطان وسوت الهوايل :110103_bo في القبائل التي ذكرتها والأشراف وحكمت نجد حتى دولة آل سعود;) ... * ولعاد تقول قحطان لأن هذا خطأ قول الجحادر :rolleyes: ... ================== تحياتي لكم بلا حدود من المريخ للأخدود ... |
رد : وقعة [ عقيلان ] بين آل مسعود وآل الجرو ضد عتيبه .
لا هنت يا ابا الذموم
مبدع في طرحك ونقلك |
رد : وقعة [ عقيلان ] بين آل مسعود وآل الجرو ضد عتيبه .
صقر آل عابس
لاهنت على الافاده ياذيب لكن ملاحظه كذه الاخ العزيز الي يكتب الموضوع اغلب قصصه عن عتيبه وقحطان مادري ليه iiiiiii |
رد : وقعة [ عقيلان ] بين آل مسعود وآل الجرو ضد عتيبه .
أرحب أخوي أبو عتب ...
لكن الأخ أبالذموم من الجحادر من آل عاطف وأغلب معارك ربعه مع الهيلا ، هاه عرفت السبب ذلحين :) ... ============ تحياتي لك بلا حدود من المريخ للأخدود ... |
رد : وقعة [ عقيلان ] بين آل مسعود وآل الجرو ضد عتيبه .
صقر آل عابس
أرحب أرحب لاهنت ياخوي على التوضيح والله الف نعم بقحطان |
رد : وقعة [ عقيلان ] بين آل مسعود وآل الجرو ضد عتيبه .
ما عليك زود ...
ومرحبا ألف مرة أخرى ... وأي استفسار فترانا جاهزين يالقرم :) ... ============== تحياتي لك بلا حدود من المريخ للأخدود ... |
رد : وقعة [ عقيلان ] بين آل مسعود وآل الجرو ضد عتيبه .
اقتباس:
هات القصيده يالقرم الله لايهينك |
رد : وقعة [ عقيلان ] بين آل مسعود وآل الجرو ضد عتيبه .
اقتباس:
بن غنيم ودبل أيضا وهذة من صفات فرسان قحطان كقول شالح بن هدلان يرحمة الله عاداتنا بالصيد ناخذ خياره****ثلاثة الجذعان غصبن بلا من وكلنا مكملين لبعضنا |
| الساعة الآن 11:37 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .
Copyright ©2003 - 2011, www.qahtaan.com