|
من هى قبيله ال سويدان
عندي سؤال وهو من هى قبيله ال سويدان ومن هم شيوخ هذه القبيله وفرسانها // وماهي القصيده التي منها زعزع سويدان فجا دويسه -عند السلمات في فرعت لرطاوى وماهي هذه القصيده الاد ابن سواد هل الباس القوي -لاطار من شعث البكار غبار ارجو من الاخوان الي يحفض هذه القصائد ان يعطينا اياه كامله وماهي المناسبه التى قيلت فيها وتقبلو فائق الاحترام والتقدير
|
هلا فيك اخوي اصل العروبه
قيلة ال سويدان من ال الجمل من الجحادر هذي اللي عندي :) |
اخوي اصل العروبه ال سويدان من الجحادر
واميرهم ابن حويزي |
وينكم يصبيان قحطان وين اللى يعطينا الاجابه الشافيه الوافيه //////////////// تكفون يقحطان وش ذا السكته
|
اصل العروبه
وش انت تنادي له ،والله لو انك ملحوق انت نشدت والرياجيل ردو عليك باللي عندهم:( |
يالفهري عندك علوم عن الرجال والا عين خير والاعاد تطفي النور
|
آل سويدان من آل جمل من الجحادر
وغلبيتهم يقطنون في تثليث ولهم مواقع مع الدواسر واخرها مشكلة ((جرير)) التي قبل عشرين شنه تقريباُ والتي قال فيهم حمد هادي المسردي اعيال ابن سواد حموا عدهم ماذيق = وحرابهم صدر محيمً وبه خله حثو في وجيه القوم ثم سدو الطريق = ولا واحد منهم طرت قلبه الذله هذا ماعرفه والله اعلم |
حياكم الله
واللي اعرفه ان اميرهم بن حويزي يسكن في مدينة الرين وفيه العديد منهم في الرين ومنهم ناس في هجره بين الرين وعنان واكثرهم تقريبا في منطقة تثليث والله اعلم |
اصل العروبه مشكورا
قبيلة ال سويدان من اكبر قبايل ال جمل من الجحادر ومنهم من يسكن نج ومنهم من يسكن اعلى الجنوب ولا اقد راضيف على كلام الاخون شي ولك شكري |
الاخوان - محمد الجربوعي - فارس - ابو ذيب - ابن عاصم - فارس قحطان ارررررررررحبو مليار ترحيبه \\\\\\\ ويعطيكم الصحه والعافيه على المرور والرد والف شكر لصبيان قحطان على هذا الموقع الرائع وتقبلو فائق تقديري واحترامى
|
أخي اصل العروبة سوف ابحث عن هذه القبيلة وارد عليك عن قريب إنشاء الله
وتقبل تحياتي |
ارررررررررحب مليون ترحيبه //// و بيض الله وجهك ياراعي النوق وانا في انتظار ردك والف شكر لك وتقبل تحياتى وتقديري .
|
اصل العروبه آل سويدان من آل جمل من الجحادر وأميرهم نايف بن عبدالعزيز بن هذال
وهو في تثليث وبعضهم في الرين وعنان |
ابن خزام مشكورعلى مرورك وعلى المعلومه ويعطيك الف عافيه
|
بصراحه ما ازيد على كلام الربع
لكن اللي عندي ان قصرانا ال سويدان من اكبر قبايل ال جمل الجحادر وشيخهم يسكن تثليث وهو الشيخ /نايف ابن عبد العزيز الحويزي وهو مدير احد المدارس واضنه اصبح موجها وللعلم فقد كنت احد تلاميذه والله والنعم وهذي شهادة حق وللمعلوميه فهو ساكن في تثليث ويعتبر لي جار. ومن فخوذ ال سويدان ال حسن وللاسف نسيت بعض الفخوذ ولو كنت في تثليث كان جبت التفاصيل وتشتهر هذه القبيله بالعين وارجو عدم الزعل من ذكر ذلك ولكن الصحيح ان بعض شيبان هذه القبيله سبحان الله يحكم العين تقول بندق الله يستر علينا وعلى المسلمين ولهذه القبيله صولات منذ القدم ويشتهرون بالشجاعه ولهم وقعات مع الدواسر وهم اليوم من اكثر القبائل تمسكا بالعادات والتقاليد وما زالوا مثل اكثر القبايل في تثليث يحافضون على رعاية الابل والاعتناء بها ((ال سويدان يبغالهم كتب علشان نكتب عنهم كل شي )) المعذره على الاطاله ولكن وجدت من الواجب قول الحق عن قصراي واخواني عيال ابن سواد والله ومليون نعم |
الاخ الامبراطور مشكور على المرور على اى حا ل ولو انك قمت تخور وارجو منك توضيح وش تقصد بقصرانا وشكرا
|
الاخ اصل العروبة قبيلة ال سويدان قبيلة معروفه وهم من الجحادر من ال الجمل ولهم وقعات معروفة مع الدواسر ومنها وقعة( الجزلاء)
على ما اذكر وقد ذكرها الشاعر محمد ابن جروان (رحمة الله) في قصيدة مشهورة تذكر فعل ال سويدان وبطولتهم في هذة المعركة وسوف ابحث عنها واوردها اشاء الله حيث انها الاتحضرني في هذا الوقت هذا ماااااااااا احببت ان انوهه عنة ولكم اجمل تحية |
اخوي اصل العروبه شكلك معطي السانك الحريه الزايده وش قصدك اني اخور الخوار معروف من راعيه
اركد الله يجزاك خير |
الاخ هداج مشكور على مرورك ويعطيك العا فيه ونحن بانتظار هذه القصيده وتقبل تحياتي
|
والنعم والله بال سويدان
|
العروبه لايكون ناوي تناسبهم والا شي اسئلتك كثرة وانت شكلك ما تعرفهم او انك تبغى شي معين قله ويجيك الجواب
والشباب كل واحد اعطاء اللي عنده وال سويدان لا ازيد على قول الاعضاء اللي شاركوا من اطيب قحطان في الخوه والشجاعه والكرم والطيب واسأل مجرب والله والف نعم بعيال ابن سواد في كلن حقه من القبايل ومن ال سويدان في الجنوب والغربيه والشرقيه ونجد وكل المناطق |
الامبراطور ماذا تقصد بجيرانا .
|
اخوي اصل العروبه الامبرطور نيتة زينه يقول جيرانا يعني ديرتهم جنب ديرة السويدان
وانت يا اصل العروبه فسرتها بشي ثاني الله يهديك وال سويدان ربعنا ومليار نعم الاد ابن سواد فزعة المضيوم |
الاخ / الاشهب يعطيك العافيه على مرورك وعلى ردك وانا فعلا اريد انا سبهم فيه جيران لى منهم اود اخطب عندهم وانا سائل عنهم من قبل وكل من سئلته مدحهم لى حتى انتم فى هاذا المجلس الكريم يااخونى انا خايف اتوهك لذلك ارجوكم المساعده وهذا اخر مااكتبه اليكم ولكم كل الاحترام والتقدير واشكر كل من عمل فى هاذا الموقع الممتاز .
|
اصل العروبه مساك الله بالخير
اقصد بجيرانا يعني احددانا يعني اراضيهم واملاكهم بينا وبينهم حد (عقم) وانت ويش ضنك اني اقصد ؟؟؟؟؟؟؟؟؟؟؟ ويكون في علمك ان كانك ناسبتهم فمناسبن لك رياجيلن كفوووووووووووووووووووو وترى وانا اخوك اللي بيناسب الرجال ماهوب يتنشد عنهم في النت |
الامبراطور يسعد مساك ومشكور ويعطيك العافيه وارجو منك المعذره وانا اسف اخى الكريم وارجوك ان تقبل اعتذارى وبيظ الله وجهك ماقصرت .
|
ال سوادان
بسم الله الرحمن الرحيم
من كان يريد افعال بني سوّاد فالشيبان مرجع لكل من يريد ذلك لكن يقول ابن جدلان هيئية بجرير كل ذكرها شاع بخبرها كل الجزاير يوم هيئة جرير هم والدواسر عبدالله بن هاجس بن عايض ال صبرة السويداني |
أحسنت ياالمبراطور
|
السلام عليكم ورحمة الله وبركاته :اخوي اصل العروبه للمعلوميه قبيلة ال سويدان من ال الجمل الجحادر وشيخهم ابن حويزي ويقطنون في تثليث .....وهذي القبيله تشتهر بالشجاعه والابل المجاهيم وهي قبيله معروفه ولها معارك مع قبيلة الدواسر وكان النصر حليف لقبيلة ال سويدان واخر هذي المعارك (هية جرير) وقصة الجزلاء ,وفيه قصايد لشاعر بن جروان وانا احفظ قصائد منها لكن لا اريد ذكرها لتجنب الحساسيات .....ودمتم اخوكم
المنااااااااااااااااااااااااااااااااااااااار |
اخوي اصل العروبه اذا كنت ناوي تناسب ال سويدان فخذ يومك باوله ولاتسأل ال سويدان قبيلة معروفه
وعلى ماقال(لاخذاك فخذيه) معنى هذا المثل اذا زوجوك فتوكل على الله تزوج والله يوفقك (قال ما أكثر كلام البدو قال يرددونه) |
[grade="00BFFF 4169E1 0000FF"]
center]والله وسبعين نعم بعيال بن سواد [/align][/grade]معروفين من الجحادر من الجمل وموجدين في نجد وفي تثليث والله يرحم حمد هادي المسردي كفى ووفى في مدح عيال بن سواد في قضيتهم مع الدواسر على شان البير والمشكله الي راحت على كل حال الله يبارك في الا سويدان وقحطان كلهم اخوك حبابي اصل وفصل |
أجل بتناسبهم ؟؟؟
ليتني حولك 000 |
السلام عليكم ورحمة الله وبركاته >>>>>>أرحب
ال سويدان والله ونعم وستين الف نعم هم من جمل من الجحادر ويشتهرووون بالكرم وبالمحافضه على ابلهم حتى ان ابلهم تعد من أفضل الابل في الجزيرة هم ويا الدواسر وال مرة ..... ويشتهرون ك>لك بالتمسك بالعادات والتقاليد وتمسكهم بتعاليم الشريعة .... ومنهم في الدمام جمع لا باس به والرياض ولكن كثرتهم بتثليث مع ال مسعود |
السلام عليكم ورحمة الله وبركاته أنت تسأل
الأخ أصل العروبه انت تنشد عن شيوخ القبيله وعن فرسانه وعن بعض القصايد وتبغاها كامله علشان تناسبهم! على كل حال البيت اللي أوله الاد ابن سواد هل الباس القوي للشاعر ابن جروان و "تكفون يا قحطان وش ذا السكته" عباره في احدى قصائد ابن جروان! تقبل تحياتي مروان |
بسم الله الرحمن الرحيم
السلام عليكم ورحمة الله وبركاته اصل العروبة ال سويدان ينقسمون الي ثلاثة اقسام هم ال حسن ـــــــ العيزره ــــــــ ال صبرة ... وشيخهم نايف بن عبد العزيز بن حويزي من فخذ ال حسن ويسكن في تثليث كما يوجد هناك فيهم مشايخ كابن عم شيخ الشمل رئيس مركز عبلية بالرين محمد بن عبد الله بن حويزي وكذلك ابن عمهم عايض بن بدر بن حويزي امير ال سويدان في المنظقة الشرقية وكذلك امير ال عيزره ابراهيم بن حبيان ويسكن في العماجية على طريق الخرج بالقرب من الرياض وكذلك امير ال هويدي من ال حسن الشيخ محمد بن راشد بن عويد الذي يقول فيه بن هدلان ::::::ان كان تنشد يالهويدي عن الطير ... الطير والله يالهويدي غدالي ويسكن في فرعة عسيلان بالرين جنوب القويعية والشيخ محمد بن عيد بن حنش امير ال صبرة وهناك شجرة لقبيلة ال سويدان لدى امير ال سويدان في الشرقية الشيخ عايض بن بدر بن حويزي يمكن الرجوع لها وشكرا |
والنعم بآل سويدان جميعهم وبقحطان وكل منتسب لها
|
الاخوان جميع الله يعطيكم العافيه على الردود والتفاعل مع الموضوع
|
اخي السائل انت مثل الذي يسئل عن عين الشمس
ال سويدا ن معروفين وابلهم ماتوخذ من يوم الجهل لا حال اعداد هذا الرد وقبل هية جرير لهم هية مشهوره جدا وبيض الله وجيههم وهي هية العين بينهم وبين رجال يام الياميه كانو ناوين على ال سعد لان ال سعد كانو ولازالو من القبابيل الذين رسمو تاريخهم بفعل ايديهم ويقول شاعرهم يانحمد الله لابتي سعديه = خزن الظفر ماتاخذه عاريه = لطامة العيال لاجا هيه = ماهو يحل ابلادهم حرابي نعود لال سويدان قامو الياميه يوم وردت ابل ال سويدان على الماء يريدون اخذها قد قال كبيرهم اقصد الياميه ان كان الرجاجيل تحجو في ثفان الابل فهذولا ال سويدان واتركوهم لان السويداني يذبح وينذح من دونها ون كانهم مسكو المحاجي فذولا ال سعد وبيذحونكم ولكن استبسلو الحاصل قامت ىالمعركه وال سويدان سبعه ومنعوها من القوم وذبحو رجاجيل ماهم بشوي وانشدو من متعب الجنيبي نعم به وبربعه اولاد بن سواد يقولون ان الياميه تالي نهار قا مو يحثون وجيه الابل علشان تعود على هلها ماعاد لهم بها |
ال سويدان وما ادراك ما ال سويدان ..
الشجاعه والكرم والنخوه ... تعرفت على ابناء محمد بن عيد بن حنش شيخ ال صبره من ال سويدان ,من فتره طويله ,وهم ليسوا اصدقائي بل هم اخوتي ...سمعت الكثير عن ابوهم فهو رجل اشتهر بين قبائل الجنوب ونجد بكرمه وبدماثة اخلاقه وشجاعته... و سمعت الكثير الكثير عن ال سويدان ..وعن فرسانها .. اذكر منهم حنش السويداني جد شيخ ال صبره محمد بن عيد ...وهو احد اشهر فرسانها على الاطلاق ..وفيه دعوه عتيبيه ..يقولها الرجال على ناقته اذا اتعبته ...يقول (جعلتس حنش) اي جعلك لحنش السويداني ليأخذكي...وقصصه كثيره لا تحظرني رحمه الله... واذكر منهم متعب الجنيبي احد الفرسان العظام لا ل سويدان وقصتة مع الياميه السته اللي غدرو به رحمه الله ...فلم يقدرو عليه وهم سته او سبعه وليس معه ما يكفي من الرصاص ولاكن الرجال هابوه بعد ان اعتزى فأعطوه الامان وقالو له دلنا على ديارنا والله يستر عليك فتأخر احدهم ورمام من خلفه رحمه الله ... احبتي لا اقول ما قلت لاجل شيء لا والله ..انا من قبيلة اخرى ..ولاكن ال سويدان عرفت الكثير منهم في الشرقيه وهم نعم الرجال .... واخوتي الذين لم تلدهم امي هم عيد وعبدالعزيز (جفين سابقا) وعايض (وحط على عايض مليون خط )ومتعب وعواد ابناء الشيخ محمد بن عيد بن حنش شيخ الصبره ....ادام الله علينا اخوتنا وحفظهم الباري ...وترى خوالهم احفاد الفارس متعب الجنيبي وهم احفاد الفارس عيد بن حنش (احد فرسان هية جرير) واحفاد الفارس حنش سابق الذكر... اسف على الاطاله ... والسلام عليكم ورحمة الله وبركاته.. اخوكم ابن غتمي الــــغـــامـــدي. |
السلام عليكم ورحمة الله وبركاته
الإخوان الإعضاء كفوا ووفوا ،،، وذكروا ما يعرفوا عن قبيلة آل سويدان من نسبها وأسرة مشيختها ومكان تواجدها لكن المأخذ على السائل أصل العروبة ... حيث إني بصراحة استغرب من اسلوبك الهجومي مع بني عمك الأعضاء !!!!!! اسلوبك يأخذ الطابع الإستجوابي التحقيقي ( واحد تقوله عين خير !؟ والآخر ما تقصد بحددانا !؟ ..... الخ أنا اعرف إن كل واحد مرآة نفسه بس ما توصل إلى هذه الدرجة إن أستفز الأشخاص بدون سبب مقنع ولا لا يا أصل العروبة ؟؟؟ بعدين يتضح لي والله اعلم إنك من آل سويدان بس حاب تعرف فضوليا معرفة الناس بهم ؟؟؟؟؟؟؟؟ أرجوا ان تفهمني يا أخي أصل العروبة إن ما بيني وبيينك إلا كل خير وقبيلة آل سويدان ونعم وغنيين عن التعريف .... |
| الساعة الآن 06:43 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .
Copyright ©2003 - 2011, www.qahtaan.com