شبكة قحطان - مجالس قحطان - منتديات قحطان - وجــــهـــت من ضــيـقـة ٍ بالصدر عـــصـريّة

- مـجـلـس الـشـعـر الـنـبـطـي (https://www.qahtaan.com/vb/forumdisplay.php?f=17)

- - وجــــهـــت من ضــيـقـة ٍ بالصدر عـــصـريّة (https://www.qahtaan.com/vb/showthread.php?t=54704)

وجــــهـــت من ضــيـقـة ٍ بالصدر عـــصـريّة

أرحبوا يارجال

وعيدالله عليكم مبارك وكل عام وأنتوا إلى الله أقرب

[poem=font="Simplified Arabic,6,indigo,bold,normal" bkcolor="transparent" bkimage="" border="none,medium,gray" type=2 line=1 align=center use=ex num="0,black"]
وجّهت من ضيقة ٍ بالصدر عصريّة=أدور علاجها في صحصح ٍ خالي

من فوق شاص ٍ من خيار البريميّة=شاريه من حُر مالي نقد بريالي

ماجا عطيّة ولا من الغير عاريّة=ومن الشحاذة وأهلها تكرم سبالي

وجهتبه والتوانك فل ممليّة=ومكمل ٍ عزبتي بالمر والحالي

وعن البشر رحت في دار ٍ خلاويّة=وأبعدت عن ذبذبة الإرسال جوّالي

أبعد عن أهل النمايم والنقيليّة=ضعوف الأنفس وراع القيل والقالي

ووقفت في ديرة ٍ بالوبل مسقيّة=على يميني الضنط والباطن شمالي

وشبيت ضوّي لكيف الرأس بريّة=ضو ٍ حطبها حطبته جزل وجلالي

ونزّلت لي من خيار الفرش زوليّة=وفرشتها عكس صفق الساعر الصالي

والشنطة اللي لحفظ أشياي مشريّة=الكيف فيها وفيها كل معمالي

وقننت ماء دلتي في وسط خمريّة=من صنع بغداد جت مع من جلبهالي

وجذبت جمر ٍ من أسفل ضوّي الحيّة=وفرشته لدلتي تقطع بالإمهالي

ودنّيت نجر ٍ قديم ٍ صنع سوريّة=لاسمعه اللي حزين يون ويلالي

ودقيت به قفرة الكيف الخليطيّة=مابين هيل ٍ وعود وقرف سنغالي

وقربت من تمر بيشة نوع صفريّة=وقدعت سبع وعددها وتر فنجالي

وبعد العشا طاب لي لعب الهجينيّة=ألاعب القاف من جزلات الأمثالي

ذي ونستي لاحصل بالصدر تكيّة=أروح في صحصح ٍ ماغير أنا لحالي

تحتدني للخلا نفسي الشقاويّة=واللي بينقد عليّه ماله ومالي[/poem]

الضنط المذكور بالقصيدة جبل علم يقع في المهمل بين بيشة ووادي الدواسر