بذكـر الله معـبـود بديـنـا
الاه الـكـون رب العالميـنـا
عزيز الشـان خـلاق البرايـا
خلق الانسان من روح وطينـا
وزين صورته واطلـق لسانـه
بحـرف مايعـوق الناطقيـنـا
وعلمـه الكتابـه والـقـراءه
وقال افهـم بهـا دنيـا ودينـا
ولي العـرش غفـار الخطايـا
رحـوم لـه عبـاده ساجدينـا
تسير السحب والافلاك بأمـره
وبأمره ينزل الغيـث الغشينـا
بعد ذكره بعـد القـاف وابـدع
من الـدر المصفـا و الثمينـا
حسينـات المعانـي و المثايـل
تحير بهـا عقـول الفاكرينـا
ابنظمها كمـا نظـم الجواهـر
نظمهن صايغ ٍ باخص ٍ مكينـا
لهن بعقـود بجيـاد ٍ تشـادي
عنوق للضبا الصيـد الحسينـا
منقيهن مـن المنقـود وادّرى
عليهن مـن خبـاث ٍ عابثينـا
بعد هـذا تفضـل يـا نديبـي
إنحملـك الرسالـه ياألاميـنـا
لمن هو بالفخر والعـز يرفـل
وقرم ٍ مـن رجـال ٍ نادرينـا
عريب ٍ من عريبات المناسـب
جـدوده بالمفاخـر دارعيـنـا
عبيديا ً لـه التاريـخ يشهـد
من الحـارث مـلاذ الخايفينـا
ابن صالح عزيز الجـد هـادي
من الحرقان سقـم الطامعينـا
ابو فيصـل اليامنـك وصلتـه
تسلمـه الرسـالـه باليميـنـا
وقله يـا عريـب الجـد حنـا
نجـاوب بالـوفـا للسائليـنـا
مادام انك نشدت اليوم فاسمـع
جـواب ٍ لايهـون السامعينـا
كنـوز ٍ مـن قديمـات اليالـي
وذخـر ٍ ينـذخـر للمقبليـنـا
مواريـث ٍ توارثهـا الخلايـق
وتحفظهـا الـروات الفاهمينـا
حد ٍ يقرى من التاريخ سابـق
ويلقـا مـا كتـب بالغابرينـا
تواريـخ ٍ تسحلهـا العـوارف
واحـداث ٍ كتبهـا الكاتبيـنـا
وحد ٍ جده على صدوره يعـده
وراثه مـن رجـال ٍ سابقينـا
كما عد الخرز في خيط سبحـه
تسلسلهـا الثقـات الواثقينـا
وحد ٍ لو تنشده من ساس راسه
اخير له السكوت من الرطينـا
وعلم الغيب عنـد الله وحـده
عليـم ٍ بالحقيقـه واليقيـنـا
ولكـن ماعرفنـا لـك نـعـده
ولاحنـا بخـيـر الحافظيـنـا
نبيـن مـا حفضنـا واكتنزنـا
بـلا زود ٍ ولاحـن ناقصينـا
انا ابن كليب ابن راشد وجـده
علي ابن محمد الحصن الحصينا
ابن علي المجـرب بالمواقـف
ابن منصور ابن ضيغـم ابينـا
ابوه منيف ابن ضيغـم وجـده
منيف اللـي ينـوف النايفينـا
ابن جابر ابـن علـي وتنشـد
ربيع وخـل منـك المغرضينـا
نسل سلطان سلطـان العبيـدي
عزيز ٍ مـن رجـال مجربينـا
ابن عبد الرحمن وروح جـده
وحنـا مـن خلفهـم ناسلينـا
وسمينا الهواجـر مـن طنانـا
هجر منصور ربعـه الاقدمينـا
نسل منصـور مافيهـم مغالـط
خـوان اربـعـه و مذربيـنـا
طريف وعلي وعبدالله على امه
يجي شهوان زيـزوم الضعينـا
وحنـا حدنـا جنـب المسمـى
وحنـا روس جنـب الاولينـا
عبيـده امنـا مافيـه منـكـر
ولابـه ام ينكـرهـا جنيـنـا
ابوهـا ماخفـى ذاك المهلهـل
وهي ليلـى غـرام الطالبينـا
عبيـده ساسنـا الاول وحنـا
عبيده في زمـان الحاضرينـا
تنبيـك الخبـر سـود اليالـي
واثـار بحثـهـا الباحثيـنـا
لنا فبراد فـي مـأرب مواقـع
شواهـد ثابـتـه للناظريـنـا
وعلوم ٍ ماخفت عنـدك بحيـك
تسولفهـا الرجـال السامرينـا
تسولف ما مضى من فعل جـد ٍ
عزيـز بالنسـب للفاخريـنـا
تفكر وافتكـر وافكـر وخايـل
وتنبيـك المواقـع يالذهيـنـا
وينبيك الخبر مـن هـو لقانـا
بحرب ٍ او عزمنـا مصلحينـا
لنل بالعز والنامـوس موقـف
تجيدونـه شبـار الشابريـنـا
وينبيك الخبر سلطـان مـآرب
معه بعض الحقائق لـك تبينـا
دمرنا حكمـه العامـر وعـزه
وعلى راسه بحافرهـا وطينـا
وينبيك الخبـر راع المحامـل
طلوع الشمس لديـاره مشينـا
هدمنـا عـز داره وسـط داره
رعى خمس الجزر والمحدثينـا
وينبيك الخبر جمـع القريشـي
شريف ٍ هاشميـا ً لـه عنينـا
ثلاثيـن وثلاثـيـن وكمـاهـا
تسيـر اجموعنـا لزاهميـنـا
معه سبـع القبايـل واللحايـق
وكسرنا جمعـه العامـر تبينـا
وينبيك الخبر من هـو زهمنـا
ومن دونه رسى الجمع الرزينا
وجلينا العدى من هجـر جلـه
على شانـه وحنـا الفايزينـا
عزيز الراس زيزوم الجزيـره
ابن مقـرن وتـاج الحاكمينـا
وكرمنـا وقـدرنـا إبعطـيّـه
جزيله مـا كسبهـا الكاسبينـا
وينبيك الخبر مـن هـو زبنـا
بجمعه يـوم طـرد المذنبينـا
وحلنا دون وجه البيـت قـوه
وسقنا مـن لصايـل راغبينـا
ومثايل ليـل تنبيـك الحقايـق
ويعطيك الخبر رجـل ٍ فطينـا
وعندك في ديارك مـن خبرنـا
علـوم ٍ مقنـعـه للناشديـنـا
شواهد ثابته كأنهـا تسولـف
تبيـن لـك علـوم الدارسينـا
رجّال ٍ ماضيه والنسـل سايـر
على إسلـوم ٍ قديمـه ثابتينـا
ثقال ٍ كالرواسـي وان جهلنـا
تبرى مـن جهلنـا الجاهلينـا
إليى من العـدو جمعـه بغانـا
نجيله فـي ديـاره مـا يجينـا
ندكه ليـن ترضيـه الحقيقـه
ويرجع مـن هديـره للحنينـا
وكم جمع ٍ وكم جمـع ٍ نوانـا
وعّود ٍ حّب زيزومـه طحينـا
وليى منا منعنـا مـا نخونـه
عـدو ٍ بالمواقـف مـا نعينـا
وليـا منـا نوينـا بالصداقـه
بعهـد ٍ للصداقـه صادقيـنـا
وليا منا عطينا الوجه يـآ مـن
دخيل الوجـه دونـه صاملينـا
وليا منا ربطنـا العهـد نوفـي
بعهـد ٍ بالوفـا لـه رابطينـا
و ليا منه جنى الجانـي وجانـا
حكم سلم العرب حقـه علينـا
وليـا منـا تخاوينـا نصونـه
خوي الدرب لآ أمـره طايعينـا
نجيله كالخدم قـدر ٍ وحشمـه
سلـوم اجدودنـا والغانميـنـا
ولامنـه لفـى للبيـت خاطـر
غدى المالـك وحنـا خادمينـا
نباشـره التراحيـب الجزيلـه
بحجاج ٍ ضاحك هو و الجبينـا
بقولت ياهـلا ارحـب و حيـه
وكيف البن و الكبش السمينـا
وليا منه نزل بيـت ٍ و جـاور
نعـده بالوفـا مـن والديـنـا
معـزز عندنـا مقـدر وحقـه
عليـه إنـزّود سلـم الطيبينـا
سلـوم ٍ للقبـايـل والقبـايـل
تفاخـت سلمهـا شـده ولينـا
وحنـا مـا نغالطـك القبايـل
قبايـل وافـيـه و مقدريـنـا
ولكـن الشجـر ماتـو يخلـق
تنوع بالمنابـت مـن سنينـا
وكـل ٍ دون حقـه مانلـومـه
يدافـع بالمثـلـم والسنيـنـا
على قد الجهد و الحيـل قـدره
يجي وزن الرجـال الوازنينـا
ولوانها علـى كيـف البشريـا
تشوف إضعوف ناس ٍ معتلينـا
ولآصار البشر واطي وعالـي
ولاصـارت فـوارق يالخدينـا
ولكنها بحد السيـف وأيضـا ً
برخص الروح والفاسل حزينـا
ضعيف الراي والناموس قاصر
مطاوع بالردى إبليس اللعينـا
فنـى عمـره مقابـل للحليلـه
وشوره بيدها فـي كـل حينـا
ولاخر عاف كسب ٍ فالمخاطـر
وعود صانـع و خـادم قطينـا
و ساير نسلهم منهم كمـا هـم
ويغّيرهـم زمـان الصاقطينـا
زمان ٍ ما يونـس كـل وافـي
عسى ربي علـى دوره يعينـا
وهذا علمنـا وغيـره وغيـره
إعلـوم ولا تبيـح بالكنيـنـا
وحنا لو نبـي نذكـر و نذكـر
يطول ونختصر لـك بالهوينـا
وانا استغفر ولي الكـون كلـه
مـن الزلـه وسلـم الظالمينـا
ونختمهـا وننهـي مـا بدينـا
بـذكـر الله رب العالمـيـنـا